.. أجازة مصيف

هدوم .....وشنط ....... وكتب ........ وقلم ........وكشكول ........ وكركبه...... كركبه....... كركبه .. آآآآآآآآآآآآآآآآآآه

لا بسيطة ما تتخضوش ده آثر التحضير للمصيف

:)

يا عيني همشي واسيبكم اسبوع بحااااااله .. معلش معلش ماتزعلوش .. لالالا مش عايزة حد يعيط ده هو اسبوع واحد وراجعه تاني ان شاء الله على قلبكوا

:)

ايه رأيكم في الجو ده .. انا قلت بدل ما اغيب كده فجأة في ظروف غامضة أجي اقولكم اني ماشيه واوصيكم على بعض وعلى البلوج وعلى البنت ميرو حبيبتي احسن قاعدة لوحدها

خلوا بالكم من بعض يا ولاد وبلاش مشاكل وماتضربوش بعض .. حبو بعض كده والعبوا مع بعض ما تتخانقوش - على رأي طنط نيلي - مش عايزة ارجع الاقي حاجة مكسورة ولا متبهدله واللي هيقعد كويس ويسمع الكلام هجيبله حاجة حلوة وانا جايه - ده كلام طبعا ولا هتشوفوا حاجة - هههه

يلا اسيبكم انا بقى واكمل كركبة

هتوحشوني موووووووت

وابقوا عبروا التاج اللي كلكم متكهربين منه ده

:)

الصورة على فكره من تصويري الفزززييييييييع *

والحاجة اللي ماحدش مصدقها من السنة اللي فاتت لغاية النهاردة ان ده شروق مش غروب

وحياة ربنا شروق

:)

.. تاجين في الراس توجع

ما شاء الله عليا التاجين متأخرة فيهم موووووت

واتمنى ان اصحابهم يسامحوني على التأخير ويعدوهالي

التاج الأول ده مثلا أنا متأخرة فيه بتاع كام شهر مثلا

يعني التاج الثاني يحمد ربنا :) يلا نبدأ بقى

التاج الأول

من إيمي صاحبة مدونة برميل فاضي - ربنا يطمني عليكي يا ايمي -

أذكر 5 أحلام على الاقل تخص ماضيك وتحلم فيها بتغيير أشياء ماذا ستعدل وماذا ستترك ؟

أولا : وأنا صغيرة كنت بحلم أعزف على آلة الكمان أو الأرج ولغاية النهاردة عمري ما لمستهم بس الحلم اتحول وبقيت هموت واتعلم جيتار .. بحب الآلة دي موووووووت

ثانيا : كان نفسي أدخل كلية آداب علم نفس أو علم اجتماع حاجة كده من الحاجات بتاعة الدخول جوا البني آدمين دي وبالثانوية العامة والتنيسق ده ماحصلش طبعا ورسيت على حقوق .. انما بالنسبة لي فهو حلم لسه قدامي ومش عايزة اتنازل عنه

ثالثا : وأنا في ابتدائي أكيد كان حلم بالنسبة لي إني أبقى مدرسة عشان القلم الأحمر والقلم بتاع الطباشير .. لكن طبعا أول ما طولي سمحلي بالكتابة على السبورة ومسكت قلم الطباشير واتحقق حلمي خلص خالص الموضوع ده .. قال مدرسة قال .. مين دي ؟

رابعا : كنت بحلم وانا صغيرة برضو إني أركب طيارة ولسه برضو ده ماحصلش .. أديني مستنية

خامسا : دايما بحلم ان انا و ميرو يبقالنا شقة لوحدنا مفيهاش حد غيرنا احنا الاتنين .. نبقى احنا اللي بنعمل فيها كل حاجة واحنا اللي متحكمين في كل حاجة فيها طبعا... مش بتاعتنا

:)
فيه حلم كده افتكرته زياده .. كنت دايما وانا صغيره نفسي اشتغل في مكتبة كنت بحب اوي وقفة صاحب المكتبة وسط الكشاكيل والاقلام والحركات دي .. بس حاليا الموضوع اختلف بالنسبة لي اما كبرت بقيت همووت واعمل مكتبة .. كتب بقى مش كشاكيل واقلام وشغل العيال اللي كنت فيه ده حاجة كده زي "عمر بوك ستور" .. الحلم ده بقى عندي الفترة دي بطريقة مش طبيعيه بطريقه كده توصله انه يكون هدف اكتر من انه حلم

أذكر 5 أحلام على الأقل تخص مستقبلك ؟

أولا : بحلم أخلص دراسة على خير

ثانيا : بحلم أكون شخصية كويسة بتحب الناس والناس بتحبها .. وبتعمل خير كتير .. وياسلام لو تبقى نافعه لدينها كمان وتبقى حاجة كويسه كده يرضاها ربنا سبحانه وتعالى والرسول عليه الصلاة والسلام

ثالثا : بحلم إن في يوم من الأيام بابا وماما يكونوا فرحانين بيا أوي ماعرفش بسبب ايه بالظبط ماليش دعوة اساسا المهم انهم يبقوا فرحانين والسلام

رابعا : طبعا طبعا طبعا بحلم إن أنا و ميرو حبيبتي نفضل أصحاب للأبد ويا سلام يا سلام يا سلام لو في يوم من الأيام نبقى ساكنين في نفس المكان يااااااااااااه

