ضحكة عيون حبيبي

دائما ما أراها تتعجب عندما يتحدث أحدهم عن مدى روعة ابتسامتها .. واتعجب بدوري من تعجبها .. لحبي الشديد لابتسامتها ومعرفتي القوية عما يتحدثون عنه .. 

ولكن كيف لي أن ألومها وهي لا ترى ابتسامة عيونها .. كيف لها أن تعرف أن ابتسامة عيونها تخترق كل الحواجز وصولا إلى القلب والروح لتضفي عليهما نوعا من الراحة والبهجة - الغير مفهومة - ..

طفلتي الصغيرة .. لا أحد أيا كان سعيدا أو مهموما يستطيع أن يراكي تبتسمين ولا يبتسم بدوره لمجرد رؤيته لابتسامة عيونك الصافية المحرضة على الابتسام المليئة بالطفولة مثلك تماما 

أوصفهالك

غدارة وقلبها اسود وفي كثير من الأحيان أنانية

هذا ما قيل عنها ضمن خليط من الصفات الجيدة والسيئة .. ولكن هذه الكلمات ما نزلت على مسامعي كالصاعقة .. فانتابتني الصدمة وأنا أسمعها .. فهذه الكلمات لا يمكن لها أن تنطبق على فتاة مثلها .. كيف لنا أن نكون نتحدث عن نفس الفتاة

اسمح لي فأنت لا تراها جيدا .. فمثل هذه الصفات لا تقترن بفتاة عندما تدخل إلى حياة أي شخص تكون هي أجمل ما حدث بهذه الحياة أيا كانت صفتها .. تجدها إلى جوارك عندما تحزن وتغلق الدنيا أبوابها أمامك دون أن تطلب وجودها .. وعندما تبتسم وتضحك من أعماق قلبك تنظر بجوارك لتجدها أيضا وفي الأغلب تكون هي سبب هذه الابتسامة والسعادة .. تفعل أي شيء وكل شيء وتجتهد بكل ما تملك لإسعاد من تحبهم .. ومساعدتهم في إيجاد طرقهم إلى السعادة والنجاح ولا تنتظر منهم شيئا .. والكثير والكثير من الصفات والأشياء الجميلة التي تنبع من داخلها لتنير كل ما حولها ولكن الكلمات لا تساعدني في ترجمة ما أشعر به منها وتجاهها .. فبمجرد النظر إلى ابتسامة عيونها الصافية تشعر بمعنى وقيمة وجودها في حياتك

صديقي .. أنا موقنة أنك لا تقصد ما قلت بالمعنى الحرفي ولكن خانك التعبير وخانتك الكلمات التي خرجت من فمك كطلقات الرصاص دون أن تشعر .. فأرجو أن تعي كلامك وتأتي بتوضيح واعتذار يليق بفتاة مثلها

....................

بتقولي اوصفهالك اوصفلك رقيقة بريئة زي الموج بتتحرك .. الضحكة الحلوة نور الصبح بيضحكلك .. وصوتها غناها عصفور بيحكي ويشاغلك ..

لما تكون تعبان من الدنيا وتبقى الراحه عنيها .. لما تكون عطشان استنى هتشرب من لياليها .. لما تحس انك متطمن وانت في حضن ايديها .. وتقولي اوصفهاااااااااالك

..........

طبعا طبعا مع الاعتذار الفظيع انها اغنية لتشيمووووو بس هعمل ايه كان بيقول كلام يتسمع وهي بتحبها

مش كفاية حمص الشام ب 90 جنية .. لا وكمان مسكر وساقع

حمص الشام ب90 جنية

.. أيوه .. أيوه .. أيوه هو حمص الشام العادي بتاعنا ده

اللي هو بيبقى في كبايه وسخن وشطة و ليمون

.. آه والله العظيم هو بس ب 90 جنية .. عادي جداااا .. هقولكم أنا

في يوم من ذوات الأيام الرمضانية وبعد طول غياب عن الخروجات العائلية قررنا ننزل الحسين زي كل سنة .. أنا وبابا وماما واخواتي الاتنين وخالتي وأولادها و صاحبتي حبيبتي ميرو وصاحبة اختي الصغيرة .. لمة حلوة كده .. وفعلا نزلنا واتمشينا مشي مش طبيعي أساسا وكم الناس كان غير عادي .. ماعلينا من الناس احسن دول عايزين بوست لوحدهم والبوست النهاردة لحمص الشام

المهم من كتر ما مشينا تعبنا و قررنا نقعد نشرب اي حاجة في اي حتة وفي مكان ما تعبنا قعدنا وطلبنا حمص الشام.. وياريتنا ما طلبنا .. المشكلة مش في حمص الشام ولا في إنه جه بعد 3 ايام ولا حاجة خالص .. الحوار كله في الشلل اللي حصلي بعد حمص الشام .. المفاجأة الكبرى إن في الحسين مكان ما قعدنا اللي هو ما ينفعش اننا نطلق عليه كوفي شوب ولا حتى قهوة لانها كراسي محطوطة في الهواء الطلق في الشارع .. ما علينا .. أهو في المكان ده ال 6 حمص الشام

