يعنى هنكون ممنونين لوحد يعنى خد الحتة دى "كوبى بيست" عنده فى مدونته,موقعه,على حيطة بيتهم أى حتة والسلام..يعنى هتكون مساعدة من الإنسان.. لأخوه اللى هو الإنسان برضه (زميله فى البشرية يعنى) ولاهى الإنسانية إنعدمت فى الزمن ده..تخيل تساعد المحتاجين بــ "كوبى بيست" إيه الحلاوة والبساطة دى؟؟ياللللا يا حبيبىياللللا يا بابا..شكة دبوسكووووووبى....بييييييست....هييييه شفت بسيطة ازاى....حسيت بحاجة...شطووووورتشكر يا ذوق يا أمير يابن اللللل أمرا..ماتخافش نسبتك محفوظة..فى الثواب ماتفهمنيش غلط
أرجو التفاعل مع موضوع جمع بواقى الأطعمة(الموضوع السابق)لأنى أرى أنه موضوع غاية فى الأهمية

Happy Birth Day To Me ..

حادي بادي يويو .. حادي بادي يويو ..
يللا حالا بالا بالا حيوا ابو الفصاد هيكون عيد ميلاده الليلة اسعد الاعياد فليحيا ابو الفصاد هيييييييييييييييه ..

عيد ميلادي ال20 .. ياااااااااااه ال20 .. ايون ال20 ..

وعشان هو عيد ميلادي ال20 .. وبما ان الواحد مش كل يوم هيبقى عنده 20 سنة فالكل قرروا اني لازم يتعمل لي عيد ميلاد .. ولسه هقول ياااااااخونا .. قالولي ششششش هيتعمل عيد ميلاد مالكيش دعوة .. هو كان عيد ميلادك :D

وكان عيد ميلادي ال20 .. ماماتي نزلت جابت كل الحاجات .. وميرو صبحتي وحبيبتي جت وفضلنا نعلق فيهم ونوضب في الحاجات واليكم بعض لقطات عيد ميلادي ال20 ..

وده حرف الإيه اللي هو اول حاجة عملناها انا وميرو واللي كان المفروض هيبقى بدل الإيه بيرو .. بس الظروف بقى ..

والعشرين دي اللي كانت تاعبة بابا نفسيا .. أصلنا قعدنا نعمل فيها ساعة تقريبا :D

ودي صور التورتة من كل الاتجاهات تقريبا .. مش عارفه ليه ميرو كانت مصممة تصورها كل الصور دي .. بس ما علينا ..

ودول بعد ما ولعت الشمع واتلسعت ..

وبجد كان يوم حلو اوي وانا اتبسطت فيه جدا بكل حاجة في اليوم وبكل اللي شاركوني احتفالي بيه .. ربنا يخليهملي كلهم كلهم كلهم .. وكان ده عيد ميلادي ال20 .. كل سنة وانا طيبة ..

آخر كلمات ..

في كل مرة تلاقينا فيها وتحدثنا بعد وداعنا الأخير كنت تنهي حديثنا بشكرك لي وعندما أسألك على ماذا تشكرني تقول على كل شيء وعلى أي شيء .. ولكني ما كنت لأشكرك قط .. ولكن .. أتعلم ؟ ! .. فأنت تستحق مني شكرا واحدا على شيء علمتني إياه .. شيء ما كنت سأعرفه لولاك .. هل تعرف ما هو هذا الشيء ؟ .. القسوة .. نعم القسوة فما كان أبدا للقسوة مكانا في عالمي .. فأنا لم أتخيل أبدا أن تعرف القسوة طريقا لقلبي .. ولكنك عرفتني ما هي القسوة وعلمتني كيف أقسو .. فأصبح قلبي قاسيا تجاهك .. فما عاد يحن لك ولا لكلامك ولا لأيامه معك .. ما عاد قادرا على أن يحنو عليك أو يتأثر بحالك حتى عندما يبدأ يراوده عطفه تجاهك يرجع سريعا ويتذكر آلامه وتجريحك له بلا مبالاة .. فما عاد من الأساس يصدق كلامك .. فهو يسمع لك من باب السمع لا أكثر ولا أقل .. لا يُصدق ولا يُكذب ولا يعطي حتى لنفسه مجالا ليفكر أيكون كلامك صدقا أم كذبا .. فما عاد يفرق معه .. فهو يسمع فقط ..

أتـُصدق .. فبالرغم من أنني اختلفت معك كثيرا عندما قلت لي أن ذكرياتي ستمحيها الأيام وتبدلها حتى تصبح لا وجود لها إطلاقا وأصريت على رأيي بأن ذكرياتي من المستحيل أن تضيع مني وأنها ستظل دائما معي لأنني أستطيع الحفاظ عليها بكل ما فيها أيا كان وستظل دائما تذكرني بكل ما مريت به ولن تضيع مني أبدا كما قلت أنت .. إلا أنني وجدت أنه ليس فقط من الممكن لذكرياتي أن تضيع مني وتمحيها الأيام بل وجدت أنني أستطيع أنا تمزيقها ومحوها إلى الأبد .. كما أعتقد أيضا أن هذه الكلمات ستكون آخر ما يخطه قلمي بشأنك أو بشأن أي شيء له علاقة بك أو بذكرى تخص أيامي معك .. فالوداع لك ولكل ذكرياتي معك وليس إلى أي لقاء ..