خامسا : ده حلم بقى حاجة كده لوحده .. حياه بحالها مش مجرد حلم .. بحلم إني يوم ما يبقى عندي بيت - ده لو بقى عندي يعني في ظل الظروف المحيطة بمجتمعنا الجامد الفيظع ابو عيون جريئة :) - يكون بيت جميل بمعنى انه يكون بيت هادي ومستقر ومطرقع ومرح ورومانسي ..... إلخ .. بيت كده يغير كل المفاهيم الروتينيه لكل اللي حواليه .. بيت فيه أسرة صغنتوتة مبسوطة .. واحد وواحدة كل حد فيهم بيعمل اللي يرضي التاني ويسعده وهما الاتنين بيعملوا كل اللي يقدروا عليه عشان يسعدوا أطفالهم ويطلعوهم شباب أو بنات كويسين أوي وفاهمين دينهم ونافعين ليه .. بيت كده حاجة حلوة يعني

أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟

الأول : ميرو .. اعتقد اننا لو كنا اتقابلنا في الحضانة مثلا بدل الثانوي كنت هبقى حد تاني .. لا انا متأكده مش اعتقد بس أكيد كنت هبقى واحدة تانية غيري تماما .. لا كان هيبقى فيه هدوء ولا عقل ولا بتاع .. يلا الحمد لله ربنا ستر .. نحمد ربنا انها جت على اد كده

التاني : دي بقى هخليها عامة شوية يعني مش متوقفه على انه لازم يكون انسان أو حد واحد كمان .. يبقى نقول مدونتي حبيبتي .. وكل أصدقاء مدونتي اللي عرفتهم منها .. وأجمل صفحتين عرفتهم في حياتي صفحتين ضربة شمس من جرنال الدستور الاسبوعي واصدقائي اللي عرفتهم منها

أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟

جدتي وعمي الله يرحمهم

تهدي التاج لمين ؟

خليها في الآخر

وندخل على التاج التاني .. آآآآآآه ياني انا تعبت .. مش هاخد نفسي ولا ايه

والتاج التاني من صديقي العزيز .. محمد ناجح .. ابن مصر

اكتب 16 صفة عن نفسك

امممممممم .. بحس انه صعب اوي موضوع عن نفسك ده بس هحاول وربنا يفتحها عليا

.. ممكن نقول

هادية طول ما انا في حالي .. عصبية جدا واتنرفز بسهولة موووت ..طيبة بس الأغلبية العظمى بتقول هبله ..رومانسية ..طويلة .. أكبر مشكلة في حياتي اني موودية جدا يعني حالي ممكن يتغير اربع خمس مرات في اليوم من غير اي سبب موود مالهوش علاقة بأي حاجة - ماما بسبب ده بتقول عليا بعفريت مابثبتش على حال - .. بحب الروايات مووت .. بكره الكدب .. بكره الروتين .. بعشق اسكندرية .. الصداع بالنسبة لي مابقاش مرض بقى صفة من صفاتي .. الصداقة بالنسبة لي شيء مهم جدا اذا ماكنش الأهم .. اعتقد اني عاقله إلى حد ما .. او عشان مابقاش كده اوي ولا كده اوي فنقول اني احيانا عاقله واحيانا عيلة .. بحب الضحك والهزار جدا .. بتخنق مووت من الناس المنشّية - مش بتاعة اسكندرية - اللي مابتحبش الهزار .. بحب الخروج لكن ماعنديش مشكلة اوي من قعدة البيت .. بحب السهر اوي وبحب النوم جدا بمعنى اني طول ما انا صاحيه فأنا مستمتعه لكن مادام نمت ماتصحينيش .. اكيد طبعا بعشق القمر والبحر والليل والصبح بس في اوله اوي - الصبح ده طبعا بما اني صاحيه من بالليل لكن ما تصحينيش بدري وتقولي الصبح اهوه لا مش عايزاه شكرا - هههه .. بحب الملاهي جدااااا .. بحب البلد دي موووووووت .. بحب اهلي واصحابي جدا .. بحب كل شيء بسيط .. ممكن كتير جدا احب حاجات اوي وتبقى بالنسبة لي حاجة كبيرة والناس كلها تكون شايفاها حاجات هبله

انا رغيت كتير اوي وكل اللي افتكرته قولته واعتقد انهم بقوا اكتر من اللي عايزة السؤال

اللي ماحدش عمله بقى في السؤال ده اني قبل ما اقعد احاول اكتب كده الصفات قولت لميرو النيرو كوانيرو صاحبتي الحلوة دي تعمله هي وتكتب ال 16 صفة اللي هي شايفاهم فيا وياريتني ما قولت

:)

اتفرجوا .. ده اللي كاتباه ميرو بخط كيبوردها

رومانسية وحالمة طبعا*
هادية طبعتين*
بحبها اوي وهي بتضحك*
بتحب: مطعم مؤمن وعمير ابن بنت خالتها والماج بتاعها والنت و الوقفة في الشباك بليل*

