بحبك أوووووووووووووي أوي ..

ازييكم عاملانين ايه .. انا كنت سايبه البلوج الفترة دي لحملة حماية وبس ومش كنت بنزل حاجة تانية غيرها بس ماكنتش هعرف بصراحه ان النهاردة يعدي كده فاسمحولي بهذا الفاصل ..

اليوم 27 / 3 / 2008

زي النهاردة من 3 سنين - عدوا بسرعة اوي اوي وماحسيناش بيهم - كانت وفاة الفنان العظيم الجميل الراحل أحمد زكي ..

أنا بصراحه مش عارفه عملت ليه البوست ده لاني مش عارفه أكتب فيه ايه .. بس كل اللي اعرفه اني بحب الراجل ده حب مهما قلت عنه مش هقدر اوصف فعلا انا بحبه اد ايه .. وبرضو ماعرفش ليه ..

الله يرحمه بجد كان حد جميل اوووووووووووي اوي .. وانا شخصيا شايفه ان أحمد زكي ماكانش فيه زيه ومش هيكون اساسا .. ماعتقدش ان فيه حد عرف يعمل اللي عمله أحمد زكي في فنه وأدواره .. إن الواحد يتفرج على عبد السميع في البيه البواب و عم سيد المصوراتي في اضحك الصورة تطلع حلوة وعلى جمال عبد الناصر في ناصر 56 و أنور السادات في السادات وغيرهم كتييييييير ويقول ان كل دول هما شخص واحد مش ممكن مش ممكن ان حد يعملها كده وتصدقه في كل مرة ان هو فعلا الحد ده .. واتحدى ان حد في لحظة من اللحظات وهو بيتفرج على اي شخصية من دول حس ولو للحظة انه بيتفرج على أحمد زكي مش على الشخصية بتاعة الفيلم ده ..

بجد لو فضلت أقول وسيبتوني أقول مش هبطل لاني اما بفتح في الكلام عن الراجل ده ما ببطلش كلام ..

وحاجة من الحاجات اللي بتضايقني اوي ان الراجل ده ماكانش يعرف ان الناس بتحبه كل الحب ده .. يعني يا دوب حس بجزء من الحب ده قبل وفاته على طول في رحلة مرضه وأيامه الأخيرة ..

طولت عليكم ويمكن ناس كتير تشوف ان البوست ماكانش ليه لازمة بس انا حبيت في اليوم ده أقول انا اد ايه بحب الراجل ده وأقول الله يرحمه وياريت اللي يشوف البوست يقراله الفاتحه ..

أنا شخصيا بعشق الأغنية دي ..

أغنية ( حبيبي ) اللي غنتهاله ماجدة الرومي ..



الوداع الأخير لأحمد زكي ..

رحم الله من أعطى الفن عصاره روحه ..

الأسبوع الثاني من حملة حماية ..

متأخرة متأخرة متأخرة .. - لا ده انا بزعق لي - انا فعلا اتأخرت في تنزيل الموضوع ده بس معلش - لا مفيش حاجة اسمها معلش ما احنا ما بيجيبناش ورا غير معلش دي - خلاص اكتمي ونزلي الموضوع بقى .. احم .. اوك .. وإليكم الأسبوع الثاني من حملة حماية ..

واجب الأسبوع الثاني من الحملة هو عمل 5000 نشاط في الوطن العربي عن الحملة ..

الأنشطة دي حاجات كتييييييييير اوي ممكن تتعمل .. زي مثلاااااااا ..

عمل ندوات للتعريف بالحملة وكيفية المشاركة فيها - عمل ماتشات - كلمة في إذاعة مدرسية - مجلة حائط في كلية في مدرسة في مدخل عمارة - فيه حاجات كتير كتير اوي بس الواحد يفكر .. وده كله طبعا ونشاط الأسبوع الأول مستمر اللي هو توزيع الاستيكرز في كل مكان وعلى كل الناس ..وبرضو الطرق كتير جدا .. زي لزقه على الحوائط في الشوارع والمواصلات - فتح البلوتوث وبعته لكل الموجودين حواليك - توزيعه على محلات الدليفري واقناعهم بتوزيعه مع الحاجات اللي بيوصلوها - فيه حاجات كتير برضو واللي عايز اكتر يدخل هنا وهيلاقي اكتر وعلى فكرة انا مش جايباهم من دماغي دي حاجات اتعملت فعلا ..

