Sunday, August 31, 2008

برنامج اليوم والليلة في كل يوم من أيام رمضان


القسم الثاني : برنامج اليوم والليلة في كل يوم من أيام رمضان

ولكن هناك 5 نصائح يجب ذكرها قبل بداية البرنامج وهي

النصيحة الأولى : حاول أن تكون الصلاة هي الفاصل بين أي مرحلتين من البرنامج حتى لا تضيع عليك صلاة جماعة في رمضان

النصيحة الثانية : حاول إذا فاتك شيء مهم في مرحلة من مراحل اليوم حاول تقضيه في مرحلة تانية وإذان فاتك شيء في يوم حاول تقضيه في يوم تاني

النصيحة الثالثة : يمكن أن تعدل في هذا البرنامج بحسب الظروف التي تناسبك

النصيحة الرابعة : انتبه بشده للفراغات الموجودة بين عمل وعمل آخر فلا تتركها تضيع مثل : أوقات المواصلات ، انتظار في عيادة أو مصلحة أو غير ذلك .. فمن أهم الفراغات مثلا الوقت بين الأذان والإقامة فهذا الفراغ في رمضان يمكن أن تقضيه في قراءة القرآن

النصيحة الخامسة : أن تشرك إخوانك وأصدقائك وأسرتك في البرنامج اليومي .. لان الإنسان من طبيعته أنه يفتر أو يكسل ولكن إذا اجتمع مع الآخرين على الخير فإنه لا يفتر .. يد الله مع الجماعة

البرنامج العملي ليوم من أيام رمضان : يقسم إلى 10 أقسام


االمحطة الأولى .. وقت السحر – فهو من أشرف أوقات اليوم والليلة – عن البخاري عن أبي هريرة رضي الله عنه أن رسول الله صلى الله عليه وسلم قال " ينزل ربنا تبارك وتعالى كل ليلة إلى السماء الدنيا حين يبقى ثلث الليل الآخر يقول سبحانه وتعالى من يدعوني فأستجب له من يسألني فأعطيه من يستغفرني فأغفر له " صدق رسول الله صلى الله عليه وسلم .

فهناك 3 أعمال في هذا الوقت
العمل الأول : كعتان خفيفتان . أو كما تشاء في عدد الركعات

العمل الثاني : السحور .. فيقول فيه الرسول صلى الله عليه وسلم " تسحروا فإن في السحور بركة " صدق رسول الله

صلى الله عليه وسلم

العمل الثالث : الإستغفار .. ذكر هذا الوقت في القرآن الكريم وخص بالإستغفار قال سبحانه وتعالى " وبالأسحار هم يستغفرون " صدق الله العظيم

المحطة الثانية : صلاة الفجر .. هناك 10 أعمال عليك فعلها في هذا الوقت

أولا : ترديد الآذان .. وتنطبق على كل آذان في اليوم

ثانيا : صلاة ركعتين نافلة الفجر قبل النزول إلى المسجد ، قال الرسول صلى الله عليه وسلم في حقهما " ركعتا الفجر خير من الدنيا وما فيها " صدق رسول الله صلى الله عليه وسلم

ثالثا : في الطريق إلى المسجد تقول هذا الدعا النبوي " اللهم اجعل في قلبي نورا وفي لساني نورا واجعل في سمعي نورا واجعل في بصري نورا واجعل من خلفي نورا ومن أمامي نورا واجعل من فوقي نورا ومن تحتي نورا ، اللهم اعطني نورا " ..

رابعا : عند دخول المسجد أخذ نية الاعتكاف ، فالاعتكاف لا يشترط أن يكون بالعشر الأواخر من شهر رمضان ولا يشترط أن يكون له وقت معين ولا يشترط أن يكون له مده معينة فهو يتحقق بالبقاء في المسجد مع نية الاعتكاف طال الوقت أو قصر .

خامسا : قول دعاء دخول المسجد " بسم الله والسلام على رسول الله ، اللهم اغفرلي ذنوبي وافتحلي أبواب رحمتك

سادسا : صلي تحية المسجد عند الدخول وصلي ركعتين النافلة في حالة أنك لم تصلهم في المنزل

سابعا : الدعاء في الوقت الذي بين الآذان والإقامة ، فالدعاء في هذا الوقت مستجاب كما قال الرسول صلى الله عليه وسلم " الدعاء لا يرد بين الآذان والإقامة " صدق رسول الله صلى الله عليه وسلم ..

ثامنا : إذا أقيمت الصلاة صلي صلاة المودع واستشعر شهود الملائكة لهذه الصلاة بالذات . حاول قدر المستطاع أن تركز في كل كلمة يقرأها الإمام واحمد ربنا حمدا كبيرا على السلامة من النفاق ..

