ابن المكان

عندما رأيته للمره الأولى وجلست معه .. بعد دقائق قليلة شعرت وكأني أعرفه من قبل .. نعم لقد رأيته قبل هذه المرة .. هي نفس الملامح التي عايشتها في روايات تتحدث عن وسط البلد وناسها .. إنه أحد هؤلاء الشباب أيقونات وسط البلد الثورية .. شاب نحيل الجسد .. خمري اللون .. ليس بقصير ولا طويل .. كأغلبنا .. شاب مصري 100 % .. حاد الملامح .. سريع الكلام .. ليس من أهل القاهرة ولا من الريف..  هو شاب سكندري، وهذا - بالنسبة لي - يزيد من وضوح ملامح الشخصية وثباتها في رأسي - فأنا تربطني علاقة غريبة بالأسكندرية وناسها .. أفسرها دائما بأني من المؤكد في حياة أخرى كنت سكندرية - ..
هو الشاب الذي يتناول طعامة على المقهى بينما ينتظر أصدقائه وكأنه في بيته .. شخصية تستطيع أن تقول عنها " ابن المكان الذي يتواجد به " .. تراه على مقهى .. تراه في مظاهرة .. تراه على الكورنيش .. كل مكان ستجده به ستشعر وكأنه جزء من هذا المكان .. شخصية تراها مرة واحدة وتعلق برأسك لانك تعتبرها إحدى ملامح هذه البلد
.......
سلسلة ناس الوطن .. يمكن تكون ابتدت بيه وهتكمل وتجيب ناس كتييير .. ويمكن تكون ابتدت بيه وانتهت خلاص .. هنشوف

وما تبقى ..... ابتسامة

كانوا جالسين متجاورين على أريكة في منتصف الغرفة يشاهدان ذكرياتهما معا من صور ورسائل .. وهي تسند رأسها على كتفه .. كان يتصفح رسائلهم القديمة بينما هي شاردة فيما تشعر به الآن من إحساس رائع بالأمان والراحة اللانهائية لمجرد وجودها إلى جواره تسند رأسها على كتفه  .. ولكن بقليل من التركيز - الذي لا تعرف سببه - سرعان ما وجدت الأشياء تختلف من حولها .. فهذا ليس بيت جديد .. وهي لا تلبس أي خاتم يدل على زواجهما ويضمن وجودهما معا للأبد .. فأخذت تركز أكثر وأكثر إلى أن أفاقت تماما لتجد نفسها نائمة في سريرها في بيت والدها بلا أي خواتم أيضا .. ولكن بابتسامة واسعة استطاعت أن تخطفها من الحلم لحظة وجودها معه قبل أن تستيقظ  ..

listen..

أما تفضل فترة بتسمع ومش بتتكلم .. فيتعودوا على سكوتك وكلامهم .. فتيجي تتكلم ................................ تلاقيهم مابقوش بيسمعوا

هدية .. وبابا نويل .. وانتظار طويل

مع بداية كل عام كانت تنتظر بابا نويل مثل الأطفال في افلام رأس السنة التي تعشقها .. كانت تنتظره وتنتظر منه أن يأتيها بهدية .. لا يهم إن كانت صغيرة أو متناهية الصغر ولكنها تحمل بهجة وإشراق العيد ..
وتمر السنوات ولا يأتي بابا نويل ولا يحدث أي شيء يبهج كالعيد لدى الصغار .. ولكنها ظلت منتظرة .. حتى أتى يوم ووجدت أنها أصبحت تحتاج إلى حدث كبير يغير الحياة .. ماعادت هدية بابا نويل الصغيرة تجدي نفعا - إذا أتت - .. ف الغم والهم والملل تركوا عليها الكثير من الرواسب الكبيرة المتراكمة منذ سنين طويلة والتي لن تستطيع الأشياء الصغيرة المفرحة أن تمحيها .. من الممكن أن تتخللها أو ترسم عليها ابتسامة صغيرة سريعة الاختفاء .. ولكنها في أشد الحاجة إلى فرحة كبيرة تقشر طبقات الحزن وتزيله .. فهي تحتاج أن ترى نفسها من جديد .. لا تريد أن تقف كثيرا أمام المرآة على أمل أن تلمح فيها نظرة تعرفها فتبدأ بالتعرف على نفسها وعلى أن الشيء الذي تراه ماهو إلا إنعكاس صورتها في المرآه