المواد اللازمة لإقامة الأنشطة الترويجية للحملة ..

المادة الأولى : المادة الفيلمية للتعريف بالحملة .. فيديو جااااااااااامد .. حملوا من هنا

المادة التانية : بروشور الحملة .. أشكالهم تحفة .. حملوا من هنا

ولا أقولكم هحطهم ..

يلا بسرعة حملوه واطبعوه ووزعوا وشاركوا يا بني آدمين خليكم إيجابيين وما تحرموش نفسكم من ثواب المشاركة .. يلاااااااااااااااااااا ..

صحيح نسيت أقولكم .. كان المفروض ان يتعمل في الأسبوع ده 5000 نشاط .. ده الرقم المطروح في الحملة والأسبوع لسه ما خلصش والأنشطة وصلت في اللحظة اللي بكتب فيها دي ل 16702

وكالعادة هجيلكم تاني بكل جديد .. انا وراكم وراكم مش هسيبكم ابدا .. ده انتوا حبايبي :)

آخر أخبار حملة حماية ..

بجد كده وضح إن لسه فيه ناس إيجابيين وده بالنسبة للجانب المشهور من المجتمع .. أما الجانب التاني فبجد مش محتاج لكلام شغالين شغل من نار بجد عاملين شغل مالهوش حل .. وإليكم جزء من أخبار الحملة ..

جريدة المصري اليوم انضمت كشريك إعلامي لحملة حماية وقامت بتوزيع ملصقات الحملة مع عدها الذي صدر بتاريخ 13 مارس 2008

قناة مودرن سبورت أعلنت عن انضمامها للحملة ودعمها من خلال رئيسها د.وليد دعبس، وقد قامت القناة باذاعة يومية للأفلام القصيرة الخاصة بالحملة

برنامج القاهرة اليوم الذي يقدمه الإعلامي الكبير عمرو أديب على شبكة الأوربت أعلن عن تأييده

للحملة واستضافته للداعية عمرو خالد أسبوعياً لمتابعة أخبار الحملة أولاً بأول ، إضافة لمشاركته

بإعداد تقارير عن الحملة و أنشطتها المختلفة

موقع محيط وموقع بص و طل الإلكتروني تبنى الحملة على الصفحات الأولى للموقع لكل القراء وءذينظم شات على الهواء مباشرة مع الأستاذ عمرو خالد للحديث عن الحملة يوم الاثنين 17 مارس

من السادسة وحتى السابعة و النصف مساء

سلسلة سوبر ماركت المحمل أعلنت عن مشاركتها في الحملة وأبدت استعدادها للدعم لعلاج المدمنين وذلك بالتكفل للحالات الفقيرة غير القادرة على تحمل نفقات العلاج.

مخبوزات ريتش بيك الشهيرة انضمت للحملة بتوزيع البوسترات مع منتجاتها على التجار ، بالإضافة إلى وضع بوسترات الحملة على سيارات توزيعها في سائر أنحاء الجمهورية

المول التجاري الشهير هايبر ون في منطقة الشيخ زايد بالسادس من أكتوبر اشترك في الحملة بتوزيعه للبوسترات و الملصقات مع المنتجات التي يبيعها للمستهلكين

الشركة المنتجة لبطاطس شيبسي الشهيرة قررت المشاركة في الحملة بإنتاجها لعبوات شيبسي تحتوي على شعار الحملة طوال فترة الحملة

فريق كرة السلة بنادي سبورتنج السكندري انضم لحملة حماية لبدء علاج 5000 مدمن على مستوى الوطن العربي حيث حصلوا على موافقة من المعلن لوضع شعار الحملة على تي شيرتات اللاعبين بدلاً من الإعلانات ، ووافق المعلن على ذلك اشتراكاً منه في الحملة ، ودعماً لها