تاسعا : بعد ختام الصلاة .. يقول الرسول صلى الله عليه وسلم " من سبح اللع في دبر كل صلاة ثلاث وثلاثين وحمد الله ثلاث وثلاثين وكبر الله ثلاث وثلاثين فتلك تسعة وتسعون وقال تمام المئة لا إله إلا الله وحده لا شريك له ، له الملك وله الحمد وهو على كل شيء قدير .. غفرت خطاياه وإن كانت مثل زبد البحر ..

عاشرا : لو الإمام أو أحد الدعاة قال درسا بعد الصلاة أجلس واستمع فهذا مجلس علم ذكره صلى الله عليه وسلم في الحديث الشريف عندما قال " ما اجتمع قوم في بيت من بيوت الله يتلون كتاب الله ويتدارسونه فيما بينهم إلا نزلت عليهم السكينة وغشيتهم الرحمة وحفتهم الملائكة وذكرهم فيمن عنده " صدق رسول الله صلى الله عليه وسلم ..

المحطة الثالثة : من بعد صلاة الفجر إلى ما بعد الشروق

قال رسول الله صلى الله عليه وسلم " من صلى الغدا في جماعه ثم قعد يذكر الله حتى تطلع الشمس ثم صلى ركعتين كانت له كأجر حجة وعمرة تامة تامة تامة " صدق رسول الله صلى الله عليه وسلم
إقرأ قرآن ، اذكر الله عز وجل .. ومن أهم الأذكار في هذا الوقت أذكار الصباح ، ادعو الله عز وجل .. فتبقى في هذا الوضع الإيماني من بعد صلاة الفجر إلى الشروق وبعد الشروق بربع ساعة إلى أن يأتي وقت الضحى .. صل الضحى وغادر المسجد

المحطة الرابعة : العمل

الذهاب إلى العمل حسب المواعيد المخصصة له ، فشهر رمضان هو شهر عمل وليس شهر للتراخي والكسل والتقصير ، شهر عمل يصل إلى الجهاد في سبيل الله

ولابد من أن تتجنب أن تسيء لأحد اخوانك أو أحد المتعاملين معك في العمل بحجة أنك صائم ، على العكس " فإن سابه أحدا أو قاتله فليقل إني صائم
ولا تنظر لفترة العمل على انها ضياع لفرص الطاعة في رمضان ، فلو أديت عملك وانت مخلص النية فيه لله عز وجل فإن الله عز وجل سيحصي لك كل دقيقة في هذا العمل على انها أجر وثواب في ميزان حسناتك إن شاء الله

احرص على صلاة الظهر في جماعة فلا تؤجلها لحين العودة من العمل
وهذا الكلام في العمل ينطبق على الرجال ، أما النساء فماذا يفعلن في هذا الوقت

النساء يجب في هذا الوقت أن تهتم بإعداد طعام الإفطار حتى تفرغ الوقت الذي بعد العصر إلى أعمال هامة سيتم ذكرها إن شاء الله

ويجب أن تنتبه إلى بعض الملاحظات عند إعدادها للطعام

الملاحظة الأولى : عليها أثناء إعدادها للطعام أن تأخذ نية إفطار الصائمين ، فإن أخذت هذه النية فسوف يعطها الله عز وجل مثل أجر هؤلاء الصائمين الذين أطعمتهم .

الملاحظة الثانية : الطعام وسيلة نتقوى بها على طاعة الله عز وجل وليس غاية نعيش لها ، فلا داعي للتكلف والمبالغة في الأصناف .

الملاحظة الثالثة : يجب أن تحاول الأسرة أن تكفي بعض الأسر التي حولها في الطعام ولو ليوم واحد في الشهر أو أكثر إن كانت تستطيع ، ويجب أن تشارك في إعداده الأسرة كلها ، ليشعروا بحب العطاء والبذل والفرح بإطعام المساكين ، وتذكرة الأبناء بالأجر الجزيل الذي يعطيه الله لإطعام الفقراء والصائمين .

الملاحظة الرابعة : أن تحاول المرأة قضاء هذه الفترة في عمل مفيد إلى جوار إعداد الطعام ، مثل : الاستماع إلى محاضرة أو إلى قرآن أو تشغل نفسها بذكر الله أثناء التحضير

المحطة الخامسة : من بعد العمل حتى العصر .. فترة القيلولة

والقيلولة سنة دعا إليها الرسول صلى الله عليه وسلم " قيلو فإن الشياطين لا تقيل " صدق رسول الله صلى الله عليه وسلم

المحطة السادسة : من العصر إلى المغرب

تفتح هذه المحطة بصلاة العصر وصلاة العصر هي إحدى البردين اللذين ذكرهم الرسول صلى الله عليه وسلم في الحديث " من صلى البردين دخل الجنة " صدق رسول الله صلى الله عليه وسلم

بعد صلاة العصر يستحب تنظيم لقاء يومي للأسرة تجتمع فيه الأسرة بكاملها لتدارس القرآن الكريم والشرع ، يبدأ اللقاء بتلاوة القرآن الكريم ، وبعض الروايات عن سيرة الرسول صلى الله عليه وسلم أو الصحابة أو التاريخ الإسلامي ، أو إعداد مسابقات إسلامية ، والاجتماع على أذكار المساء ، والدعاء والتأمين على هذا الدعاء