والكابتـشينو و اللون البتنجاني واسكندرية و الروايات والقمر وتيمون وبومبة
عمري ما شفتها منكوشة*
صوابعها أرفع من صوابعي*
بتعيط كتـيييييييـر*
بتحب احمد زكي واحمد حلمي وانغام و كاتبها المفضل طارق امام*
ناقر ونقير هي واخواتها ودلوعة مامتها وحبيبة خالتها*
نفسي اخليها تغير ظبطة ايشاربها *
عايزة حوض سمك كبير وكاميرا ديجيتال وسماعة للموبايل وبرينتر و كشكول سلك كبير*

وسي دي رايتر و تبيض أوضتها وتصلح الكمبيوتر
نفسها تـتـجوز واحد متدين على رومانسي على متفاهم على دمه خفيف*

وفوق كل ده لازم يكون طويل
بتعرف تكتم زعلها جواها وتعمل مكرونة طعمها حلو اوي*

وبتعرف تغسل المواعين من غير ما تـبل هدومها
مابتعرفش تحوّش فلوس ومابتعرفش تذاكر بليل ومابتعرفش تنام بدري*

ومابتعرفش توطي صوتها مادام اتنرفزت
"مقارنة بسيطة بين عبير زمان وعبير دلوقتي تخليك تؤمن جدا بمقولة "الزمن ياما بيغير*

اصلها كانت حد منطوي ومش بتخرج ومش بتختلط غير باتنين تلاته من الناس,, وانا ماينفعنيش الكلام الهادي ده
وكان لايمكن افضل صاحبتها وهي كدة
وحصل اللي محدش كان متوقعه وعبير بتاعت زمان دي راحت لحالها
كل ده علشان بقت صاحبتي طبعا,,, هع هع هع
اصل انا اصاحب واحدة منطوية وبتحب القعاد في البيت؟؟
ليه اعمل في نفسي كدة ليه انا؟؟؟
اتجننت في عقلي انا واللا ايه,,,, بس خلاص بقى ده كان زمان,,, "والزمن ياما بيغير"

اجمل حاجة حصلت في حياتي....هي*

وكانت دي الصفات اللي ميرو شايفاها فيا

:)

النقطة الأخيرة بقى في التاجين الفظيعين

الإهداااااااااااااااء

أهدي التاجين بقى لمييييييين ؟

بداية التاجين إهداء لكل حد هيعدي على البوست ده ياخدهم زي الشاطر الأمور كده ويجاوب ويناديني اتفرج

الإهداء المسمى بقى

صديقي الجميل اللي اهداني اول تاج في حياتي .. شادي أصلان

الصديق العزيز اللي اهداني التاج الثالث .. إبن مصر ادخل زي الشاطر كده خد التاج الاول يلا عشان التاني انت اللي باعتهولي طبعا

وزي ما قولت في الاول اي حد يعدي يحل على طول

يلا سلااااااااام

يالهووووووووي ايه ده كله .. انا كتبت كل ده !!!! رغي اهوه لا قبله ولا بعده .. مش عايزة حد يطلب مني بوست جديد قبل 6 سنين مثلا

:)

.. آسف على الإزعاج

أولا قبل ما أكتب أي حاجة عايزة اعتذر للصديق العزيز محمد ناجح على تأخير التاج للمرة التانية ونزول حاجة قبله .. سوري انا إن شاء الله هنزله بالكتير بكره او بعده .. بس بصراحه ماقدرتش أشوف الفيلم ده وماقولش عليه حاجات .. خلص الاعتذار نخش بقى على الفيلم

.. آسف على الإزعاج

فيلم أحمد حلمي الجديد .. إيه ده ؟! .. إيييييييييييه ده .. حتة فيلم مالهوش حل .. حاجة كده فوق الفظيع .. هو أولا والصدمة اللي فيه إن الفيلم مش كوميدي خاااااالص .. لكن أكتر من رائع .. طبعا فيه ضحك عشان ده احمد حلمي يعني حتى لو قعد ساكت سكوته بيضحك .. بس فعلا الفيلم مش كوميدي تماماااا ..

أحمد حلمي فيه قليل جدا إني أقول عليه رائع .. رائع إيه ده عبقري تمثيل .. الفيلم ده فعلا اللي بيثبت إن أحمد حلمي مش مجرد ممثل كوميدي ده ممثل عبقري .. فنان بجد .. لدرجة إن كان فيه مشهد في الفيلم اتمنيت فيه إن احمد كان يبقى موجود أو نكون في مسرح لإني كنت هموت وأقوم أسقف من روعة أداءه فيه .. حتة مشهد تحففففففففففة

نفسي جدا كمان أعرف ردود أفعال الناس هتبقى عامله إزاي بعد كام اسبوع كده وايرادات الفيلم واراء الصحافة هتبقى عامله إزاي .. لإني عارفه إن الناس هتتصدم .. لان الكل أكيد داخل مستني من أحمد حلمي فيلم كوميدي .. أنا شخصيا في الأول اتصدمت مش متعودة إني أبقى في فيلم لأحمد حلمي وماتبقاش الناس كلها مسخسخة من الضحك .. حتى أنا و ميرو صحبتي حبيبتي اتكلمنا في البريك على الموضوع ده .. اننا كنا خايفين إن ده يكون نقطة وقوع أحمد حلمي بعد النجاح الرهيب في ( كده رضا ) لكن بعد ما خلص الفيلم مش كنا مصدومين ده احنا كنا مبهورين من اللي هو عامله .. بجد فنان جاااااااااامد .. و آسف على الإزعاج .. آسف على الإزعاج دي بقى أعتقد إن أحمد عاملها مش عشان الفيلم .. لا خاااااااالص دي باعتهالنا احنا عشان اللي عمله فينا

عمري ما تخيلت ولا كان ييجي في بالي إني أدخلي فيلم لأحمد حلمي وبدل ما أضحك أعيط

ده ايه ده يارب يعني انا أنزل مخصوص عشان أضحك أقوم أعيط .. بس برضو فيلم أكتر من رائع وهتبسط أوي لو أحمد أخد عليه جايزة ..