بـ 90 جنية .. يا نهاار يا نهاااااااااار .. 6 حمص الشام بـ 90 جنية .. ليييييييه ؟ عشان إيه ؟ .. هو مش حمص الشام ده كان بتاع الغلابة .. حد يفكرني بس .. مش ده اللي كانوا بيقولوا عليه ان الغلبان اما بيحب يخرج ويتفسح بينزل الكورنيش يتمشى ويضرب واحد حمص الشام بـ جنيه أو 2 جنيه آخره يعني وواحد درة ويمكن ترمس ويروح ويبقى اخر تمام ؟ .. طب ايه ؟

كبايه حمص الشام في المكان العجيب ده ب 15 جنية .. أما لو خدتها في كوفي بجد هتبقى بكام .. حسبي الله ونعم الوكيل .. وبدل ما نخرج نتفسح ونتسحر خرجنا شربنا حمص الشام .. ومشينا وكلنا مش مصدقين نفسنا وعمالين نتريأ ونضحك ومش فاهمين ليه يعني

بس ابن خالتي ما شاء الله عليه ركز ولقطها وقالنا ليه

:)

هو قال انهم وهما بيقدموا لنا حمص الشام اكييييييد سمعوا ميرو وهي بتتحاور معايا فافتكرونا مش عارفين حمص الشام فقالك عاملهم أجانب دول مش عارفينه اساسا .. أصل ميرو النيرو كوانيرو حبي وحياتي سمعت عمو اللي بيقدم الطلبات وهو بيقول هجيبلكم الشطة برا وما كان منها غيييييييييييييير ........... اتفرجوااااااااا واعذروني

:D

إيه شطة ؟ شطة إيه ؟ وازاي شطة يعني هو مش حمص الشام ده مسكر ؟؟ أييييييييييييييييييييي ي .. ودي كانت الجملة اللي قالتها صاحبتي حبيبتي وعملي الأبيض في الدنيا ميرو وهي مفزوعه وعلى وشها براءة الأطفال المختلطة بالإزبهلال والعته بعيد عنكم وعن السامعين .. وده كان لعدم معرفتها اساسا بحمص الشام .. وده اللي عرفته ساعتها - بعد اكتر من 6 سنين صداقه - إن الحلوة الجميلة الفظيعة اللي هتشلني قريب لعدم معرفتها بمعظم الحاجات الطبيعية اللي في حياتنا - واللي مش هقولكم عليها خليها في قلبي خلوني ساكتة - عمرها ما أكلت حمص الشام ولا كان حصل بينهم سابق معرفه اساسا غير شكليا من بعيد لبعيد فكانت فاكرة إيه ؟ إيييييييييه ؟ .. إن حمص الشام بعيد عنكم وعن السامعين والقارئين مسكر وساقع .. مسكــــــــررررررر وســااااااااقع .. والسبب في لونه ده إن الميه اللي معاه دي عصير فراوله على برتقال .. شوفتوا الهنا اللي انا فيه .. دي حاجة من الحاجات الكتيييييييير يا اخوانا .. ما أنا كنت ناقصاها ساعتها مش كفاية حمص الشام ب 90 جنية لا وكمان مسكر وساقع .. لنا الله

:D

.. ميرو الكبيرة

كل ما أدخل ألاقيها مش عملت حاجة لعيد ميلادها .. كل مأدخل مالاقيش حاجة .. كل ما أدخل مالاقيش حاجة .. فماعرفتش اسكت بصراحه .. وبعدين مش كفاية اننا ماعرفناش نعملها عيد ميلاد عشان رمضان - كل سنة وانتم طيبين - .. ماخدتش مننا غير هابي بيرث داي على طريق مصر اسكندرية وبصوت واطي كمان

ششششششششششش ايه الرغي ده .. من الآخر ده عيد ميلاد حبيبة قلبي ميرو النيرو كوانيرو

ميرو يا حبي انتي عارفه اني مش بعرف احضر لاعياد الميلاد والحركات دي بس اهو حاجة كده على ما قُسم قبل رمضان

حادي بادي يويو .. حادي بادي يويو .. حادي بادي يويو ميرو .. حادي بادي يويو

ياللا حالا بالا بالا حيوا أبو الفصاد هيكون عيد ميلاده امبارح أسعد الأعياد .. فليحيا أبو الفصاد .. هييييييييييه

هابي بيرث داي تو يو .. هابي بيرث داي تو يو .. هابي بيرث داي تو ميرو .. هابي بيرث داي تو يو .. سنة حلوة يا جميل .. سنة حلوة يا جميل .. سنة حلوة يا ميرو .. سنة حلوة يا جميل .. هفففففففففففففف

:)

و بما انه عيد ميلاد ميرو النيرو كوانيرو فشرط اساسي ان تكون كل التورتات شيكولاتة وإلا تضربنا بالنار

تنبيه هااااام .. التورتات دي للي هيجيب هدية اللي مش هيجيب ما يمدش إيده منعا للإحراج

:)