فهذه اللقاءات

تقطع مسافات إيجابية واسعة جدا في تربية الأبناء بصورة تلقائية
تذيب الخلافات التي قد تنشأ بين الزوجين

تشد الملائكة إلى البيت

تطرد هذه اللقاءات الشياطين من البيت

المحطة السابعة : من المغرب إلى العشاء

الفطر .. هي لحظة من لحظات الفرح التي ذكرها الرسول صلى الله عليه وسلم عندما قال " وللصائم فرحتان يفرحهما إذا أفطر فرح بفطره وإذا لقي ربه فرح بصومه " صدق رسول الله صلى الله عليه وسلم
وهناك أيضا فرح ثاني بالدعاء المتقبل أثناء هذا الإفطار ، الرسول عليه الصلاة والسلام يقول " إن للصائم عند فطره لدعوة لا ترد " ، وكان يبدأ افطاره صلى الله عليه وسلم بقوله " ذهب الظمأ وابتلت العروق وثبت الأجر إن شاء الله " ، وكان عبد الله بن عمرو بن العاص يقول " اللهم إني أسألك برحمتك التي وسعت كل شيء أن تغفرلي ، آمين "
ويجب أن تصلي صلاة المغرب في جماعة

المحطة الثامنة : صلاة العشاء والقيام

اختيار المسجد الذي تصلي فيه القيام : صلي في مسجد يختم القرآن كاملا في رمضان
أن يكون المسجد قريبا من المنزل

اذهب إلى المسجد مع الاخوة والاصدقاء كوسيلة للدعوة والتحفيز على الصلاة بجزء كامل في الليلة

على الأخوات الذهاب إلى المسجد دون أطفال لعدم التشويش على المصلين

وأثناء الصلاة حاول قدر المستطاع أن تتفكر وتتدبر في كل كلمة يقرؤها الإمام ، والتركيز في الدرس الذي بين التراويح لانه من مجالس العلم المشهوده

المحطة التاسعة : من بعد القيام إلى النوم

هذه الفترة يمكن أن تقضي في طعام لا إسراف فيه إذا كان لم يفطر إفطار كاملا بعد المغرب وإما أن تقضى في مذاكرة .. للطلاب .. ، وإما في استكمال ورد قرآني أو ذكر فائت في أثناء اليوم ، أو في متابعة لشئون الأسرة أو في صلة أو .... أو .......... .

المحطة العاشرة : النوم

فهي محطة هامة إذا أخذت فيها نية فينقلب هذا النوم إللى عبادة والنية هي نية التقوي على العبادة ، تنام لكي تستطيع أن تقوم وتصلي صلاة قيام الليل في آخر الليل وتصلي صلاة الفجر وتصوم بلا إرهاق في اليوم الثاني
ويجب أن تأخذ في نومك هذا الهيئة التي كان ينام بها الرسول صلى الله عليه وسلم .. كان ينام على طهارة ويضجع على شقه الأيمن وكان يقول أذكار النوم قبل نومه صلى الله عليه وسلم

وهذا الجدول المليء بالفقرات والأعمال لا يتبقى فيه شيء للتليفزيوووووون
ملحوظة : طبعا مش محتاجة أقول إن أي حد عايز ياخد الكلام ده يوديه في أي حتة يتفضل من غير استئذان
وكل سنة وانت صايمين وكويسين
:)

.. الليلة الأولى من رمضان


كل سنة والجميع بخييييييير .. بكره ان شاء الله أول يوم في رمضان

والنهاردة هيكون فيه أول جزئين من تفريغ شريط الشيخ راغب السرجاني

الجزء الأول .. الليلة الأولى من رمضان .. آخر يوم في شعبان .. النهاردة يعني

الجزء الثاني .. برنامج اليوم والليلة في كل يوم من أيام رمضان

اسيبكم انا بقى وابطل رغي

كل سنة وانتم طيبين

...........


أولا : الليلة الأولى من رمضان – آخر يوم في شهر شعبان

هناك 5 أشياء لابد أن تعمل في هذه الليلة

أولا : أنظر إلى الهلال وأدعوا بدعاء الرسول صلى الله عليه وسلم " اللهم أهلله علينا باليمن والإيمان والسلامة والإسلام ربي وربك الله " صدق رسول الله صلى الله عليه وسلم

ثانيا : تواصل مع كل من تعرف راسلهم وتبادل التهاني معهم بالإتصال او رسائل المحمول أو أي شيء ويجب ألا يكون هذا الإتصال إجراءا روتيني لمجرد التهنئة ولكن حاول أن ترفع من همة من تتحدث معه للصيام والقيام والدعاء

ثالثا : قدر ما تستطيع حاول إدخال السرور على الأطفال في البيت مثل تعليق الزينات وإعطاء الأموال ليرتبط معهم رمضان بالخير فلا يرتبط فقط بتعب الصيام

