بداية ف دول تَذكِرة بقضية خالد سعيد
زي بُكرة من سنة اتقتل خالد سعيد
خالد سعيد اللي انا شخصيا بشوف انه سبب رئيسي من أسباب قيام ثورة 25 يناير .. فيه ناس كتير ممكن تقول لا مش خالد السبب في قيام ثورة 25 يناير والاسباب كانت حاجات تانية كتير وحاجات اكبر من موت خالد كمان .. وانا مش هعترض ماشي اوك انا مع كل حد بيقول كده وان الناس كانت خلاص لازم تنفجر لانها اتملت على الآخر من كل حاجة بتحصل حواليهم .. بس بالنسبة لي برضو خالد السبب يمكن من وجهة نظري بشكل مختلف .. الشكل ده هو إن انا لأول مرة أشوف أمهات وأباء نازلين مع أولادهم الشباب اللي من سننا في مظاهرات كان بسبب قتل خالد .. أول مرة أشوف العدد الرهيب ده من الشباب في جميع المحافظات واقفين في وقفات صامتة متحضرة جدا على كل كورنيش في البلد ومتجمعين على حاجة غير الكورة كان بسبب قتل خالد
أنا شايفة إن خالد ليه فضل كبيييييير أوي في الموضوع ده .. و ف إن الأعداد الرهيبة دي من الناس باختلاف كلللللل حاجة .. دين ونوع وسن و طبقة اجتماعية وثقافة وكل حاجة اتجمعت وقررت إنها تطالب بحق الشاب ده ومن بعدها المطالبة بحقوقهم هما شخصيا .. بالنسبة لي خالد هو اللي نزل الناس الشارع .. هو اللي بطل ناس كتير من أباء وأمهات يقولوا لولادهم امشوا جنب الحيط لانهم شافوا ان حتى اللي ماشي جنب الحيط بقوا بيلبسوه في الحيط ويموتوه .. فبدل
ما يقعدوهم جنبهم بقوا ينزلوا معاهم
من يوم ما شوفت صوره قبل وبعد اللي حصله وقريت وتابعت قضيته وعيطت عليه بحرقه وأنا بحس إني أعرفه من
زمااااااان .. أيا كانت صفة معرفتي بيه دي إيه .. كنت دايما بستغرب حبي ليه ودفاعي عنه كأنه جاري اللي متربيين مع بعض أو زميلي اللي بشوفه كل يوم أو صديقي اللي اعرف عنه كل حاجة .. رغم إن كل معرفتي بيه هي صوره وقضيته وكلام الناس عنه زيي زي أي حد
زي بُكرة من سنة اتقتل خالد ولسه حقه مارجعش .. عشان كده لازم ننزل بكره كلنا عشان حق خالد لازم يرجع .. وعشان خالد يعرف إننا لسه فاكرينه ومش هنسيب حقه
وهنا هتلاقوا أماكن الوقفات الصامتة بتاعة بكرة إن شاء الله
5 comments:
ان شاء الله حقه و حق كل الشهداء يرجع
,, و يبقى اقل حاجة نقدر نعملها ليهم
خالد سعيد فعلا وللاسف مات بلفافة بانجو وممكن تتاكدي من جيرانة في اسكندرية ولذلك الجميع الان يسمي ما حدث في 25 يناير بثورة البانجو ولابد من اقامة تمثال بحجم كبير للمرحوم ان شاء الله خالد سعيد وفي يدية لفافة با نجو وان يكتب تحتها بانجو لكل مواطن والله انا حزين اني بتكلم كدة علي واحد ميت لكن تلك هي الحقيقة وللاسف
ياريت تدخلي علي مدونة قطة الصحراء ومفيهاش اي حاجة لو تروحي اسكندرية وتسألي بنفسك وتحيا ثورة البانجو
Nour
ياااااااااااااارب يا نور
Anonymous ..
انا حزينة اكتر منك انك بتتكلم كده على واحد ميت .. واللي يحزن اكتر انك بتتكلم كده عن ثورة مات فيها المئات واتصاب فيها الالاف وخالد ماكانش سببها الوحيد عشان لو طلع فعلا زي مانت بتقول خالد اللي موتته لفافة البانجو زي ما تقرير الكارتون بتاع الطب الشرعي ما قال فبرضو عمرها ما هتبقى ثورة البانجو على حد قولك ..
وعموما انا عملت زي مانت قولت ومريت مرور سريع كده على مدونة قطة الصحراء اللي شوفت فيها رأيكم في الثورة من الاساس مش بس في خالد يعني واللي طبعا مش هتفق معاكم فيه ابدااا لكن طبعا رأيكم وانتوا أحرار فيه
Post a Comment