وكيل شركة بروكتر اند جامبل العالمية في مصر أعلن عن انضمامه للحملة ودعمه لها في منطقة الدلتا والاسكندرية حيث سيقوم موزعي الشركة بتوزيع بوسترات الحملة على التجار الذين يتعاملون معهم على مستوى الجمهورية

طفل عمره سبع سنوات أرسل رسالة إلى عمرو خالد أخبره من خلالها أنه قام بطبع الاستيكر من مصروفه ، وسأله إن كان بذلك شارك في الحملة أم لا، كما فوجئ الأستاذ عمرو خالد بأطفال 11 سنة يلبسون ... ويرتدون تي شيرات عليها شعار الحملة وبسؤالهم تبين أن كل الفصل جمع من المصروف وقرروا أن نشاطهم أنهم سيطبعوا لكل الفصول هذه الكابات والتشيرتات.

جاء للاستاذ عمرو خالد تليفون ، أنا حسام 29 من السويس ، أنا تاجر مخدرات صغير ، أنا سمعت الحملة وشفت شباب بيضع استكير في الحي.. هل أنت مدمن ..لا؟ أنا بموت ناس .. من قتل نفسا، توب .. علي ضغوط من التجار الكبار .. أنا خايف عليك منهم حيلبسوك اي قضية .. لن أسكت.
- أعلنت محلات لوكرنفال للحلويات تبنهيا للحملة ودعمها لها.

الفنان الكوميدي الشهير محمد هنيدي أعلن عن انضمامه للحملة واستعداده لحضور عدد من الفعاليات المختلفة للحديث عن الحملة و الترويج لها

الفنانة أنغام قررت المشاركة في الحملة بأغنية يتم كتابتها خصيصاً لمخاطبة المدمنات و أمهات المدمنين

الفنان التشكيلي عبد الرحمن الحسيني من صناع الحياة رسم لوحة جدارية عليها شعار الحملة ليتم الاستفادة منها وتعليقها في مكان متميز

طلاب جامعة الملك سعود في الرياض طبعوا عشرة آلاف بوستر و ملصق للحملة وقاموا بتوزيعها ، ولأول مرة تشهد الجامعة مشاركة واسعة من الطالبات في الدعاية للحملة و الترويج لها

مجلة حياة المصرية الشهرية قررت توزيع سي دي عن الحملة مع عددها القادم ، مع وجود صفحة للإعلان عن الحملة و الترويج لها مجاناً

شركة سبورتيف للتسويق الرياضي اتفقت مع عدد من لاعبي كرة القدم المشهورين على حضور عدد من الفعاليات المختلفة المتعلقة بالترويج للحملة مجاناً ، ومن أشهر اللاعبين الذين سيساهمون في الترويج للحملة هادي خشبة ونادر السيد و سيد عبد الحفيظ

المدرسة المصرية الدولية ومدرسة مودرن إيدوكشين بالهرم قرروا وضع شعار الحملة على جميع أتوبيسات نقل طلابها في مصر

الكاتب الصحفي و النائب البرلماني مصطفى بكري رئيس تحرير جريدة الأسبوع أعلن عن دعمه للحملة ، وأبدى استعداد لنشر إعلانات للحملة ومتابعة أخبارها عبر صفحات جريدة الأسبوع.

شركة الدعاية و الإعلان المسئولة عن الإعلانات الموجودة في طريق مصر الاسكندرية الصحراوي أعلنت عن مشاركتها في الحملة وذلك عن طريق توزيعها للبوسترات على المغادرين والزائرين للقاهرة و الإسكندرية من راكبي الحافلات المختلفة ، وسيقوم بتوزيع البوسترات عدد من الشباب المتطوعين الذين سيرتدون تي شيرتات عليها شعار الحملة

صناع الحياة بالمنصورة اتفقوا مع عدد كبير من الأسر الطلابية داخل جامعة المنصورة على الإشتراك في الحملة من خلال تنظيم عدد من الفعاليات و الأحداث و الاحتفالات التي تروج للحملة
وزارت داخلية الأردن و ليبيا و اليمن و الإمارات العربية المتحدة أعلنوا عن دعمهم.