رابعا : قيام الليل – صلاة التراويح – في أول ليلة من ليالي رمضان – آخر يوم من شعبان
خامسا : استجماع نيات هامة جدا لبداية شهر رمضان .. مثل
النية الأولى .. نية الصيام : أن تأخذ نية صيام الغد وبعض الفقهاء أجازوا أن تأخذ نية صيام الشهر بكامله

النية الثانية .. نية العودة الكاملة لله عز وجل – توبة كاملة من كل الذنوب صغائر وكبائر - : والتوبة هي .. الإقلاع عن الذنب ، ندم على هذا الذنب ، عزم على عدم العودة لهذا الذنب مرة أخرى .
وإن كان في حق أحد الناس فترد هذا الحق لصاحبه

النية الثالثة .. نية الترقي في العبادة : يجب أن يكون عندنا همة أن يكون عندك علوا دائم في العبادة مع الله عز وجل .. يجب أن تكون عبادتنا في رمضان مختلفة عن عبادتنا قبل رمضان .. نترقى في أمور القيام والدعاء والذكر وغير ذلك من أنواع العبادات

النية الرابعة .. نية تعميق جذور الأخوة بيننا وبين المسلمين : صلة الأرحام وإصلاح ذات البين

النية الخامسة .. التفكير في كم واحد سأدعوه إلى الله عز وجل في هذا الشهر الكريم : حاول أن تكون سببا في هداية بعض الناس إلى الله عز وجل في هذا الشهر .. وإن يهدي الله بك رجلا واحدا خير لك من حمر النعم

الشيء السادس الذي لا يجب عليك فعله في الليلة الأولى من رمضان .. الجدال المعتاد حول رؤية الهلال
وكل عام وأنتم بخير

.. رمضان جانا


حالو يا حالو رمضان كريم يا حالو حل الكيس وادينا بقشيش لا نروح ما نجيش يا حالو

نفسي انزل الشارع اوي والعب بالفانوس هموووووت كده واعملها .. المشكلة انها ممكن تضرب في دماغي جدا واعملها .. ربنا يستر


:)

رمضان جيه يا ناااااااس .. كل سنة وانتم طيبين وكلكم بخير وسعادة

وكل عام وأنتم إلى الله أقرب

رمضان جانا وأنا لسه بصراحه مش عارفه البلوج في رمضان هتبقى عامله إزاي .. كل اللي أعرفه إني هحاول بإذن الله إن كل يوم يكون فيها حاجة .. إن شاء الله بإذن الله هيكون فيها متابعة يومية على السريع كده .. لسه زي ما قولت مش عارفه هتمشي إزاي أو بإيه

بس هتبدأ ان شاء الله بتفريغ لشريط يومك في رمضان للشيخ راغب السرجاني واللي متقسم ل6 أجزاء .. فهيكون كبير عشان كده اعتقد ان التفريغ هو كمان هيكون متجزأ عشان ما يبقاش ملخبط .. واتمنى ان تفريغي للشريط مايكونش ملخبط ولا ممل

استنوه بجد شريط جامد آخر حاجة ومنظم يوم رمضان جدا

والنهاردة بقى هسيبكم مع أغاني رمضان الجامدة بتاعة زماااااااان اللي كنا بنسمعها وإحنا صغنتتين

:)

كل سنة وانتم طيبين
ورمضاااااااااااااان كريييييييم















Saturday, August 30, 2008

.. ميرو الكبيرة



كل ما أدخل ألاقيها مش عملت حاجة لعيد ميلادها .. كل مأدخل مالاقيش حاجة .. كل ما أدخل مالاقيش حاجة .. فماعرفتش اسكت بصراحه .. وبعدين مش كفاية اننا ماعرفناش نعملها عيد ميلاد عشان رمضان - كل سنة وانتم طيبين - .. ماخدتش مننا غير هابي بيرث داي على طريق مصر اسكندرية وبصوت واطي كمان
ششششششششششش ايه الرغي ده .. من الآخر ده عيد ميلاد حبيبة قلبي ميرو النيرو كوانيرو
ميرو يا حبي انتي عارفه اني مش بعرف احضر لاعياد الميلاد والحركات دي بس اهو حاجة كده على ما قُسم قبل رمضان

حادي بادي يويو .. حادي بادي يويو .. حادي بادي يويو ميرو .. حادي بادي يويو



ياللا حالا بالا بالا حيوا أبو الفصاد هيكون عيد ميلاده امبارح أسعد الأعياد .. فليحيا أبو الفصاد .. هييييييييييه

هابي بيرث داي تو يو .. هابي بيرث داي تو يو .. هابي بيرث داي تو ميرو .. هابي بيرث داي تو يو .. سنة حلوة يا جميل .. سنة حلوة يا جميل .. سنة حلوة يا ميرو .. سنة حلوة يا جميل .. هفففففففففففففف

:)