.. Happy Valentine Day ..

النهاردة 14 / 2 .. يعني إيه ؟ .. يعني عيد الحب يا بني آدمين .. ولا بلاش عيد الحب دي خليها يوم الحب .. كل سنة وانتوا طيبين أو كل سنة وانتوا محبوبين .. كل سنة وكل الناس بتحب و بتتحب وموجودين مع اللي بيحبوهم ومش يسيبوهم ابدا أبدا خالص ..

Happy Valentine Day ..

.................

وخلصت الأجازة ..

وخلصت الأجازة .. وكالعادة .. كالعادة .. كالعادة .. كانت حتة أجازة فزيييييييييييعة .. تحفة تحفة تحفة .. ماعملناش فيها أي حاجة من اللي كنا ناويين نعملها إلا أقل القليل .. يعني البداية واللي كانت أول برنامج الأجازة رحلة دريم بارك .. الرحلة دي كنا حاجزين فيها من قبل الامتحانات واتلغت قبل ميعادها بيومين .. وبكده راح أول البرنامج .. وبدأت القعدة في البيت والملل والزهق وبداية العد التنازلي وانتظار بداية الدراسة عشان نخلص من الملل ..

لكن طبعا مش ممكن ننسى الإنجاز العظيم اللي أنجزناه بإننا زورنا صاحبتنا اللي إتجوزت من أربع شهور تقريبا وماكناش روحنالها .. تبقى حاجة من الحاجات أهيه تمت بحمد الله .. وبعد أيام من بداية الأجازة بدأ الحدث السنوي .. افتتاح معرض الكتاب .. وده طبعا مشواري السنوي حبيبي اللي ما بقدرش أتغيب عنه أنا وميرو حبيبتي .. وفعلا روحنا معرض الكتاب وده يوم في السنة بيتم كل سنة بنفس الشكل والتفاصيل مع الفارق السنة دي إن كان معانا أصحاب ليا أنا وميرو وهما الحاجة الوحيدة اللي إتغيرت في مشوارنا ده السنة دي لما أضافوه من مرح أكثر على اليوم وبجد كان يوم حلو أوي .. لكن بالنسبة لمعرض الكتاب لم يجد فيه جديد هو هو معرض الكتاب بكتبه بزحمته الغير طبيعية بإرتفاع أسعار كتبه الغير عادي .. لا فيه حاجة كانت جديدة علينا السنة دي وقفة الطابور .. كان فيه حتة طابور للدخول .. عجب .. طابور أوله عند باب الدخول وأخره عند باب الخروج من المعرض .. ههههههه اه والله .. ودي كانت أول مرة نقف فيه أو نشوفه اساسا واللي طبعا ما بطلناش لا تريقة ولا ضحك فيه لغاية ما اتحرك ودخلنا .. من الحاجات الأساسية بقى اللي ما اتغيرتش في هذا الحدث السنوي اعتراضاتي الثابتة اللي ما بلاقيش حد يرد عليها وهي - إن يعني إيه حدث رهيب زي ده بيحصل مرة واحدة في السنة وما يكونش غير اسبوعين ولا اسبوعين وكام يوم .. ليه يعني هيحصل إيه لو زاد عن كده مما يتيح الفرصة للنزول مرة واتنين وسبعتاشر .. مع إني مش عارفه الاتنين والسبعتاشر دول مين اللي هيجيب فلوسهم منين بس ماليش دعوة .. وده الاعتراض الثاني طبعا إرتفاع أسعار الكتب بشكل غير عادي زي ما يكون الناس بتموت في الكتب وهما اللي كارهين .. المفروض العكس عشان الناس تتشجع وتحاول تحب القراءة أو حتى يدوا فرصة لحد يهادي بكتاب يشجع بيه حد انه يقرا .. لأ هما بيقفلوها من كل الجوانب عشان ماحدش يقرا .. حاجة تانية بقى ودي حاجة ولا كل الحاجات وهي وجود الناس اللي لا ليهم في الكتب ولا القراءة زيادة وزحمة مش أكتر .. يالهوووووووووي على اللي في المعرض من شغل رحلات وجناين وناس بقى فارشة في المساحات الخضرا الصغيرة اللي في المعرض وكشري بقى وتــُرمس الشاي ويللا يا خالتو عشان نتغدااااااااا .. يختييييييي على اللي شوفناه .. يا أخوانا ده معرض الكتاب مش حديقة الحيوان ..

بس برضو كان يوم جميل ويمكن يكون أهم حاجة أو الحاجة الوحيدة اللي حصلت في الأجازة دي .. وخلصت الأجازة .. وكل أجازة وانتوا طيبين ..