غدا في معرض الكتاب .. كلاكيت تاني مرة

زي السنة اللي فاتت بالظبط .. بكره ان شاء الله في معرض الكتاب حدثين هما اهم أحداث معرض الكتاب بالنسبة لي

بكره او النهاردة باعتبار اننا دخلنا يوم الاثنين 8 / 2 حفلتين توقيع من اجمل حفلات التوقيع

حفل توقيع كتاب " حكاية رجل عجوز كلما حلم بمدينة .. مات فيها " للروائي الرائع وعراف ضربة شمس طارق إمام .. وده بصراحة كتاب انا شخصيا كنت مستنياه من زماااااااااان لانه بيضم كل حكايات طارق امام اللي عشقنا قرايتها في صفحة ضربة شمس

حفلة التوقيع هتكون من الساعة 3 : 5 في جناح دار نهضة مصر - صالة 8 - بجوار بوابة 10

وكتاب " أنا راعي بقر وحيد " للزعيم خالد كساب .. رئيس جمهورية ضربة شمس

حفلة التوقيع هتكون الساعة 5 في جناح دار الشروق

.. معرض الكتاب 2009

الحمد لله ربنا كتبهالي ورحت المعرض قبل ما يقفل .. بداية فأعتقد إن زيارتي للمعرض السنة دي كانت مختلفة بعض الشيء .. يعني شوية كده فيها اختلاف عن كل سنة في كام حاجة كده هييجوا في النص

كالعادة في هذا الوقت من كل عام هو معرض الكتاب بكتبه بقاعاته بسلطاته ببابا غنوجه :) .. ما اختلفش في شيء غير شوية التغيير في أماكن القاعات ودور النشر – واللي مش هيفرق معايا في حاجة تنقلها أو ثباتها لاني هدوخ والف حوالين نفسي يعني هلف حوالين نفسي .. هو ده معرض الكتاب – والاختلاف الثاني كان في إن الفلوس السنة دي كانت بتخلص أسرع من أي سنة تانية لسببين .. الأول إن ما شاء الله الكتب كلها غالية نااار .. والثاني إني السنة دي رايحة وعارفة انا عايزة إيه يعني مش بتفرج واللي يعجبني اشتريه .. لا أنا رايحة ومعايا لستة مليانة كتب

طارق بس وهو بيوقع لي هدوء القتلة .. طمع بقى ما انا ماصدقت

:)

سيبنا من كل الرغي ده بقى ونيجي لأهم اختلاف في الاختلافات .. وهو إني السنة دي ولأول مرة في حياتي حضرت حفلات توقيع للكتب .. وقابلت كاتبي المفضل .. الجميل طارق إمام .. وبجد مش عارفه أقولكم إيه ولا إيه لو قعدت أحكي عن فرحتي وسعادتي من هنا لبكره مش هخلص .. حاجة جميلة جدا جدا إنك تقابل كاتبك المفضل ويوقعلك على الكتاب – الأرملة تكتب الخطابات سرا - والأجمل واللي كان هيخلي عقلي يطير من الفرحة هو إن كاتبك المفضل يكون عارفك – من كتر مانت مصدعو بردودك على كتاباته .. ودي ميزة حبيبي الفيس بوك – يختيييييييييييي كنت هطير من الفرحة وهتجنن وأنا واقفة بتكلم معاه وأما طلع عارفني وعارف أد إيه انا متابعاه ومتابعة كل كلمة بيكتبها .. وطلع فعلا طارق إمام زي ما دايما بسمع عنه .. بجد مش بس كاتب رائع وكمان إنسان أكتر من رائع .. شخصية جميلة جدا أي حد يسعد بمعرفته
وفضلت أنا بقيت اليوم مابقولش أي حاجة طول ما أنا ماشية غير طلع عارفني .. طلع عارفني .. طلع عارفنييييييييي ..... مجنونة انا عارفه

:)

وآخر اختلاف كان ثاني أجمد حاجة في اليوم وهو توقيع كتاب ضربة شمس .. وبما إن فيه ضربة شمس يبقى فيه ضربشمساويين .. يعني أجمل ناس ممكن تقابلهم .. ناس حقيقية كده وجميلة .. عدد غير عادي من الضربشمساويين جايين يباركوا لزعيم الضربشمساويين خالد كساب على كتاب ضربة شمس .. وده لوحده حدث كده مالهوش حل وأنا ببقى مبسوطة مووت أما بنتقابل .. بس للأسف يومي خلص بدري أوي ومالحقتش أكمله معاهم لإني كنت مضطرة أروح .. يلا خيرها في غيرها

ودي كانت أحداث معرض الكتاب 2009 واللي بالحدثين السابقين دول بعتبره أجمل معرض كتاب عدى عليا في حياتي .. صحيح رجعت منه مفلسه ومديونة بس ربنا يخليلي ماما وسلفة معرض الكتاب بتاعة كل سنة .. وأهل الخير برضو .. واللي معاه فلوس زيادة يسيبها على باب البلوج وهو خارج .. تعاطفك لوحده مش كفاية

:)