و بما انه عيد ميلاد ميرو النيرو كوانيرو فشرط اساسي ان تكون كل التورتات شيكولاتة وإلا تضربنا بالنار

تنبيه هااااام .. التورتات دي للي هيجيب هدية اللي مش هيجيب ما يمدش إيده منعا للإحراج

:)






شوفتي كتير ازاي .. ابقي ابعتي واحدة بقى بلاش طفاسه

نبعد عن الأكل بقى ونشوف الهدايا الكتير اللي انا دفعت فيها دم قلبي

:)


آدي يا ستي الألوان اللي كنتي عايزاها عشان تبهدلي بيها حيطة الأوضه اللي لسه متبيضه .. شخبطي ولوني وبهدلي الدنيا براحتك






وهنا بقى نوسع لحبيبة قلبها وحياتها وعمرها وعشقها وكل حاجة .. سنيكرز الغالية ام فلوس كتير واللي هي مضيعة عليها فلوسها أول بأول


كان نفسي أجيبلك مج بس مش لقيت مج شكله امور .. فاضطريت اعمل واحد عموله

:)


صحيح الصناديق دي بقى انا ماعرفش إيه الحاجات الكتير اللي فيها دي بس شكلها عجبني .. وانا مالي وانا مالي على رأي ميرو



كل سنة وانتي طيبة يا ميرو يا حبي وعقبال مليووووووون سنة .. ويارب السنة الجاية تكون سنة جامدة آآآآآآآآخر حاجة وتعملي فيها كل اللي نفسك فيه .. كل سنة وانتي طيبة يا أجمل ميرو في الدنيا وأحلى حاجة في حياتي

يلا كل الناس تروح تقول لميرو حبيبتي كل سنة وهي طيبة

:)


Tuesday, August 26, 2008

.. رايحة لحبيبتي عند حبيبتي


تك تك تك .. ياللي هنا
انا قولت اقولكم في السريع إني هغيب عنكم يومين ثلاثة كده .. أصلي مسافرة .. أيوووووون مسافرة .. هاخد أجازة يومين كده من القاهرة .. آخر أجازة ممكن اهربها من القاهرة قبل رمضان والدراسة .. هروح اسكندرية لميرو واجيبها واجي ان شاء الله .. وبما إني رايحة لميرو ورايحالها اسكندرية ابقى قولت صح .. رايحة لحبيبتي عند حبيبتي
يلا اسيبكم انا بقى واشوفكم على خير إن شاء الله .. خلوا بالكم من بعض
سلااااااااااام

Saturday, August 23, 2008

.. غريييييييييق


يختيييييي .. يالهوووووي .. الحقوناااااااا .. بنتيييييي .. عبييييييييير
لالا .. خالص ماحدش يتخض .. دي عبير غرقت .. عبير دي أنا أيووون .. أنا عبير غرقت .. قصدي كنت بغرق .. البحر كان عايزني في موضوع كده بس رجع في كلامه .. استنوا أما أحكيلكم من الأول .. مانتوا عارفيني رغاية ..
أنا بقالي فترة بتاع كام سنة كده كل علاقتي بالبحر هي الفرجة والتمشية وبس .. يعني مابقيتش بنزل البحر زي زمان .. احيانا أنزل آخر يوم أو أخر يومين مثلا بالكتير أوي ..
وفعلا كالعادة جيت في اليوم اللي قبل الأخير وقولت هنزل بناء على رغبة الجماهير .. ونزلت وعادي جدا الحياة تمام التمام .. ومرة من المرات غطست وبرضو عادي جدا بعملها كتير .. وفجأة قومت وإني ألاقي أرض تحت رجلي أبداااااااااااا .. الأرض حلفت ماهي راجعة تحت رجلي تاني .. وعينكم ماتشوف إلا المياااااااا .. مفيش أي حاجة في الحياة غير الميا .. مع إني من ثواني بس كنت واقفه وسط ناس كتييييير ماما وبابا وأصحاب بابا والناس اللي معانا في البحر .. وفجأة بخ مفيش .. مفيش غيري أنا والميا أو بمعنى أصح أنا وتحت الميا .. وبدأ المشهد الأخير واللي كان هيبقى مشهد النهاية – بعيد عنكم – ماما ندهت على بابا عشان يجيبني على اساس إني بعدت عنهم وواضح اني مش طايله ارض .. كالعادي يعني بتحصل كتير حد فينا يدخل جوا أوي ومايلاقيش أرض تحت رجله وبابا يجيبه وبنخلص .. إلااااااا المرة دي .. بابا دخل عشان يجيبني بقى هوا اللي ورايا وبرضو مفيش أرض بس بالنسبة له هو مش مشكلة هو بيعرف يعوم .. الفكرة كلها إن مفيش أرض عشان يقف عليها عشان يتحكم فيا وأنا طالعة نازلة كده .. وفضلت أنا طالعة نازلة كده والدنيا من حواليا مقلوبة .. وعكس كل الناس مافقدتش الوعي خااااالص اللي هو هموت وانا فايقه وحاسه بكل اللي بيحصل حواليا .. فضلت أنزل للآآآآآآآخر وأضرب رجلي في الأرض وأطلع أخد النفس اللي ألحقه وأغرق تاني قبل ما يكمل وكل اللي حواليا ماحدش عارف يوصلي .. كل اللي ييجي عندي يتحول ويبقى ورايا ويبقى هو اللي عايز اللي ينقذه .. وفضلت في الطلوع والنزول ده لغااااية ماخلاص قفلت معايا وحسيت أنها انتهت ويادوب فاضلي غطستين كمان في الطلوع والنزول اللي انا فيه ده وخلصت .. لإني خلاص تعبت ومش قادرة اطلع تاني ومابقيتش اوصل لفوق عشان اخد نفسي .. - حتى ماما وهي بتحكيلي بعد ما خرجت قالتلي إني بعد ما طلعت ونزلت كام مرة بدإت حركتي تقل وراسي رجعت ورا وهي قالت خلاص - .. وفعلا اتشاهدت واستسلمت للأمر الواقع .. وزي ما يكونوا مستنييني أتشاهد والكل وصل عندي وخرجوني .. وأمي ياعين أمها كانت هتموت من الخضه وبابا وشه كان أصفرررررر كل ده من الخضه ده غير موتهم اللي بجد اللي كان هيبقى غرق بسببي برضو هما الاتنين واتنين تانيين من أصحاب بابا كمان .. وخرجت ولقيت الشاطئ مقلوب وكنت انا نجم غلاف أخبار الغرقانين في اليوم ده