وزير الصحة الأردني أرسل خطاباً رسمياً للجنة المركزية للحملة يعلن فيها عن دعمه لحملة حماية
شرطة دبي زادت من كمية الملصقات التي قامت بطباعتها على نفقتها الخاصة لتصل إلى 200 ألف ملصق بسبب الإقبال الشديد من شباب دولة الإمارات العربية المتحدة، وقد نظمت شرطة دبي أول نشاط في الحملة من خلال ندوة جماهيرية بنادي شرطة دبي.

جريدة عكاظ السعودية الشهيرة أعلنت عن انضمامها للحملة كشريك إعلامي في المملكة العربية السعودية

أعلن اللواء محمود أحمد علي رئيس الاتحاد المصري لكرة السلة عن تخصيص 50 % من دخل الاتحاد من مبارايات كرة السلة في الدورات المجمعة القادمة لصالح حملة حماية للمساهمة في علاج المدنين غير القادرين على تحمل نفقات العلاج ،كما أعلن أن الدورة المجمعة القادمة للنشائين تحت 18 سنة سيوضع باديج الحملة على جميع القمصان الرياضية لكل الفرق. كما أعلن الكابتن مدحت وردة أفضل لاعبي أفريقيا في كرة السلة عن انضمامه للحملة واستعداده للمشاركة في جميع الانشطة.

صناع الحياة بجامعات الجزائر بدولة الجزائر قاموا بطباعة 100 ألف بوستر على حساب طلاب الجامعة وقاموا بتوزيعها ولصقها في أرجاء الجامعة وفي سائر أنحاء الجزائر

شركة الاتصالات السعودية أعلنت عن رغبتها في الانضمام للحملة

الجامعة الأمريكية بالقاهرة نظمت ندوة كبرى بحضور الالاف الطلاب يحاضر فيها الاستاذ عمرو خالد بتاريخ الاحد 16 مارس 2008

إدارة المركز التجاري الشهير "فيرست مول" بالفورسيوزن قررت وضع بوث للحملة على مدخل المركز طوال فترة الحملة

فنادق سفير في الدقي و الزمالك و الغردقة قررت وضع بوث للحملة في أفرعها المختلفة ، كما أبدت رغبتها في التعاون في الفعاليات المختلفة المتعلقة بالحملة من خلال تنظيم عدد من الندوات الإرشادية للعاملين بالفندق.

صناع الحياة نظموا عدد من فعاليات التوعية بالحملة و الترويج لها كان من أهمها زيارة صناع الحياة بالسنبلاوين ل 800 مسجد وكنيسة في عدد من المحافظات في أربعة أيام للاتفاق مع أئمة المساجد على جعل خطبة الجمعة تركز على موضوع المخدرات

المستشفى السعودي الألماني بالمملكة العربية السعودية قررت طبع الملصق الإرشادي الذي يحتوي على شعار الحملة وتوزيعه في أنحاء المملكة العربية السعودية ، إلى جانب تنظيم عدد من الندوات التثقيفية و حلقات البحث العلمية لمناقشة موضوع الإدمان بالاستعانة بأطباء المستشفى بمختلف تخصصاتهم.

أغرب اتصال جاء على الكول سنتر من بنت 11 سنة أنا في كدرسة شهيرة الولاد في الفصل معانا بيخرجوا برة المدرسة في الفسحة بيشربوا بانجو ويرجعوا تاني، ماذا افعل لاكون ايجابية أمام هذا الوضع.

وكالعادة انتظروا كل جديد عن الحملة .. صحيح انا مش حاسه ان فيه اي حد مستني لا جديد ولا قديم بس انا رخمة وهجيبهولكم برضو .. انتظروني :)

حملة حماية .. 2

انا مش عارفه أقول إيه مع إني عايزة أقول كتييييييير كتير أوي فوق الوصف .. بس أنا هدخل على طول في الموضوع من غير ترتيب .. أكيد طبعا بتكلم عن حملة حماية اللي بيقودها الأستاذ العظيم عمرو خالد .. بجد يا جماعة الحملة شغالة شغل مش ممكن جااااامد .. الشباب شغالة فيه بطريقة ما تتوصفش انا فعلا ماكنتش متخيلة ان هيكون فيه كم الإيجابية دي من الشباب .. إيجابية وتفكير وابتكار أفكار للحملة والمشاركة الفعالة جدا فيها .. بجد حاجة تدي أمل فعلا وتخلي الواحد نفسه يعمل اي حاجة ويشارك .. جزاهم الله خيرا .. والأستاذ عمرو طبعا جزاه الله عنا كل الخير وجعله في ميزان حسناته ..