حتى الاغنية بتاعة شيرين اللي في الفيلم تحفففففففه جامدة جدا جدا وماشيه معاه مووووت

وده كان آسف على الإزعاج

وللأسف مش هقدر أقولكم عن أي حاجة في قصة الفيلم لإنه ما ينفعش يتحرق ولا يتحكي لازم يتشاف لإني لو حرقتهولكم هتبقى الفكرة خنيقة وأنا كمان هبقى خنيقة أكتر منها

:)

أنا خلصت كلام مع اني يمكن لو سكت شويه هرجع اقول اكتر من كده ويمكن ناس تقول عليه مأفوره في الحوار بس ده بجد والله اللي حساه بالنسبة للفيلم ده فماحدش يزعل من أفورتي اللي هي مش مأفورة

:)

هجيب الصرصار من البلاعة وأحطه في عبك

هجيب الصرصار من البلاعة وأحطه في عبك

يالهوي هجيب الصرصار من البلاعة وأحطه في عبك ؟؟؟؟

دي واحدة بتقول كده لابنها .. ابنهااااااااا .. ابنها ده اللي هو أما أنا عديت من جنبه دماغه ماكانتش واصله لحد ركبتي حتى .. حاجة كده مايكملش 3 سنين مثلا

وياريته ساكت ده هو أصلا بيعيط .. ماحدش فاهم حاجة طبعا .. هقولكم أنا

أنا كنت ماشيه في أمان الله في الشارع لا بيا ولا عليا راجعة بيتنا .. ووأنا داخله الحي بتاعنا لقيت واحدة طنط ماشية هي وابنها الصغير - البائس الصغير - .. طفل كده ما يكملش 3 سنين يعني .. وهو عمال يعيط طول ما هما ماشيين - أصل اول مشهد لمحتهم فيه من أول الشارع كان باباه بيضربه وراح سايبهم وماشي -

تروح هي عشان تسكته تعمل إييييه ؟ ولا تقوله إيه تسكته بيه ؟؟

لقيتها فجأة راحت قايلاله " هجيب الصرصار من البلاعة وأحطه في عبك " ده في نفس ذات اللحظة اللي أنا معدية فيها من جنب الولد اللي بصيت تحت أوي عشان أشوف ملامحه اساسا

كان نفسي أوي أسأله ساعتها حاسس بإيه وهي بتقوله كده .. "هجيب الصرصار من البلاعة وأحطه في عبك " تفتكروا طفل بيتقالوا كده وهو في السن ده هيطلع شكله إيه ولا عامل إزاي ؟

بس تعرفوا .. الواد بصراحه طلع يستاهل يتقالوا كده .. أنا بعد ما عديتهم ودخلت العمارة فطست على روحي من الضحك .. أصل الولد طلع جبروت مووووت .. بعد ما قالتله كده راح سكت فجأة من عياطه .. فأنا قلت الواد اتسرع من الجملة .. طلع مش كده خاااااااااالص

هو سكت شوية لغاية ما وصل لبلاعة وراح قايلها بكل براءة

البلاعة دي ؟

ههههههههههه .. بكل براءة .. أنا حسيت ان أمه هتتشل

بس هو أكيد برضو رد فعله ده تعود مش أكتر يعني من كتر ما بتقوله الحاجات بتاعة الساحرة الشريرة وبيت الرعب دي ما بقاش فارق معاه

يلا ربنا يستر عليه فيما بعد .. اذا كان لسه صغير كده وهتجيب الصرصار من البلاعة وتحطه في عبه امال اما يكبر شويه هتخوفه بإيه

من وجهة نظري بعد الرد اللي هو رده عليها فماعتقدش انه هيبقى فيه خوف من الاساس .. ده عدى خلاص

:)

سوري على اني نزلت البوست ده قبل البوست بتاع التاجات اللي قولت عليه بس بصراحه ما قدرتش الموقف شدني اوي

.. شخبطة تدوينية

لماذا الآن أمسكت بالورقة والقلم رغم تأكدي من عدم وجود ما أخطه أو أكتبه ؟

فلا يوجد بداخلي ما يُكتب ولا ما أريد تدوينه .. فلا يوجد شيء محدد من الأساس .. لا وجود لشيء ظاهر أو واضح الملامح .. لا يوجد غير الفراغ والملل وبعض التخطيطات المشوشة وحالة من الاكتئاب غير المتزنة .. اكتئاب مترنح يزيد تارة وينقص تارة آخرى .. على حسب الأحوال والأجواء المحيطة .. حالة من الزهق والملل تجتاحني بشدة .. وليست هذه المرة كأي مرة .. فليست هي الحالة التي اعتدت عليها في أي أجازة طويلة .. ولكن الحالة في هذه المرة يساهم فيها كل من حولي بدوره .. بدأت بمرض أختي الصغيرة الذي ألزمني المنزل لأكثر من 3 أسابيع .. مرورا بإكتئاب أغلب من حولي من بشر .. وصولا إلى تعودي على الحالة إلى حد ما .. وكل هذا أصبح من أسباب هذه الحالة الخنيقة وهذا اللا شيء الممل ..