بس أنا اللي من ساعة ما خرجت وأنا كل ما افتكر اللي حصل أضحك مش عارفه على إيه بالظبط .. المشكلة إني مش عارفه أوصف بالظبط الحوار كان عامل إزاي .. أنا أصلا بالنسبة لي أول مرة أغرق .. ما حصلتليش قبل كده ولاااااااااا مرة .. فالموضوع بالنسبة لي كان غريب .. وف نفس ذات الوقت خلاني أخدت بالي من حاجات عجيبة استغربتها جدا .. زي إني فاكره تقريبا إني ماتخضيتش إلا في الأول أما مالاقيتش الأرض تحت رجلي وبدأت أحاول أطلع أخد نفسي .. لكن أما الموضوع طول وماحدش عارف يوصلي وحسيت إني خلاص مش قادرة أعافر عشان أخد نفسي تاني بدأت أسالم وعادي .. مع إني اسمع ان الناس أما بتبقى بتغرق وبتحس إنها خلاص هتموت بتحاول تمسك في أي أمل وتمسك في الحياة بإيدها واسنانها .. انا فاكرة جدا إن بابا أول ما قرب مني لقيت التي شيرت بتاعه في ايدي مش ايده وافتكرت بسرعة كلام الناس عن ان قوة الواحد وهو بيغرق ممكن تغرق اللي بينقذه لو مسك فيه فجأة او غلط فسيبته بسرعة .. حاجة كمان إني أول ما خلاص اتشاهدت وخلصت معايا وقولت هموت مافرقش معايا في الدنيا غير الناس اللي بحبهم وهيزعلوا عليا ماحسيتش بخوف اللي سايب الدنيا أد ما جه في بالي زعل الناس اللي بحبهم بسببي وعليا
هو أنا مش طبيعية ولا إيه !! .. والله ماعرف بس ده اللي حصل .. أنا كمان اما فكرت فيها أما طلعت استغربت أوي إني مامسكتش في الحياة ولا حاولت أطلع إلا عشان اللي بحبهم وحزنهم وبس .. طب وأنا ؟ علاقتي أنا بالحياة ؟ ........... مش عارفه
ما علينا .. المهم اني رجعت تاني اهوه ولسه مزهقاكم وقاعده على قلوبكم
:)
بس فيه حاجة تانية شغلت بالي في حسابات الواحد مع نفسه بعد ما بيتكتبله عمر جديد
الحاجة هي .. يا ترى اللي حصلي ده كانت رسالة من ربنا عشان أمشي في حياتي في الطريق الصح ومارجعش منه ابدا وبيفوقني بيه .. ولا ذنوبي كتيرة وربنا مش عايزني اقابله بيها فبيخفها عني باللي شوفته في اليوم ده .. طبعا السؤال ده ماعرفتش اجاوبه وماحدش يعلم إجابته غير ربنا سبحانه وتعالى .. بس انا شايفه ان في كلتا الحالتين ربنا بيحبني .. إن كان بيفوقني عشان افضل اعمل الصح فهو أكيد بيحبني .. وان بيخفف عني اللي ممكن اكون شايلاه من ذنوب .. فبرضه اكيد بيحبني ان شاء الله يعني .. اكيد دي اكبر أمنية في حياة الواحد مننا
طولت عليكم انا جااااااامد .. بس عشان يمكن يكون آخر بوست قبل رمضان
كل سنة وكلكم بألف خير وصحة وسعادة
رمضاااااااااان كرييييييييم

