قطع ايدك ولسانك وخزء عينك :)

الأيام اللي فاتت قريت كلام كتير من بنات أكتر في حملة " قطع إيدك " .. كل الكلام اللي قريته فكرني بشكلي أما ببقى ماشية لوحدي ف الشارع واللي رسمته وقررته من أول ما بدأت أخرج لوحدي من وأنا في إعدادي مثلا .. وهو مشية عسكري بالخطوة السريعة ووش مكشر غبي - واللي برضو بيبقوا سبب للمعاكسه عاااادي جدا كموضوع جديد يعلق عليه - .. 
 
- فكرني كمان بأمنيتي اني أمشي دايما بعصاية في إيدي والقانون يسمحلي إني احطها في عين أي واحد يبصلي بصة ماتعجبنيش .. 
 
- فكرني بأما كنت ماشية في الشارع من كام يوم وكان نفسي أضرب واحد في محطة المترو بسبب الطريقة اللي كان باصص - أو بمعنى أصح متفحص - بيها البنت اللي ماشية أدامي واللي جابها من فوقها لتحتها لدرجة انه غير من وقفته ولف وراها عشان يكمل فرجه بعد ما هي عدته .. - وعلى فكره كانت محجبه ولابسه لبس طبيعي وعادي وماشية مع مامتها - .. الموضوع عند المتحرش مابقاش زي ماهو عند الناس اللي بيتهموا البنات - إن شوف هي لابسه ايه اصلا .. تستاهل اللي يجرالها - .. لا خالص مابقيتش كده من زمان ..
ده ممكن تلاقيه بيبدأ كلامه بالثناء عليها " محترمة اوي بس .................. وأي كلام زباله بعد كده " .. حتى لو ماكانش كلام فيه قلة أدب فأنا شايفاه تعدي على حقي في اني امشي في الشارع في سلام من غير ما اسمع صوتك المقرف المحمل بكلام متوجهلي أيا كان شكل الكلام .. 
 
- فكرني بإن كلامك الزبالة أو بصتك القذرة بيخلوني حاسه ان دماغي بتغلي وعايزة اقتلك لانك تعديت حدودك وتعديت على حقوقي الشخصية والشخصية زيادة عن اللزوم كمان .. ده أبسط حقوقي في الحياة اني امشي في الشارع براحتي من غير ما حيوان زيك يتخطى حدودي .. 
 
- فكرني بكرهي لاحساس اني محمية من حد تاني أنا من غيره ماليش الحق في المشي في سلام من لسان قذر وعين عايزة تدب فيها رصاصه .. بكره كل حاجة حواليا أما أشوف واحد ناوي على السخافة ويرجع عنها بسرعة لمجرد انه خد باله اني مش لوحدي .. مين قال اني افضل محتاجه وصاية وحماية وحرس عشان امشي في الشارع .. بجد ده شيء مقرف 
 
- فكرني كمان بحنيني وانا ماشيه زي العسكري اني امشي في الشارع بسمع أغاني ومبتسمة للحياة من غير سبب .. ماهو مش شارع أمك 
 
بنوتاتي واخواتي في المعاناة والاعتراض .. في كل اللي قريته الايام اللي فاتت مش معترضة عليكي غير في احساسك بالذنب والضعف .. ما ينفعش يبقى اللي بيتهدر وبيُعتدى عليه ويضيع هو حقي وأنا اللي احس بالذنب والضعف .. إزاي يبقى هو اللي حيوان وأنا اللي آخد على دماغي .. اجمدي وعلي صوتك وخدي حقك انتي مش ضعيفة وليكي حق 
 
أيها الكائن الحيوان .. الشارع لينا مش ليك لوحدك .. احترم نفسك وحاول ترجع بني آدم
 



* الصورة من رسم الفنان أنديل