.. عقدة حياتي .. مترو الأنفاق

حقد حقد حقد .. فضلتم تحقدوا عليا عشان مش بصحى بدري لغاية ما صحيت الساعة 6 وربع .. يالهوي أنا أصحى 6 وربع ؟ .. 6وربع يا نااااس .. لا ومش كفاية إني صاحية بدري لا وكمان أركب مترو الأنفاق - أكتر وسيلة مواصلات كرهتها في حياتي - يعني تضطرني الظروف إني أصحى بدري وكمان تكون الوسيلة الوحيدة لوصولي هو المترو .. يعععععععع .. بس هعمل إيه المضطر يركب المترو .. وفعلا ركبت المترو وحصل فيه حتة موقف عمري ما شفته في حياتي .. الواحد متعود انه لو حصل مشكلة ولا خناقة في المترو بتبقى بسبب حد خبط حد .. حد داس على حد .. حد رخم على حد .. أهو كله بيبقى كده وبتبقى أسباب أحيانا واقعية للخناق بجد .. لكن موقف النهاردة .. عجب .. بعد ماركبت المترو والحمد لله كنت قاعدة لإني راكبة من حلوان يعني من الأول واتحرك المترو وناي بتنزل وناس بتركب وعادي .. الحياة تمام .. وانا مش باين لي نزول أساسا مشواري حاجة كده بيات في المترو أصلا .. ف كعادتي قعدت جنب الشباك وعايشه برا خاااااااالص لإني زي ما نوهت فوق بكره المترو والقاعدة فيه .. بس في نص الطريق ضربت بطرف عيني كده في المترو وياريتني ما عملتها .. إيه الناس دي كلها وجت امتى ؟ .. المترو بقى خلاص مش بقى مفيش مكان لحد يركب ده مفيش مكان لحد من اللي واقفين يتنفس حتى .. والجو النهاردة زي ما الكل حاسس كان صععععععععب مش طبيعي فعلا - مع العلم ان الساعة لسه ماعديتش 8 حتى .. وفي ظل كل الحاجات دي كل حاجة زي ما هي واحد مثلا ينزل ويطلع مكانه اربعة خمسة .. وعايشين ما هو ده هو المترو .. هو حد مستني منه غير كده ولا حاجة ! .. وفجأة صوت زعيق عند الباب اللي في وشي ..

.. انتوا رايحين فين -

.. هنركب يا عمو -

.. تركبوا فين انتوا شايفين فيه مكان -

.. طب نعمل إيه يعني ما ركبنا وخلاص -

.. مفيش مكان يبقى تستنى المترو اللي وراه -

.. طب ما احنا مستعجلين وعندنا امتحان -

تنزلوا وتركبوا المترو التاني مفيش مكان -

.. يا عم انت فاضي انزل انت استنى المترو التاني احنا عندنا امتحان -

وفضل عمو يزعق على آخره زي ما يكون المترو ده بتاع السيد الوالد مثلا .. أو هو واخده ميكروباص لحسابه يعني .. وفي آخر الزعيق ده تفتكروا إيه اللي حصل .. راح رازع الواد اللي بيكلمه كام ألم على وشه .. يالهووووووووي .. وطبعا الناس حاشته وبتاع والعيال بصراحه طلعوا أخلاق لا غلطوا فيه ولا مدوا ايدهم عليه .. مع انه كان يستاهل ان حد من اللي حاشوه يلطشله ..

وده كان نتيجة من نتايج ركوب المترو .. وسيلة المواصلات الخنيقة المملة اللي أنا بكرهها .. بس النهاردة ولإني لأول مرة أركبه في الميعاد ده وأشوف العدد الرهيب ده من الناس اللي راكبة واللي نازلة واللي موجودة في المحطة خلاني أركز وأقول كام حاجة كده في نفسي وأنا بتفرج عليهم من الشباك ..

:) .. يا سلاااااااااااام .. كل الناس دي بتصحى بدري -

.. ده احنا بقينا كتير اوي والبلد ضاقت علينا اوي .. او الحتة من البلد اللي احنا قاعدين فيها دي ضاقت علينا اوي

الناس شكلها حلو أوي والواحد بيتفرج عليهم من الشباك وهو قاعد عكس الاتجاه اللي ماشي فيه المترو وشايفهم وحاسس انهم بيرجعوا بضهرهم :)

يااااااااه .. كل الناااااااااااااس دول عايزين ياكلوا ويشربوا ويشتغلوا ويتجوزوا .. وبيعملوا كل حاجة زي بعض ماشيين زي بعض وبياكلوا ويشربوا وينزلوا ويطلعوا ويناموا ويصحوا

بعد كده ركزت أكتر وقولت ماتبقاش كده ولا اسمها كده .. لكن تبقى واسمها :

سبحان الله .. كل النااااااااااااااس دي كلها ورب واحد قادر وبيعملهم كل اللي قولتيه ده ومخليهم يعملوا كل اللي قولتيه ده وقادر يحققلهم كل اللي بيتمنوه وكلهم في وقت واحد .. ناس كتييييييييييير وكل واحد ليه ملامحه .. فيه اللي شبه بعض بس برضو كل واحد بملامحه الخاصه .. وحاجات كتير اوي تستاهل فعلا التركيز والتفكير

سبحان الله