حتى لا ننسى ولا ينسوا .. يوم تدوين الشهيد

أما شوفت ايفنت يوم تدوين الشهيد حسيت اني حابه أشارك جدا .. بس كل اللي جه في بالي هو "إزاي؟" .. إزاي أدون عن الشهداء؟ .. ناس زي دي أكتب عنهم إزاي وأكتب عنهم إيه ؟.. دي ناس فوق مستوى عقلي أو قلمي إنهم يكتبوا عنهم .. بالنسبة لي أوقات كتير بيكونوا الدليل الوحيد إن البلد دي حصل فيها ثورة .. أما الدنيا بتتكركب وتبقى شبه قبل الثورة من غير أي تغيير صورهم على حيطة أوضتي هي الحاجة الوحيدة اللي بتفكرني إن البلد دي قامت فيها ثورة والناس دي راحت فيها وماينفعش ننسى وحقهم يروح زي ما هما راحوا ..
بس إزاي أكتب عنهم؟ .. ما أنا لازم أكتب عنهم لإني مش هينفع أكتب ليهم .. هكتب ليهم إيه ؟ .. هكتب ليهم وأقولهم حقكم لسه ماجاش ؟.. أكتب ليهم وأقولهم إن فيه ناس هتروح في اليوم اللي انتوا ضحيتوا بحياتكم عشانه وينتخبوا شفيق وموسى ؟ .. ف لازم أكتب عنهم وأنا ماعرفش أكتب عنهم
طول عمرنا بنسمع كلام وأغاني عن إن الواحد يضحي بحياته فدا بلده واللي عارفه اني بحبها وبحبها اوي كمان وزيي ناس كتير بيحبوها بس عمري ما تخيلت إن ده يحصل فعلا وبالشكل ده .. إنك تضحي بروحك عشانها ومش ف حرب .. إنك تموت عشان غيرك يعيش بكرامة ويعيش كإنسان بجد .. عمري ما تخيلت إن يكون فيه ناس كده .. هما فعلا بالنسبة لي أشبه بحلم .. حلم جميل جه ومشي وساب جوانا انطباع رائع عمر ما حد يقدر يمحيه مهما حصل
هيفضلوا دايما معانا وفاكرينهم وجميلهم في رقبتنا ليوم ما نتقابل تاني .. زي ما دايما إحساسي إن ليا أخ في الميدان .. يمكن عمري ما شوفته ولا عرفته .. بس اعرفه كويس جدا وعارفه اوي انه يخُصني ودمه حق في رقبتي .. وكل يوم حلو هشوفه في البلد دي او حاجة حلوة هتحصل فيها ف إحنا مديونين بيها ليهم .. هما بس - بعد ربنا - أصحاب الفضل فيها مش اي حد تاني
هيفضل دايما الشهيد ابتسامة وجع في قلوبنا 

نادوا على إسم الولد
في الامتحان
قالوا الزمايل ده اتقتل
جوة الميدان
رفضوا البُكا
أصل البُكا
جايز على الحي اللي راضي بالمزَلّة
أما اللي مات هو اللي لساه
إنسان .

 
الشاعر/ مايكل عادل