  

رسالة مبدئية للرئيس الجديد

النهاردة ولأول مره في تاريخ هذا البلد .. اليوم الاول في حياة بلدنا العزيز برئيس منتخب ..
ايها الرئيس اللي انا مانتخبتوش لا جولة أولى ولا جولة تانية - وطبعا مانتخبتش خصمه - .. يمكن انا مش مستنيه منك لمستك السحرية التي تحيل بلدنا من العدم إلى الرخاء .. ولكن مش مستنيه منك برضو إنك تكون زي اللي قبلك .. مش مستنيه منك لا ظلم ولا فساد ولا قهر .. انت جيت بعد الميدان وهتتحاسب م الميدان ..
وفيه حاجة كمان مهمة بالنسبة لنفسيتي اوي الله يكرمك ..
 مش عايزة اشوف صورتك في حتة مش عشان انا مش عايزة اشوفك لا سمح الله  بس عشان لازم نخلص من فيلم الآلهه والاباء الرؤساء وكده .. حاول تعمل قانون يمنع وجود صورك في كل حتة .. مش عايزة اشوفك في مدرسة ولا في مشهد من فيلم متعلق ورا الظابط  ولا في مستشفى ولا على اعلان كبييييييييييييير شكر وعرفان لكوبري افتتحته ..
 وقولهم يرحمونا في نشرة الاخبار والصفحة الاولى ف الجرايد من السيد الرئيس قام بافتتاح عربيته الجديدة والرغي ده ..  ارحمونا بقى
ايها الرئيس .. قالوا انك من الثورة .. وان نجاحك هو انتصار الثورة .. ف مستنيه منك قرارات تخصنا .. لازم أولها وأهمها خروج اخواتنا المعتقلين اللي مانعرفش عنهم حاجة .. مستنيين منك حق الشهدا اللي كانوا السبب ف انك تكون رئيس البلد دي .. هما اصحاب البلد الأصليين
أيها الرئيس الجديد .. ربنااااااا يستتتترررررررر

علامات

كانوا يتحدثون عن العلامات وكانت تشرح له كيف اقترنت العلامات في حياتها بأشياء سيئة أو كتحذير من أشياء سيئة فقط ولذا أصبحت تخاف العلامات .. ظلت تحكي في هذا الموضوع دون أن تنتبه إلى أن كل ما فعله وكل ما صدر منه في هذا اليوم دون قصد منه ما هو إلا علامات جيدة .. فعلمت أنها كما قالت ظلمت العلامات في تركيزها على الأشياء السيئة والتحذيرات ..

مرور الموت

عندما يأتي الموت .. يأخذ شخصا من بيننا ويأخذ معه جزءا من روحنا .. حتى إذا كان هذا الشخص ليس بقريب منا .. يمر بنا الموت و نعرف به آخذا جزء من روحنا التي سيأخذها كاملة يوما ما .. ويذهب بهما إلى الأبد ..

!!

كانت تتجول بالبيت وهي مُثقلة بالهموم حتى انها شعرت وكأنها لا تستطيع أن تنقل خطواتها .. وفجأة لم تعد قدماها قادرتان على حملها من ثُقل ما تحمل .. فسقطت على الأرض منفجرة بالبكاء ..
ظلت كثيرا على هذا الوضع ولا أحد يسمع بكاءها أو يشعر بها .. حتى رأته يأتي من الخارج مادّا لها يده .. أخذ بيدها وساعدها على النهوض واحتضنها بقوة .. فشعرت وكأن جميع جراحها تجمعت وأخذت تلتئم بضمته .. 

ثم نظرت حولها من جديد لتجد نفسها في غرفتها على سريرها وكل هذا ما هو إلا .......................... حلم

رأيته ..

 رأيته وأنا أعبر الشارع .. رأيته وبعد سنوات من الفراق ..
رأيته ونظر نحوي .. نظرته اخترقتني ولكن لم تشعرني بأي شيء ..
رأيته وكان كأي شخص يمشي إلى جوارنا ..
شخص لا أعرفه ولا يربط بيننا شيء سوى عبور الشارع ..