ما تبخلوش على نفسكم بالثواب وشاركوا باللي تقدروا تعملوه في الحملة الرائعة دي ..

و هنا هتلاقوا بعض أشكال المشاركة في الحملة والأفكار اللي تساعد على المشاركة و هنا كمان ..

يللا بسرعة شوفوا وقوموا شاركوا اعملوا حاجة خليكوا جدعان وايجابيين ..

على فكرة لغاية اللحظة اللي بكتب فيها دي وصل عدد توزيع ونشر الاستيكرز بتاع الحملة ل 2018394يعني عدا المليون اللي كان مطلوب في الأسبوع الأول بمليون ..

بزمتكم مش حاجة فعلا تدي أمل وتخليك عايز تشارك بأي شكل ..

قال تعالى :- ومن أحياها فكأنما أحيا الناس جميعا .. صدق الله العظيم

.......................

لتحميل كلمة الأستاذ عمرو خالد عن ثواب المشاركة في حملة حماية اضغط على الصورة ..

لقاء القاهرة اليوم عن حملة حماية ..

من هنا ..

وانتظروا كل جديد عن الحملة إن شاء الله ..

حملة حماية .. موضوع مهم أوي ..

بدأت حملة حماية للتوعية ضد المخدرات انا مش هتكلم وهسيبكم مع المشروع ..

سلام عليكم يا شباب

تبلغ عدد الفضائيات الاعلامية في العالم العربي، حوالي 400 فضائية تؤثر في عدد كبير من الناس أما حملة حماية فتمتلك 100 الف فضائية أتدرون كيف؟ لاني اتوقع 100 الف شاب وفتاة من صناع الحياة وشباب المنتدي وحماة المستقبل يتحولون إلي(أجهزة إعلام متحركة وقنوات فضائية متحركة). محتاجة جهد رهيب ومواصلة الليل بالنهار لكن تخيلوا لو صناع الحياة اصبحوا فعلا قنوات فضائية متحركة في الشارع للتوعية ضد المخدرات ونشر فكرة حملة حماية ولصق الاستكيز ومراسلة الصحفيين والرياضيين ومواقع الانترنت والفضائيات والمغنين والاعلاميين ليشاركوا معنا في حملة حماية. تخيلوا ممكن يحصل ايه ... تخيلوا كم مدمن هيتهز ويبكي ويفوق بسبب حملتنا ديه ..ستقولون .. معقول هل سنؤثر في 100 مليون مدمن ... أقول لكم ... قال ابراهيم "يا رب وانى يبلغ صوتي وأنا في الصحراء لانادي الناس ليحجوا فقال له الله يا ابراهيم: عليكم الاذان وعلينا البلاغ"جمعوا ارداتكم وقوا نيتكم ووحدوا صفكم وجدودا عهودكم مع ربكم وانصروا غزة ونبيكم ببث الايجابية بين الشباب في كل العالم العربي. وحملة حماية هي خطوة البدايةمنتظر الـ 100 الف رد على هذه المداخلة وسيكون الرد بتعليق الاستكيرز وتجهيز الانشطة أقوى من الف كلمة وكلمة

أ / عمرو خالد

.. استيكرز الحملة ..

لتحميل ملصق الحملة من هنا ..

لتحميل الملف التعريفي بالحملة من هنا ..

لمشاهدة حلقة إطلاق الحملة من هنا ..

لتحميل أغاني الحملة من هنا ..

مداخلات أ / عمرو خالد في منتدى الحملة من هنا ..

وانتظروا كل جديد عن الحملة ان شاء الله ..

اخيرا تمت رحلة دريم بارك ..

على فكرة الرحلة دي كانت من اسبوع ..

وأخيرا رحت دريم باااااااااااارك ..

