ده كلام مالهوش لا بداية ولا نهاية .. مجرد كلام .. كلام وبس .. أصلنا أيام امتحانات وأيام الامتحانات الواحد بيبقى كلامه كتير وقليل
كتير عشان عنده كلام كتير عايز يقوله أو أهو بيرغي في أي حاجة تخرجه من موود المذاكرة والسلام .. وقليل لانه من كتر ماهو مخنوق ومش طايق نفسه بسبب الامتحانات فمش عايز يتكلم
الواحد اتعود إن دايما أيام الامتحانات بيظهر فيها حاجات بتلمع ادام عينيه طول الوقت وتبعده عن المذاكرة وتشغله .. زي الأفلام اللي بيموت فيها وأجمد الأفلام اللي بتتجمع كلها لوقت الامتحانات - زي هاري بوتر اللي دايما لازم ييجي ليلة امتحاني - والبرامج والمسرحيات والحركات .. وده عارفينه كل سنة .. انما المره دي اتقرر إننا ننشغل بشكل مختلف شكل أكثر فاعلية .. ضرب غزة قبل الامتحانات بكام يوم .. واللي مش هحكي طبعا عمل إيه في الكل .. والأخبار والتقريرات والتنديدات والاتهامات والاجتماعات والاتصالات وكل ما هو ات .. واللي مابيأتيش من وراه حاجة اساسا
أما الواحد يبقى قاعد بيذاكر حقوق انسان وقانون دولي ومجلس الأمن وقراراته الواجبة الاحترام والتنفيذ ومحكمة العدل الدولية وقراراتهم الملزمة .. ويخلص مذاكرة ويقوم يفتح التليفزيون عشان يشوف الأخبار والأحداث وصلت فين أو بمعنى أصح عدد الناس اللي رايحين ادام عينينا وصل لكام .. يلاقي مكتوب في شريط الأخبار مجلس الأمن يقرر وقف اطلاق النار الفوري في غزة .. وبعدها بكام عنوان أولمرت يعتبر قرار مجلس الأمن غير قابل للتطبيق
يا ترى المفروض إن الواحد المذاكر ده يروح تاني يوم الامتحان يكتب إيه .. يكتب اللي بيقوله الكتاب ولا اللي بيقوله الواقع والأخبار
أما تلاقي الأخبار جايبالك أطفال فضلوا محجوزين في بيت 4 أيام متعلقين بجثث أهاليهم 4 أيام لا أكل ولا شرب وعايشين مع جثث عيلتهم .. رعب وفزع وجوع ويُتم وضياع ومصير مجهول ومع كل ده مطلوب اني أكتب في الامتحان ان حقوق الإنسان محفوظة وقرارات مجلس الأمن مُلزمة وبتتنفذ والحياة وردي واللي يقول غير كده الله يحرقه .. ما علينا أنا هسكت بقى عشان أنا قولت من الأول إن الكلام ده لا ليه عندي بداية ولا ليه نهاية
حسبي الله ونعم الوكيل
8 comments:
المهم ان انتى تكتبي فى الامتحان اى كلام
والدكتور يشوف ان في كلام مكتوب عشان يعرف يحاسبك عليه
اما بقي فايه هي علاقه الكلام اللى انتى هتكتبيه بالواقع
فانتى ملكيش اى دعوه عشان ميبقاش الواقع عليكي انك تسقطي بعد الشر وشدي حيلك والتزمي بالقانون الدولي للمذاكره وحقوق الانسان فى في اللجنه اعرفيها كويس عشان محدش يضحك عليكي مع تحيات مراسلنا من داخل احد لجان الامتحانات
معاااذ .. تصدق مش مصدقة نفسي انك هنا .. اه والله .. بس دي حاجة كويسه يعني اكيد مخلياني مبسوطة
وبالنسبة للامتحانات ف والله يا معاذ بحاول صحيح ببقى ضاغطه عليا وهكسر القلم وانا بكتب وهتشل بس اديني بحاول
وانت ابقى اعملها تاني وفرحني بوجودك كده
:)
هعملها تانى اهو واقولك انى ظاغط على نفسي بالعافية وبعصر على نفسي لمون عشان اسكت القرد اللى بيتنطط فى دماغي واعرف اذاكر عندي امتحان بكره وربنا يستر ومش هنقلبها شات بقي )D:
هههه .. وما نقلبهاش شات ليه ده البلوج ده بتاعي مش بتاع حد تاني ما تخافش .. بعدين عندك امتحان بكره ايه اللي مقعدك على الكومبيوتر قوم يابني انت شوف مذاكرتك مش عايزين تهريج قوم
بس ابقى تعالى تاني برضو بس في يوم ماعندكش فيه امتحان
:)
السلام عليكم .
أولا حمد الله على السلامة أنا قلت إيه الغيبة الطويلة دي بس طلع عندك إمتحانات .
ربنا معاكي ويوفقك إن شاء الله .
واكتبي ألفي الكتاب وفي الأخر حل أخر وتكتبي عناوين الأخبار .
والدكتور هيعرف انتي عايزه تقولي إيه بالظبط .
بس مليش دعوه بلعواقب الهتحصل هههههه .
تحياتي لكي .
وعليكم السلام ورحمة الله وبركاته
ههههههههه .. حل كويس برضو واهو يطلع من اللي جوايا شوية بغض النظر عن البيعه اللي انت بعتهالي في اخر الكومينت بس شغال
الله يسلمك يا نور .. ووالله ردودك كانت وحشتني .. بس الامتحانات بقى هنعمل ايه .. ربنا يفك اسرنا على خير
:)
هاري بوتر مين ومسرحيات ايه بس؟
الكلام ده كان أيام ثانوي
إمتحانات الجامعة جو تاني
دا أنا لو جم قالولي أسيب المذاكرة ليلة الإمتحان ويديوني ألف جنيه
أسيب المذاكرة طبعا... الدور التاني موجود
:)
ربنا معاكي ومعاهم ومعانا
محمد يوسف
ايه الهنا اللي انا فيه ده .. ليك وحشة يابني والله العظيم .. الحمد لله انك لسه فاكر سكة المدونات
وزي مانت قولت ربنا معاهم ومعانا ومعاك انت كمان واشوفك كده يا محمد مابتمتحنش احسن انا تعبتلك
:)
يااااارب يعرف ييجي تاني
:D
Post a Comment