ولكني بدأت في الشعور ببعض الأمل في انتهاء هذه الحالة الخنيقة الممله .. فالمقادير بداخلي في اتجاهها إلى التساوي فالاكتئاب والملل المسيطرين على حياتي أصبحوا يتساوون مع نسبة الصرخة ضدهم .. فأعتقد أنني بذلك سأتخلص من هذه الحالة قريبا بما أنني رافضة للاستسلام لها .. فسأفعل كل ما في وسعي لأتخلص منها لأحول هذه الحالة الخنيقة من الاكتئاب والملل والزهق إلى الإنطلاق والاستمتاع بما تبقى من الاجازة ..

يااااااااااااااارب يا مسهل

واتمنى ان كل اللي يقرا البوست يسامحني لإني حاسه اني جبتلكم اكتئاب بمجرد القرايه من كمية الزهق اللي فيه ..

وانتظروا البوست القادم .. تاجين في تاج

او بمعنى اصح تاجين في الراس توجع

:)

.. أنا قلبي واجعني

أكثر الأوقات التي تشعر فيها بالعجز عندما يمر شخص قريب إلى قلبك بل أكثر الأشخاص قربا لقلبك بموقف عصيب يغير أحواله ويجعله يتألم

وتراه في كل يوم وهو يحاول إظهار عكس ما به .. فيبتسم في وجوه من حوله ويضحك ويتحامل على نفسه لإسعادهم وامتصاص معاناتهم .. والجميع يرى أنه بخير حال

ولكنك لا تستطيع أن تصدق كل ذلك .. فأنت ترى ما لا يراه الآخرين بمجرد النظر في عيونه .. بمجرد سماع صوته

فأنت ترى من ألمه ودمعه ما لا يـُظهره وما لا يستطيعون هم رؤيته .. فترى وتسمع من دموعه وحزنه ما يحاول إخفاؤه عن الجميع

وبالرغم من معرفتك وإحساسك بكل آلامه إلا أنك لا تستطيع أن تفعل له شيئا .. فأنت لا تملك سوى الكلام ومحاولاته في تخفيف الآلام .. فأنت مكتوف الأيدي لا تستطيع أن تفعل حيال آلامه أي شيء ليخرجه من حزنه ومما يعانيه .. وهذا هو ما يجعلك تشعر بالعجز

قلبك يتمزق ألما وينفطر دمعا لرؤيته على هذا الحال .. ولكن ما بيدك لتفعله .. لا شيء

.. فما أصعب أن تعجز أمام آلام من هم جزء من قلبك

جيراني الأعزاء .. شكرا

النبي وصى على سابع جار .. دايما بسمع الناس كلها بتقول كده في كل المواقف المتعلقة بالجيران .. بس اعتقد ان جيراننا الأعزاء ماسمعوش عن الموضوع ده :) .. يعني أنا مثلا بكتب البوست الساعة كام دلوقتي ؟ الساعة يا حضرات 5 بعد الفجر – واخدين بالكم انتوا من التوقيت - جيراني الأعزاء بقى بيعملوا إيه ؟ .. سيدات وأطفال العيلة كلهم تقريبا متجمعين عندهم النهاردة والعيلة كلها برضو بتتكلم في نفس واحد والكل بسم الله ماشاء الله مستوى الصوت عندهم غييييييير عاااااااادي غير عادي تماما .. مش صوت من اللي هو بتاع البني آدمين ده اللي بيخرج من الزور .. لالالا دول صوتهم تقريبا بيخرج من مواسير ..

في هذا الوقت من الليل اللي هو خلاص قرب يبقى نهار ..

أنا اللي هو أنا كنت خلاص صليت الفجر وداخله أنام .. هما لا .. هما عندهم الأطفال لسه صاحيين وبيلعبوا .. ما شاء الله على دي عيله قلبولي اليوم وقلبوا دماغي معاه .. أنا كنت قاعدة في الصالة عااااااادي جدا وماسكة كتاب عشان أقرا واسترخي يمكن أعرف انام بدل ما اقعد ادام التليفزيون ولا الكمبيوتر .. بس استرخاء مين وهدوء إيه وحياة ربنا أنا حاسة إني الظهر .. المغرب .. حاجة كده يعني .. استحالة ده يكون الفجر والناس دي عامله كده والعيال دي بتلعب وتصوت كده .. لا وف وسط ما العيال بيلعبوا وعمالين يزعقوا لبعض راحت واحدة طنط شاخطة فيهم " بس يا بت إتي وهي يا بت ال تيييييييييت الناس نايمة " طبعا الجملة دي بالصوت العادي و مخارج الحروف الطبيعية تبقى " بس يا بنت انتي وهي يا بنت ال تييييييييييت الناس نايمة " .. لا والله .. لا والنبي هو انتوا بتحسوا وكده وعارفين ان فيه ناس مخموده .. طب ما تبطلي زعيق اساسا يا ست الحاجة أم ابراهيم انتي وانخمدوا بقى انتوا كمان ..