ياااااه بقالي كتير اوي مارحتش وبقالي اكتر برتب لرحلة زي دي واخيرا تمت بحمد الله .. بس والله زي ما بيقولوا كل تأخيره وفيها خيره :)

ليه بقى كل تأخيره وفيها خيرة عشان المرة دي رحت دريم وهي فيها أجدد وأجمد لعبة حصلت في تاريخ دريم بارك اساسا .. آه والله بجد .. هتشوفوها وهتقولوا زيي .. بس لو ركبتوها هتقولوا اكتر:)

أنا هبطل رغي وهسيبكم مع بعض لقطات الرحلة الجامدة بتاعتي :)

دي حتة من التذكرة بتاعة قطر الموت :)

ودي أهم حاجة في الرحلة دي ..

أسيبكم مع أجمد جمدان في دريم بارك ديسكفري .. هييييييييييه

...........

قلبي يخفق بشدة لدرجة تقترب إلى توقفه .. يسيطر عليّ توتر شديد لا أستطيع التخلص منه .. لم أتعرض لموقف كهذا في حياتي .. ولكن ما هو الموقف .. الموقف هو أن إحدى صديقاتي رشحتني كعروس لأحد أقارب زوجها وعليّ مقابلته اليوم ليراني وأراه .. وأنا لم أتعرض لهذا الموقف من قبل وما كنت لأتخيل أو أوافق على هذا الموقف وبالفعل رفضت ولكن انهالت عليّ الإلحاحات في أن أراه وبعد ذلك أقرر .. فخضعت لرأي الأغلبية .. وهذا هو اليوم الذي تم الاتفاق عليه لتتم المقابلة .. وها أنا يسيطر عليّ التوتر الشديد الذي لا أستطيع احتماله والذي يفسد عليّ يومي كله .. وفي الميعاد المحدد ذهبت لأرى شخصا لا أعرفه ولا يعرفني ونرى بعضنا البعض للمرة الأولى في حياتنا .. ولأول مرة أوضع في هذا الموقف وبإذن الله تعالى ستكون الأخيرة لأنني وكعادتي عدت لأقول أنني لا يجب أن أخضع لرأي الأغلبية في أمر أعرف نتيجته في داخلي .. في أمر حسمته مع نفسي ومع شخصي وأصبح من الآراء المكونة لشخصيتي وهو أنني لن أرتبط بهذه الطريقة .. لن أرتبط بشخص لا أعرفه يتعلق ارتباطي به بفكرة ورأي يجب أن أكونهما عنه من مقابلة يحكي فيها عن نفسه وأحكي فيها عني .. لن أرتبط بمن هو يبحث عن الاستقرار والزوجة التي تحقق له هذا الاستقرار فقط لا غير .. فأنا انتظر رجل أحلامي الذي لن أقبل بغيره - رجل أحلامي المرسوم أو التفصيل كما تقول أمي - فأنا في انتظاره ولن أندم على انتظاره حتى وإن لم يأتي .. ولكنني في نهاية الأمر وبعد حسم أمري آسفة لمن وجد في من يبحث عنها ولم أجد فيه من أنتظره .. أنا آسفة

يوم حبيته ..

مش عارفه اقول ايه وأبدأ ازاي ومنين .. ويمكن ده اللي خلى الموضوع يتأخر كده اني مش عارفه اقول فيه ايه بس ما علينا .. اليوم ده كان إيييييه .. آه ..

في يوم اتفقنا انا وشوية من أصدقائي اننا هنروح دار مسنين يعني هنعمل زيارة لدار مسنين .. وبالنسبة لأصحابي فدي ما كانتش اول مرة هما كانوا راحوا قبل كد وللأسف ظروفي ماسمحتليش اني اكون معاهم في اليوم ده .. لكن الحمد لله في المرة التانية دي قدرت اكون معاهم وبجد ده كان من حسن حظي ..

