.. تقرير غياب .. وحشتوني وحشتوني وحشتوني

عدنااااااا

بجد وحشتوني وحشتوني وحشتوني .. والبلوج وحشني والرغي والكلام وكل حاجة

أخيرا عرفت اجي تاني .. صحيح انا كنت موجودة على فترات بس غايبة إلى حد ما شوية كده بسبب شوية حاجات هتيجي في تقرير الغياب

أولا .. بصراحة بصراحة الغياب الأول كان تقريبا خلص الكلام .. سكت الكلام .. مش عارفه اهو ماكانش فيه كلام والسلام

ثانيا .. الكمبيوتر جاب اخره وكان خلاص طلب الاستغاثة وكان لازم يتصلح .. فراح يتصلح

ثالثا .. ينفع الكمبيوتر يتصلح كده وانا اتهنا وما يبقاش عندي مشاكل والحياة تبقى بمبي .. لا طبعا .. النت فصل 4 أيام متواصلة .. اصل انا عندي الكمبيوتر والنت متفقين عليا .. هما المتحكمين مش انا

:)

رابعا وأخيرا .. العيد الصغير جه قبل العيد الكبير :) .. طبعا كلكم بتقولوا عليا هبلة .. وايه الجديد ما دايما العيد الصغير بييجي قبل العيد الكبير .. بس انا ما قصدش عيد الكحك وعيد اللحمة وكده .. لا خالص .. الجملة هنا ليها حوار تاني خالص هقولهولكم

العيد الصغير بييجي قبل العيد الكبير

الجملة دي الجملة اللي دايما كانت بتتقال لماما أما نبقى بنتكلم في عيلتنا على حوارات الجواز والخطوبة وإن كل واحد ونصيبه مفيش حوار الكبير الاول والصغير يستنى والكلام ده .. وكانت دايما امي تقول استحالة اجوز الصغيرة ولا اسيبها تتخطب حتى قبل اختها الكبيرة .. بس على مين اقنعتها وخليتها توافق إن أختى الصغيرة تتخطب قبلي .. ويا دبلة الخطوبة عقبالنا كلنا

:)

وده كان سبب الغياب الرابع .. خطوبة أختي .. عقبال عندكم جميعا .. لولولولولولللللييييييييييي

على فكرة على فكرة قبل ما أمشي .. في الفترة اللي غيبت فيها دي اتفرجت على أجمد عرض اتفرجت عليه في حياتي وأكيد ان شاء الله البوست الجاي هيكون عنه وهو عرض مسرحية

قهوة سادة

أجمد ناس تضحكك لحد ماتعيط

:)