أنا مش قادرة أوصفلكم بجد الموقف عامل إزاي وصوتهم وحكاويهم على العيلة كلها اللي الحي كله سامعها أساسا .. أنا كنت خلاااااااااااااص حاسه إني هخرج أصوت في الشباك بااااااااااااس إييييييييييه والناس تقول البت اتجننت ..

وده على فكره مش يوم استثنائي ده العادي بتاع جيراني الأعزاء .. دايما أما بسمعهم وهما عاملين كده بحاول أسرح بخيالي وأحاول اتخيل البيت اللي هما كانوا فيه قبل ما يشرفونا .. صدقوني لو انتوا في اللي انا فيه مش هتتخيلوا غير حاجة من اتنين .. يا بيت مرفوع على عمدان رافعاااااه للسما فمنه للهو على طول مافيش حواليهم حد .. يا بيت مرمي في أرض واااااااااااسعة ومافيش حواليه برضو أي حد عشان كده هما نسيوا الإحساس بالبني آدمين ..

وده كان بالنسبة لجيراني الأعزاء اللي للأسف شباكي لازق في شباكهم .. جيران الدور الأول وما أدراكم ما هو الدور الأول - ده أكيد هيبقى له بوست لوحده ومأساتي معاه - ربنا مايكتب عليكم..

زي بقى جيراني دول عندي ناس تانيين بس الحمد لله في الرابع يعني بعيد عني .. مشكلتي الوحيده معاهم الطلوع والنزول .. يعني تبقى العيلة كلها ماشاء الله طالعة من أول الجد مرورا بالأباء والامهات خالات وخيلان وعمام وعمات وصولا إلى الأحفاد ويبقوا بيرغوا كلهم برضو مع بعض من أول ما يدخوا من باب العمارة لغااااااااااية ما يطلعوا شقتهم في الرابع ونفس الحوار في النزول .. طب يا اخوانا يا بني آدمين مانتوا ليكم أم شقة ترغوا فيها يا طالعينها يا نازلين منها إيه لازمة الرغي والإزعاج على السلم .. وده طبعا في أي وقت وأي ساعة من النهار أو الليل ما بتفرقش في أي حاجة عندهم إن كانت 3 الفجر ولا 3 العصر مستوى الصوت هو هو حاجة كده صوت العرب :) ..

وزي مانتوا شايفين ماشاء الله جيراني كلهم تقريبا ماعندهمش لا إحساس بالوقت ولا بالناس وماسمعوش حاجة في حياتهم عن مستويات الصوت ..

نفسي أعزل وأطفش منهم بس للأسف والدي العزيز بيكره فكرة العزال .. وجو بيتنا حبيبنا وعشرتنا والكلام ده ..

وفي النهاية برضو هقول إيه .. حسبي الله ونعم الوكيل ..
والنبي وصى على سابع جار ..

انا قايمة انام قبل ما يجيلي انهيار عصبي منهم ..

.. معايا تاج .. معايا تاج .. لللالالللالا

أول تاج يتمررلي في حياتي التدوينية .. يا أهلا يا أهلا

أولا وقبل ما أبدأ الإجابة على اسئلة التاج اللي جاني من حيث لا أدري ولا اتوقع .. قولت احذركم من رغيي وياريت تستحملوه يعني ومش انا اللي عملت فيكم كده على فكره .. اللي عمل فيكم كده صديقي العزيز اللي مررلي التاج شادي أصلان .. وعايزة اقولكم كمان اني مهما رغيت فهو رغي مختصر .. ايووووون مختصر .. حاولت والله على اد ماقدر اختصر عشان دي اجابة اسئلة مش مقالات .. يلا بقى اسيبكم مع الرغي .. قصدي مع التاج
:)

التــــاج

هواياتي : ممكن نقول القراءة وأحيانا بشخبط – الكتابة يعني - ، وبسمع أغاني كتير جدااااااا ، وحاليا النت ومتابعة المدونات ، وبحب المشي جدا أحسن واحدة تمشي مسافات طويلة من غير ما تحس بالوقت مادام مشغلة حاجة مسلياني أو ماشية برغي مع حد ومستمتعه ، وتقشير الثوم بالنسبة لي هواية :)

أشهر عيوبي : العصبية .. أما بتعصب واتنرفز صوتي بيعلى وببقى مزفتة بزفت ، صحيح بحاول إني ما اتعصبش واتكتم بس المشكلة إني سهل جدا إن حد يستفزني وينرفزني ، ولو على العيوب من وجهة نظر الناس فهتلاقي كتيييييير يمكن لو رصيتهم تلاقوا إن أنا عيب أساسا يعني عيب في شكل بني آدم :) .. زي مثلا الطيبة اللي هما بيقولوا عليها هبل ، والهدوء ، والرومانسية الزايدة – من كام يوم مثلا صحبتي حبيبتي ميرو قالتلي انتي رومانسيتك طافحه عليكي صحيح انا مش فاهمه ازاي بس ماشي - ، القاعدة في حالي اللي هما بيقولوا عليها انطواء ..