Monday, August 18, 2008

هو أنا اتجننت ولا إيه ؟


..! هو أنا اتجننت ولا إيه ؟

فجأة سألت نفسي السؤال ده .. أول ماعرفت أبطل ضحك
حاجة مهببه أوي إن البني آدم يبقى موودي - حاجة كده مزاج رايح ومزاج جاي .. متقلب الأمزجه يعني - ويتحكم فيه موود مالهوش أي سبب .. يعني أبقى في المصيف - والمفروض إن دي حاجة كويسه - بحر وسما ورمل وعيشة بقى .. حاجة كده تغيير جو وبتاع .. وفجأة أقلب على كل حاجة و على كل حد وطبعا عليا أنا شخصيا .. ليه وعشان إيه اللي حصل ؟؟؟؟ ولا أعرف
أسكت خالص وماكلمش حد وأقعد لوحدي عشان ماحدش يكلمني وأشوط فيه طبعا .. يخرجوا كلهم وأنا أقعد لوحدي ومارضاش أنزل ولا أرد على حد .. وأنزل لوحدي وأقعد لوحدي وأتمشى لوحدي .. ويحاولوا يكلموني مابكلمش حد
وفجأة برضو فجأة يتكلموا معايا فاتكلم واتريق واهزر واضحك واضحكهم كلهم ومانبقاش قادرين نبطل ضحك .. وده اللي خلاني أسأل أنا اتجننت ولا إيه ؟
جاتلي حالة ضحك هستيرية .. حتى من كتر ما ضحكت وضحكتمهم ماما قالتلي إيييييه هي الحالة بتيجي إمتى .. أمال إيه الوش اللي كنتي بيه من شويه ده .. يا مجنونة - بلاش الباقي بقى خليه بينا - كفاية يا مجنونة
ناس كتير بتقول إن علم النفس بيقول برضو إن البني آدم هو اللي بيعمل في نفسه كده ويقولك انا كده انا موودي
بس أنا والله مش بقصد أعمل كده .. دي حالة بتنزل عليا فجأة ومابعرفش أخرج منها .. بتييجي لوحدها وتروح لوحدها من غير سبب اساسا
طب إيه بقى هفضل كده على طول ؟ ! فجأة أتكتم وأنكد على كل اللي حواليا واقفش عليهم وعلى كل حاجة وأولهم أنا
وفجأة برضو أضحك وأهزر واطنطت .. ده جنان ده ولا إيه - على رأي سيد بتاع تامر وشوقية - عايزة أعرف حللللللللللللل .. قبل ما يسلموا فعلا بإني مجنونة ويودوني حتة كده ولا كده
:) :)
وعلى فكرة ربنا ما يكتب عليكم انكم تعاشروا حد موودي .. دي عالم رخمة
:) :)

Thursday, August 14, 2008

.. وإياك تكون زيهم وتروح وتجرحنا




نتحدث عبر الهاتف كعادتنا كل ليلة نحكي ونضحك كأي يوم من الأيام .. وفجأة إذا بها تتحدث عن الموت وعن شعورها بإقترابه منها في هذه الأيام .. فما كان مني إلا أنني أكملت حديثنا كما كان وكما تعودنا الخروج من لحظات الصمت والكآبه بالضحك والسخرية من بعضنا البعض .. ولكن ما فعلته هذا لم يكن هو ما بداخلي .. وما فعلته إلا لأخرجها من هذه اللحظات الصعبة .. ولكن ما بداخلي فكان بداخلي .. فكلامها وخوفي وقلقي عليها جعلوني أشعر بالإنقباض حتى أنني شعرت للحظات وكأنني لا أستطيع التنفس .. نعم .. فكيف أتنفس وكيف هي الحياة بدونها .. وكيف تكون حياتي أنا بدونها ..
!!!! حياتي ؟
أي حياة ؟!! فهل لي حياة بدونها أو حياة هي خارج محيطها ؟
فكيف وهي التي ترسم ملامح حياتي .. فلا أستطيع تحديد ملامحها بدونها
هل من الممكن أن يمر يوما دون أن أكلمها ؟
دون أن أتحدث إليها واشكو لها ما أعاني ؟
دون أن تقاسمني أفراحي ولحظات سعادتي ؟
فكيف لي هذا ؟
ها انا أجلس أمام البحر أستمع إلى الأغاني - من الإم بي ثري بتاعها - تبدأ الأغنية التي أهدتني إياها في عيد ميلادي.. عيد ميلادي الذي فاجأتني به وبترتيبها له بمفردها
ها هي الأغنية تبدأ وتبدأ معها دموعي في الإنهمار دون مناسبة غير تذكرها مع الأغنية وتذكر كلامها الذي جعلني أخاف رحيلها وبعدها عني