ورقة وقلم

انك تمسك ورقة وقلم .. والقلم يفضل يشخبط كلام كتييير لوحده .. - ومهما أقنعت نفسك عندما تنتهي أن ما كتبته ما هو إلا تفاهات وترهات - .. فهي نعمة من الله

مصر فيها كام " عُمَر " ؟

عُمَر .. هكذا كان اسمه .. عُمَر هو خطيب الفتاة صاحبة قضية التحرش في فيلم 678 .. بعيدا عن إن الفيلم كان جامد جدا ومحمد دياب أبدع فيه وماجد الكدواني كان عبقري فيه .. وكل شخصياته عملوه حلو جدا .. ولكن انا النهاردة حديثي عن عُمَر .. بعد مشاهدتي للفيلم كان عُمَر أكتر شخص انا حباه ومحترماه اوي - طبعا عمر بتاع مشهد المحكمة اللي رمى كلام الناس ورا ضهره وقرر إن خطيبته من هتتنازل عن قضيتها - .. وعلى أد ما كنت حباه ومحترماه على أد ما خلاني أفكر كتير وأسأل أكتر

" مصر فيها كام عُمَر من بتاع المحكمة ده ؟"
مصر فيها كام عُمَر من اللي وقف جنب حبيبته وساعدها إنها تواجه وماتتنازلش عن حقها ؟
فيه كام عُمَر هيقف في وش الناس ومجتمع غبي ظالم يخسف الحق عشان ينصر المظاهر ؟
فيه كام عُمَر مش هيقولها ما هو انتي السبب ف اللي حصلك ؟ .. ولا خلاص مالكيش نزول من البيت تاني لوحدك ؟
فيه كام واحد هيوافق إن " اخته - أمه - خطيبته - مراته - بنته " تطالب بحقها بصوت عالي؟
فيه كام واحد هيقر إنها مجني عليه مش جاني؟

ودلوقتي بصراحة جدا .. لو انت مكان عمر هتتصرف ازاي ؟
ولو انتي مكان نيللي واتطلب منك تتنازلي عن قضيتك هتعملي إيه ؟


 

قطع ايدك ولسانك وخزء عينك.. كلاكيت تاني مره

قطع إيدك ولسانك وخزء عينك .. كلاكيت تاني مره النهاردة بمناسبة يوم التدوين والزقزقة ضد التحرش

الأيام اللي فاتت قريت كلام كتير من بنات أكتر في حملة " قطع إيدك " .. كل الكلام اللي قريته فكرني بشكلي أما ببقى ماشية لوحدي ف الشارع واللي رسمته وقررته من أول ما بدأت أخرج لوحدي من وأنا في إعدادي مثلا .. وهو مشية عسكري بالخطوة السريعة ووش مكشر غبي - واللي برضو بيبقوا سبب للمعاكسه عاااادي جدا كموضوع جديد يعلق عليه - .. 
 
- فكرني كمان بأمنيتي اني أمشي دايما بعصاية في إيدي والقانون يسمحلي إني احطها في عين أي واحد يبصلي بصة ماتعجبنيش .. 
 
- فكرني بأما كنت ماشية في الشارع من كام يوم وكان نفسي أضرب واحد في محطة المترو بسبب الطريقة اللي كان باصص - أو بمعنى أصح متفحص - بيها البنت اللي ماشية أدامي واللي جابها من فوقها لتحتها لدرجة انه غير من وقفته ولف وراها عشان يكمل فرجه بعد ما هي عدته .. - وعلى فكره كانت محجبه ولابسه لبس طبيعي وعادي وماشية مع مامتها - .. الموضوع عند المتحرش مابقاش زي ماهو عند الناس اللي بيتهموا البنات - إن شوف هي لابسه ايه اصلا .. تستاهل اللي يجرالها - .. لا خالص مابقيتش كده من زمان ..
ده ممكن تلاقيه بيبدأ كلامه بالثناء عليها " محترمة اوي بس .................. وأي كلام زباله بعد كده " .. حتى لو ماكانش كلام فيه قلة أدب فأنا شايفاه تعدي على حقي في اني امشي في الشارع في سلام من غير ما اسمع صوتك المقرف المحمل بكلام متوجهلي أيا كان شكل الكلام .. 
 