حاجات بكرهها جدا : اممممممم .. الكذب ده أولا بكره الكذب جدا مش معنى كده اني مابكدبش لا أكيد بكدب بس الكدب الاهبل يعني الحمد لله عمري ما كدبت كدب يئذي حد ولا يعمل مشكلة .. فبكره الكدب ومابعرفش اتعامل مع الحد اللي ابقى عارفه انه كدب عليا او احس بكدبه ، بكره كمان إن حد يخليني أعمل حاجة أنا مش عايزة أعملها مهما كانت الحاجة دي صغيره او هبله لمجرد ان ليه سلطه عليا أيا كانت من قريب ولا من بعيد كبيرة ولا صغيره .. فعلا دي أكتر حاجة كرهتها في حياتي أو العكس إن حد يمنعني عن حاجة بحبها .. بكره كمان الروتين جداااااااااااا ، وبكره كتب التعليم مووووت ، بكره الامتحانات ، بكره الاستخفاف بتفكيري أو شخصيتي ومشاعري .. بكره اني اكون بكلم حد واحس بعدم اهتمامه ، بكره الخوف ، بكره التطفل .. واضح اني بكره حاجات كتير اوي ..

حاجات بحبها اوي ومش بمل من تكرارها : الكمبيوتر ، السفر لاسكندرية حبيبتي طبعا ، القاعدة والرغي مع ميرو حبي والخروج معاها ، التواجد مع ناس معينيين من صحابي وأهلي ، بحب الورقة والقلم جدا حتى لو مش هكتب بيهم اي حاجة تتفهم بس بحس بعشق بيني وبينهم ، بحب القاعدة ادام البحر وعمري ما أمل منها ، بحب المكرونة بكل أنواعها والبطاطس المحمرة وممكن أكلهم كل يوم :) ، بحب سماع الاغاني كتير ، بحب دباديبي جدا ومش بمل من الكلام معاهم ابدا – بس ماما بتقلق ساعتها على قوايا العقلية - ، بحب تيمون وبومبا مووت ، الفرجة على الافلام الاجنبي اللي بحبها والكارتون .. يعني وانا قاعدة بتفرج على فيلم اجنبي لا بشوف ولا بسمع غير الفيلم .. ممكن حد يعدي بيني وبين التليفزيون ويقولي حاجة ويخرج من البيت ولا اشوفه ولا اسمعه واما يخلص الفيلم اقوم اسأل عليه راح فين ..

سؤال بيستفزني جدا : أي سؤال غبي .. بكره الاسئلة اللي تحس فيها بالغباء وتحس انك عايز تناول اللي سألك بضهر ايدك تلزقه في الحيطة ، والسؤال برضو اللي ممكن تعرف إجابته من غير ما تسألني زي مثلا مين اللي اتصل واتصل الساعة كام بالظبط .. امال هما عملوا خاصية الاظهار دي ليه ولا احنا مشتركين فيها ليه اذا كان كل اللي جاله تليفون هيسألني انا عن بياناته ، والسؤال الفظيع الشنيع المريع اللي دايما بيتسئل للواحد أول ما يدخل من باب البيت واللي في البيت يشوفوه .. انت جيت يا مش عارفه مين ؟ واللي دايما بجاوب عليه ب لأ .. رخامه بقى :) .. واكيد اكيد اكيد كل الاسئلة الساذجة اللي بتتسئل للأطفال انت في سنة كام يا حبيبي ؟ بتحب ماما اكتر ولا بابا ؟ مين اللي جابلك المش عارفه ايه الحلو ده ؟ شاطر في المدرسة ؟ بتحب العربي اكتر ولا الحساب ؟ وانتوا مالكوا .. ما كل واحد يخليه في حاله يا بني آدمين ..

أمنيتي في الحياة : نفسي أمي وأبويا يكونوا راضيين عني عشان ربنا يرضا عني ، وهموت وأخلص دراسة ، نفسي أنا وميرو نفضل أصحاب وحبايب طوووول عمرنا ، نفسي كمان في واحد علي - ماحدش هيفهم غير ميرو – هبقى أقولكم بعدين ايه علي ده .. شويه كده .. نفسي اكون واحدة كويسه وافضل انا وماتغيرش عشان الناس عايزة تشوفني غيري وابقى عايشه حياة عادية وهادية بس مش هادية اوي يعني وبحب كل الناس والناس كمان بتحبني .. العادي يعني

حاجات مؤمنة بيها جدا : مؤمنة بإن كل واحد مكتوب له نصيب لازم ربنا هيبعتهوله واستحاله حد يقدر يمنعه عنه بس كل شيء بميعاد ..
مؤمنة كمان بإن أي حاجة تحصل للواحد لازم يرضا بيها ويحمد ربنا لانها اكيد فيها خير ليه حتى لو ده مش باين في اللي حصل اول ما حصل لكن اما بتهدى وتفكر فيه صح لازم هتلاقيه يا فيه خير يا بعد عنك شر ..