أعرف أن بإقتراب شهر رمضان ولحبنا لهذا الشهر يبدأ يراودنا الخوف من عدم تبليغنا هذا الشهر الكريم .. أعرف أن هذا الشعور وهذه الحالة يمر بها الكثير منا في هذا الوقت من السنة وقد مررت أنا بها من قبل .. ولكن لا أستطيع منع نفسي من القلق عليها .. فمجرد تخيلي للأمر يرعبني
فتخيلي لحياتي بدونها لا يكتمل .. كلامها جعلني أسرح في تخيل حياتي بدونها ولكني لم أستطع .. فهي مجرد بداية وينقطع التخيل عن وجود حياة من الأساس .. فالإحساس الأكيد بداخلي هو أن بتوقف حياتها - بعد الشر بعد الشر بعد الشر عليها - تتوقف حياتي إلى الأبد ..
!! فكيف لي أن أحيا بدون حياتي
...............

بننجرح كل يوم لكن بيفرحنا إن انت جوا القلب ساكن في أفراحنا .. وانت الأمل في العيون والنشوة ساعة الجنون ..
وإياك تكون زيهم وتروح وتجرحنا .. ده انت الوحيد منهم تقدر تريحنا

دي على فكرة يا ميرو يا حبي الأغنية اللي كنت بقولك إني كل ما بسمعها مش بييجي في بالي حد غيرك
ربنا يخليكي ليا يا حبي وما يحرمنيش منك أبدا أبدا أبدا



.. حل الفزورة


بعد حيرة طويلة وفشل زريع ما شاء الله مننا كلنا في إننا نعرف ما هي الشكاكات اللي كان عايزها الطفل يكون حل الفزورة كما قال صديقي العزيز السوسا :) .. محمد ناجح .. إبن مصر والوحيد اللي عرفها
الشكاكات يا إخواني هي علب الكبريت وعلبة الكبريت هي الشكاكة بعيد عنكم ..
ويعني إيه شكاكة ولا ليه شكاكة .. قال إيه عشان اما بييجوا يولعوا الكبريت بيعمل شششششك .. - ده كان تحليل طنط أما ماما سألتها ليه شكاكة - .. تسميه سمعيه يعني
:) :) :) :)


يلا ربنا ما يكتب على عيالنا
أنا شخصيا قولت إبر أو دبابيس .. هنقول إيه بقى جهل بالشكاكات

Monday, August 11, 2008

فزورة من غير رمضان


أنا عارفه ان الجديد اللي كان المفروض ينزل هو توابع المصيف بس زي مانتوا عارفين ساعات بقابل حاجات عجيبة بتشدني مابعرفش اسكت وماقولهاش .. المرة دي بقى موقف انا هقلبهولكم فزورة .. اقولكم الموقف الأول
الموقف بصراحه مش انا اللي شوفته دي ماما ورجعت عملتهولي فزورة زي مانا هعمل فيكم كده بالظبط
:)
ماما واقفه في السوبر ماركت لا بيها ولا عليها بتشتري شوية حاجات .. ودخل ولد صغير مش باين من الأرض ونده على طنط بتاعة السوبر ماركت واداها 50 قرش وقالها طنط عايز 5 شكاكات .. وبالطبيعي أمي بصتله باستغراب ومش فاهمه هو عايز ايه .. وبالمش طبيعي ان طنط دي اخدت من ايده الفلوس وادته اللي هو عايزة فعلا .. ده بعد ما ماما سألتها ايه الشكاكات دي وطنط استغربت وازبهلت ان ماما مش عارفه ايه هي الشكاكات
ورجعت ماما طلعته عليا انا وعملتلي فوازير قبل رمضان .. وانا طبعا ولا انا هنا إذا كانت هي ماعرفتش ايه هي الشكاكات هعرف انا ؟ وبعد ماعذبتني شويتين تلاته قالتلي ايه هي الشكاكات وبقى معايا لغة
:)
دلوقتي بقى الدور عليكم كل حد هيدخل هيقولي ايه هي الشكاكات بس بالأمانه كده ومن غير غش .. يعني ماحدش يقوم يسألي اللي حواليه وييجي يقولي .. انا عايزة اعرف فعلا فيه حد يعرف إيه هي الشكاكات ولا لأ .. فكل واحد يكتبلي اول حاجة تيجي في باله من غير ما يبص على إجابة زميله وعلى رأي أخونا اللمبي - بص ف ورقتك - يلا عايزة اشووووووووف
طفل معاه 50 قرش وعايز 5 شكاكات .. ما هي الشكاكات ؟؟؟؟

Sunday, August 10, 2008

.. عـُدنااااااااا

أنا رجعت يا نااااااااااس .. مع إني ماكنتش راجعة وكانت هتبقى .. عبير غرقت يانااااااااااس .. بس الحمد لله ربنا ستر
هسيبكم مع كام صورة كده للمصيف لغاية ما أظبط الجديد ويكون النت هو كمان اتظبط
انا بس حبيت أقولكم إني جيت وانكم وحشتوني موووووووووت