- فكرني بإن كلامك الزبالة أو بصتك القذرة بيخلوني حاسه ان دماغي بتغلي وعايزة اقتلك لانك تعديت حدودك وتعديت على حقوقي الشخصية والشخصية زيادة عن اللزوم كمان .. ده أبسط حقوقي في الحياة اني امشي في الشارع براحتي من غير ما حيوان زيك يتخطى حدودي .. 
 
- فكرني بكرهي لاحساس اني محمية من حد تاني أنا من غيره ماليش الحق في المشي في سلام من لسان قذر وعين عايزة تدب فيها رصاصه .. بكره كل حاجة حواليا أما أشوف واحد ناوي على السخافة ويرجع عنها بسرعة لمجرد انه خد باله اني مش لوحدي .. مين قال اني افضل محتاجه وصاية وحماية وحرس عشان امشي في الشارع .. بجد ده شيء مقرف 
 
- فكرني كمان بحنيني وانا ماشيه زي العسكري اني امشي في الشارع بسمع أغاني ومبتسمة للحياة من غير سبب .. ماهو مش شارع أمك 
 
بنوتاتي واخواتي في المعاناة والاعتراض .. في كل اللي قريته الايام اللي فاتت مش معترضة عليكي غير في احساسك بالذنب والضعف .. ما ينفعش يبقى اللي بيتهدر وبيُعتدى عليه ويضيع هو حقي وأنا اللي احس بالذنب والضعف .. إزاي يبقى هو اللي حيوان وأنا اللي آخد على دماغي .. اجمدي وعلي صوتك وخدي حقك انتي مش ضعيفة وليكي حق 
 
أيها الكائن الحيوان .. الشارع لينا مش ليك لوحدك .. احترم نفسك وحاول ترجع بني آدم
 


* الصورة من رسم الفنان أنديل

" زي النهاردة من سنتين .. " خالد سعيد

زي النهاردة من سنتين راح خالد وبدأت شرارة الثورة الأولى
وعشان كده قررت نفتكره مع بعض مع اني مش بنساه ابدا ومعايا في كل الأحداث .. وعمري ما هنسا انه كان اول من نزل الناس الشوارع
وهنا هجمع كل كلمة نزلتها عن خالد من يوم ما اتقتل .. الله يرحمه

لإمتى يا بلد ؟ .. ( شهيد الطوارئ ) مع التحديثات

قومي افتحي لولادك الطيبين قووومي .. ( شهيد الطوارئ ) وقفات يوم 25 / 6

زي بُكرة من سنة خالد اتقتل

الوقفة الصامتة على كوبري قصر النيل في الذكرى السنوية الأولى لخالد سعيد


ودي التدوينة اللي نزلت في كتاب أبجدية إبداع عفوي

 

الذكرى السنوية الأولى لخالد سعيد

عدوا السنتين ومازال غائبا حاضرا في كل أحاديثنا عن الحرية .. ومازالت بداخلي له غلاوة لا أدري لها سببا .. الله يرحمك يا خالد

"للتأريخ .. يوم النطق بالحكم".. شعب لسه فيه الامل

في يوم من الأيام كان عندي أمل كبير .. جت نتيحة الانتخابات وموتته .. ورجع عندي أمل تاني صغير كده قبل النطق بالحكم النهاردة الصبح .. و جه الحكم بالبراءة وموته برضو .. وساعتها قررت ان خلاص مفيش حاجة اسمها امل في البلد دي .. وان الامل في البلد دي سذاجة وغباء .. وجت كل ميادين مصر وناسها وزرعوا فيا امل تاني جديد وخوفوني عليه من اول وجديد .. وعرفوني ان لأ الأمل موجود فيهم وانا اللي كنت فاكراه مات .. طلع لسه زي الاول بالظبط الناس اللي نزلت النهاردة وملت شوارع مصر وميادينها في كل المحافظات مش هيسيبوا حق اللي راح

وشكلها كده زي ما قالت الست فيروز ..
فيه أمل إيه فيه أمل .. أوقات بيطلع من ملل ..