أكتر حاجة فاشل فيها : اكتر حاجة فاشله فيها فعلا هي بداية فتح علاقات اجتماعيه مع الناس وجها لوجه ، يعني عمري ما اعرف اروح اتعرف على ناس كده من نفسي فاشله مووت في الموضوع ده أو يمكن ما بحاولش .. بكسف مش بتكسف لا بكسف

:D

وظيفه بحبها : والله ماعرف

أخيرا وصلت للنهاية مثلي الأعلى في الحياة : بحس انه مش شرط يكون شخص بعينه أو حد مشهور أو .. أو .. أو .. اعتقد انه أي حد أخدت منه حاجة استفدت منها في حياتي أو علمتني حاجة جديدة .. بس لو عايزين ولازم شخص معين فيبقى تقولوا عمرو خالد .. بحب الراجل ده جدا وبحترم تفكيره وشخصيته وكلامه جدااااا .. واعتقد انه اكتر حد بيقدر يأثر في حياتي .. بس في غير كده ففعلا زي ما قولت في الاول مثلي الاعلى ممكن يكون أي حد عمل حاجة او قال حاجة افادتني مش شرط حتى اكون فعلا عملتها بس حسستني بحاجة كويسه واتخزنت عندي واكيد هتنفعني اما اقابل الموقف اللي تساعدني فيه ..

وبعد ما خلصت رغي أحب اشكركم انكم صبرتم عليا للأخر كده واستحملتم رغيي الكتير .. وبالرغم من اني مش بحب الاسئلة عشان بتبقى محتاجة للاختصار وانا مش بعرف اختصر اللي حابه اقوله او اوصفه بس متشكرة ليك يا شادي عشان خليتني ارغي كتير بس اوعى تكررها تاني ..

وعلى فكرة يا جماعه انا متدبسه في تاج تاني .. اصلهم اتبعتولي الاتنين في يوم واااااااحد .. بس اخد نفسي من ده شوية وابقى اجي بالتاني .. وربنا يستر

وفي النهاية أحب امرر التاج لحبايبي حبايبي

مهاميهو حبيبتي .. أحسن تستاهل

حموووووود صديقي العزيز .. يعني إيه حلم

والمفاجأة الكبرى .. حبي شقي قلبي

ميرو النيرو كوانيروووو .. كراكيب

وأي حد يعدي ونفسه فيه ياخده طبعا ويبقى يقولي عشان ادخل اتفرج

وإلى اللقاء في التاج الثاني .. قريباااا

.. طعم البيوت

اعتقد انكم هنا مش هتلاقوا بوست تقروه .. لاني بصراحه اول ما بقول طعم البيوت ما بلاقيش اي كلام ممكن يتقال عن الشريط ده .. بجد حتة شريط مالهوش حل .. مافيهوش اغنية مش هقول بقى وحشه ده مفيهوش اغنية أقل من التانية .. كل الأغاني اللي فيه رهيبة .. ايه الكلمات الرائعة دي وايه الموسيقى الرهيبة المعدية دي - معدية بفتح الميم مش ضمها بلاش جو المرض ده - .. بجد تحففففففففففة .. مش عارفه اسمع غيره من ساعة ما نزل .. ومش لاقيه اي كلام يقدر يعبر عن روعة أغانيه .. بس هقول ايه اكتر من اللي الكل بيقوله وعارفه ان هو ده منير .. الكينج بجد .. والكبير كبيييييييييير ..

أنا حاولت حتى أطلع من كل أغنية أجمد جملة فيها وفشلت لإن كل أغنية فيها جمل مش جملة .. فعلا كل أغنية فيها جمل جامدة جدا وتحفة مووووت

هو ده فعلا اللي الواحد كان مستنيه ويستاهل الانتظار الطويل ده .. طعم البيوت .. هو ده الاستطعام الصح .. حاجة كده واخدة الواحد في موود تاني .. موود ما يعملهوش غير منير والكلمات والموسيقى الأكتر من رائعة دي ..

وأكيد أكيد مهما رغيت وحكيت مش هقدر ادي الشريط حقه

شكر خاص للجميل شادي أصلان على الصورة اللي في الأول .. لإني حباها جدا ودوخت عليها في الدنيا كلها ومش لاقيتها وهو بعتهالي .. شكرا شكرا

.. أخدت الاجازة

وي وي وي وي واخدت الاجازة اخدت الاجازة - الجملة دي بتغيظ ميرو حبيبتي اوي وماحدش هيعرف لحنها غيرها -

ياااااااه أخدت الاجازة .. صحيح انا مابحسش بالأجازة اوي في اول يومين لان كالعادة دايما بخلص قبل ميرو وبتبقى هي ياعيني لسه بتمتحن بس مش مشكلة كلها بكره ..

مش عارفه ليه الواحد ما بيبقاش مصدق نفسه انه اخد الاجازة وخلص من الامتحانات وقرفها .. ياااه ده حتى الصحيان مختلف .. صحيان كده كسلان وهادي ومرتاح ومفيش حاجة مقلقاه - بعيدا عن الحاجات اللي في الحياة اللي تقلق المنام يعني انا بتكلم عن الامتحانات هنا - الواحد صاحي كده وهو متأكد انه مش هيذاكر .. حححححح احساس مريح كده

ما علينا المهم ان انا أخدت الاجازة .. ورجوعا لورا شوية شويتين كده تلاتة يمكن .. مشوار كده لغاية ابتدائي فيبقى ايه ؟؟؟؟؟؟

خادنا الاجازة وطظ في الدراسة .. خادنا الاجازة وطظ في الدراسة .. هههههههه .. اغنية آخر يوم في الامتحانات :)

يلا عقبال كل اللي لسه ما خلصوش