انا فعلا مش عارفه اوصف اليوم ده ازاي .. كل اللي أعرفه انه كان يوم من أجمل أيام حياتي بجد .. أولا دي حاجة كانت جديدة عليا وأول مرة اعملها بس بجد عرفت يعني ايه الواحد يعمل عشان ناس تانية غيره وعرفت اد ايه الاحساس ده جميل جدا جدا لدرجة لا توصف .. واد ايه هما كانوا مبسوطين بينا وبوجودنا معاهم وبسؤالنا عليهم .. بجد شفت عليهم فرحة عمري ما شفتها قبل كده .. انا شخصيا علاقتي بالمسنين انتهت من سنين لاني جدودوي وجداتي متوفيين فكانت علاقتي القريبة بيهم اتقطعت من زمان .. بس حسيت بسعادة رهيبة مع الناس اللي انا اول مرة اتقابل معاهم دول .. من بعد تواجدك معاهم لمجرد دقايق تحس انك معاهم من زماااااان وعمرك ما سيبتهم .. لكن اللي خلاني مندهشة اوي اوي اوي ومش عارفه اصدق ان كلهم تقريبا عندهم أهل وبيوت مفتوحة وأولاد وأحفاد منهم اللي بيزوروهم كمان .. طب وليه سايبينهم في مكان تاني لرعاية المسنين وازاي يحرموا نفسهم من ناس جميلة اوي اوي زي دول .. ويحرموا نفسهم من دعائهم اللي بجد يهز القلب من كتر صدقه .. بجد مش عارفه ..

ناس جميلة اوي .. أقل حاجة بتسعدهم .. بيفرحوا أوي بالسؤال عليهم .. اعتقد ان ده بيحسسهم انهم لسه موجودين .. وهما بجد اغلبهم ناس زي العسل ودمهم شربات وخفة دمهم مالهاش حل .. سيدات ورجال .. لا ومنهم كمان أصحاب المواهب .. غـُنا وكتابة ونكت وإيه جامدين ..

ودي قصيدة أو أغنية كاتبها واحد منهم ..

قاعد بيا ولا عليا .. مر غزال من حواليا بصيت بعيني شمال ويمين لقيت جميل و مالوهش مثيل الوش قمر ومنور والكعب ملفوف ومدور وعيونه حلوة وعسلية ورموشه أحمى من السكاكين اداني نظرة برمش العين جرحلي قلبي نزلت قتيل ماعرفش إيه اللي جرالي وإيه كمان غير حالي .............. - هنا للأسف فيه جزء وقع مننا -

ضحك وقالي إيه تقصد مني قلت له دا غصب عني لإنك جميل ومالكش مثيل ومشيت وراه خطوة بخطوة لحد ما عرفت مكانه وعرفت اسمه وعنوانه .. اداني نظرة ف نظرة من الشباك قلت يا واد نلت الإعجاب روحت على البيت حيران وفضلت طول الليل سهران وصورته مافارقيتش خيالي .. جمعت الأهل مع الأحباب وروحنا على بيتهم دوغري قابلونا بكل الترحاب وقالولنا إيه قصد زيارتكم قولنا جايين نناسبكم في المحروسة كريمتكم ست الحلوين قالوا ادونا فرصه نسأل عليكم إديتهم اسمي وعنواني ووظيفتي كمان ومكاني وجالنا الرد بكل سرور وكانت الشبكة بعد يومين أما الفرح في خلال شهرين وعملنا الفرح وكانت ليلة والرقص حوالينا على الصفين الكل يبارك ويهني والباقي يرقص ويغني قولتلها إيه رأيك فيا قالتلي انت فارس أحلامي وقضينا ليلة أجمل ليلة .. أول سنة ربك كرمنا كده ببنتين الأولى اسمها مديحة والتانية اسمها سميحة أما بعديها بسنتين ربك جبرنا بولدين الأول حسن والتاني حسين وبكده اتحققت أحلامي وكده نولت اللي في بالي وربنا يكفينا شر العين وكل اللي قولته ماحصلش لانه من وحي خيالي ..

كتابة / عربي أحمد حسين

وكان ده يومي في دار المسنين .. ويارب نقدر نكررها تاني في عيد الأم لانهم كان نفسهم اننا نكون معاهم في اليوم ده .. يا رب ينفع ..

وده اليوم اللي حبيته اوووووووووي اوي .. واللي عرفني كمان يعني ايه " ما استحق أن يولد من عاش لنفسه فقط " ..