يوم حبيته ..

مش عارفه اقول ايه وأبدأ ازاي ومنين .. ويمكن ده اللي خلى الموضوع يتأخر كده اني مش عارفه اقول فيه ايه بس ما علينا .. اليوم ده كان إيييييه .. آه ..

في يوم اتفقنا انا وشوية من أصدقائي اننا هنروح دار مسنين يعني هنعمل زيارة لدار مسنين .. وبالنسبة لأصحابي فدي ما كانتش اول مرة هما كانوا راحوا قبل كد وللأسف ظروفي ماسمحتليش اني اكون معاهم في اليوم ده .. لكن الحمد لله في المرة التانية دي قدرت اكون معاهم وبجد ده كان من حسن حظي ..

انا فعلا مش عارفه اوصف اليوم ده ازاي .. كل اللي أعرفه انه كان يوم من أجمل أيام حياتي بجد .. أولا دي حاجة كانت جديدة عليا وأول مرة اعملها بس بجد عرفت يعني ايه الواحد يعمل عشان ناس تانية غيره وعرفت اد ايه الاحساس ده جميل جدا جدا لدرجة لا توصف .. واد ايه هما كانوا مبسوطين بينا وبوجودنا معاهم وبسؤالنا عليهم .. بجد شفت عليهم فرحة عمري ما شفتها قبل كده .. انا شخصيا علاقتي بالمسنين انتهت من سنين لاني جدودوي وجداتي متوفيين فكانت علاقتي القريبة بيهم اتقطعت من زمان .. بس حسيت بسعادة رهيبة مع الناس اللي انا اول مرة اتقابل معاهم دول .. من بعد تواجدك معاهم لمجرد دقايق تحس انك معاهم من زماااااان وعمرك ما سيبتهم .. لكن اللي خلاني مندهشة اوي اوي اوي ومش عارفه اصدق ان كلهم تقريبا عندهم أهل وبيوت مفتوحة وأولاد وأحفاد منهم اللي بيزوروهم كمان .. طب وليه سايبينهم في مكان تاني لرعاية المسنين وازاي يحرموا نفسهم من ناس جميلة اوي اوي زي دول .. ويحرموا نفسهم من دعائهم اللي بجد يهز القلب من كتر صدقه .. بجد مش عارفه ..

ناس جميلة اوي .. أقل حاجة بتسعدهم .. بيفرحوا أوي بالسؤال عليهم .. اعتقد ان ده بيحسسهم انهم لسه موجودين .. وهما بجد اغلبهم ناس زي العسل ودمهم شربات وخفة دمهم مالهاش حل .. سيدات ورجال .. لا ومنهم كمان أصحاب المواهب .. غـُنا وكتابة ونكت وإيه جامدين ..

ودي قصيدة أو أغنية كاتبها واحد منهم ..

قاعد بيا ولا عليا .. مر غزال من حواليا بصيت بعيني شمال ويمين لقيت جميل و مالوهش مثيل الوش قمر ومنور والكعب ملفوف ومدور وعيونه حلوة وعسلية ورموشه أحمى من السكاكين اداني نظرة برمش العين جرحلي قلبي نزلت قتيل ماعرفش إيه اللي جرالي وإيه كمان غير حالي .............. - هنا للأسف فيه جزء وقع مننا -

ضحك وقالي إيه تقصد مني قلت له دا غصب عني لإنك جميل ومالكش مثيل ومشيت وراه خطوة بخطوة لحد ما عرفت مكانه وعرفت اسمه وعنوانه .. اداني نظرة ف نظرة من الشباك قلت يا واد نلت الإعجاب روحت على البيت حيران وفضلت طول الليل سهران وصورته مافارقيتش خيالي .. جمعت الأهل مع الأحباب وروحنا على بيتهم دوغري قابلونا بكل الترحاب وقالولنا إيه قصد زيارتكم قولنا جايين نناسبكم في المحروسة كريمتكم ست الحلوين قالوا ادونا فرصه نسأل عليكم إديتهم اسمي وعنواني ووظيفتي كمان ومكاني وجالنا الرد بكل سرور وكانت الشبكة بعد يومين أما الفرح في خلال شهرين وعملنا الفرح وكانت ليلة والرقص حوالينا على الصفين الكل يبارك ويهني والباقي يرقص ويغني قولتلها إيه رأيك فيا قالتلي انت فارس أحلامي وقضينا ليلة أجمل ليلة .. أول سنة ربك كرمنا كده ببنتين الأولى اسمها مديحة والتانية اسمها سميحة أما بعديها بسنتين ربك جبرنا بولدين الأول حسن والتاني حسين وبكده اتحققت أحلامي وكده نولت اللي في بالي وربنا يكفينا شر العين وكل اللي قولته ماحصلش لانه من وحي خيالي ..

كتابة / عربي أحمد حسين

وكان ده يومي في دار المسنين .. ويارب نقدر نكررها تاني في عيد الأم لانهم كان نفسهم اننا نكون معاهم في اليوم ده .. يا رب ينفع ..

وده اليوم اللي حبيته اوووووووووي اوي .. واللي عرفني كمان يعني ايه " ما استحق أن يولد من عاش لنفسه فقط " ..