شوفتي كتير ازاي .. ابقي ابعتي واحدة بقى بلاش طفاسه

نبعد عن الأكل بقى ونشوف الهدايا الكتير اللي انا دفعت فيها دم قلبي

:)

آدي يا ستي الألوان اللي كنتي عايزاها عشان تبهدلي بيها حيطة الأوضه اللي لسه متبيضه .. شخبطي ولوني وبهدلي الدنيا براحتك

وهنا بقى نوسع لحبيبة قلبها وحياتها وعمرها وعشقها وكل حاجة .. سنيكرز الغالية ام فلوس كتير واللي هي مضيعة عليها فلوسها أول بأول

كان نفسي أجيبلك مج بس مش لقيت مج شكله امور .. فاضطريت اعمل واحد عموله

:)

صحيح الصناديق دي بقى انا ماعرفش إيه الحاجات الكتير اللي فيها دي بس شكلها عجبني .. وانا مالي وانا مالي على رأي ميرو

كل سنة وانتي طيبة يا ميرو يا حبي وعقبال مليووووووون سنة .. ويارب السنة الجاية تكون سنة جامدة آآآآآآآآخر حاجة وتعملي فيها كل اللي نفسك فيه .. كل سنة وانتي طيبة يا أجمل ميرو في الدنيا وأحلى حاجة في حياتي

يلا كل الناس تروح تقول لميرو حبيبتي كل سنة وهي طيبة

:)

.. وإياك تكون زيهم وتروح وتجرحنا

نتحدث عبر الهاتف كعادتنا كل ليلة نحكي ونضحك كأي يوم من الأيام .. وفجأة إذا بها تتحدث عن الموت وعن شعورها بإقترابه منها في هذه الأيام .. فما كان مني إلا أنني أكملت حديثنا كما كان وكما تعودنا الخروج من لحظات الصمت والكآبه بالضحك والسخرية من بعضنا البعض .. ولكن ما فعلته هذا لم يكن هو ما بداخلي .. وما فعلته إلا لأخرجها من هذه اللحظات الصعبة .. ولكن ما بداخلي فكان بداخلي .. فكلامها وخوفي وقلقي عليها جعلوني أشعر بالإنقباض حتى أنني شعرت للحظات وكأنني لا أستطيع التنفس .. نعم .. فكيف أتنفس وكيف هي الحياة بدونها .. وكيف تكون حياتي أنا بدونها ..

!!!! حياتي ؟

أي حياة ؟!! فهل لي حياة بدونها أو حياة هي خارج محيطها ؟

فكيف وهي التي ترسم ملامح حياتي .. فلا أستطيع تحديد ملامحها بدونها

هل من الممكن أن يمر يوما دون أن أكلمها ؟

دون أن أتحدث إليها واشكو لها ما أعاني ؟

دون أن تقاسمني أفراحي ولحظات سعادتي ؟

فكيف لي هذا ؟

ها انا أجلس أمام البحر أستمع إلى الأغاني - من الإم بي ثري بتاعها - تبدأ الأغنية التي أهدتني إياها في عيد ميلادي.. عيد ميلادي الذي فاجأتني به وبترتيبها له بمفردها

ها هي الأغنية تبدأ وتبدأ معها دموعي في الإنهمار دون مناسبة غير تذكرها مع الأغنية وتذكر كلامها الذي جعلني أخاف رحيلها وبعدها عني

أعرف أن بإقتراب شهر رمضان ولحبنا لهذا الشهر يبدأ يراودنا الخوف من عدم تبليغنا هذا الشهر الكريم .. أعرف أن هذا الشعور وهذه الحالة يمر بها الكثير منا في هذا الوقت من السنة وقد مررت أنا بها من قبل .. ولكن لا أستطيع منع نفسي من القلق عليها .. فمجرد تخيلي للأمر يرعبني

فتخيلي لحياتي بدونها لا يكتمل .. كلامها جعلني أسرح في تخيل حياتي بدونها ولكني لم أستطع .. فهي مجرد بداية وينقطع التخيل عن وجود حياة من الأساس .. فالإحساس الأكيد بداخلي هو أن بتوقف حياتها - بعد الشر بعد الشر بعد الشر عليها - تتوقف حياتي إلى الأبد ..

!! فكيف لي أن أحيا بدون حياتي

...............

بننجرح كل يوم لكن بيفرحنا إن انت جوا القلب ساكن في أفراحنا .. وانت الأمل في العيون والنشوة ساعة الجنون ..

وإياك تكون زيهم وتروح وتجرحنا .. ده انت الوحيد منهم تقدر تريحنا

دي على فكرة يا ميرو يا حبي الأغنية اللي كنت بقولك إني كل ما بسمعها مش بييجي في بالي حد غيرك

ربنا يخليكي ليا يا حبي وما يحرمنيش منك أبدا أبدا أبدا

ميرو النيرو كوانيرو ..

ميرو .. أول ما يتنطق اسمها تحس بحاجة مش طبيعية أساسا ..حركة .. وقلق .. ودربكة .. وشعننة ( ايه شعننة دي ) .. ومرح .. وتنطيط .. وكلام ورغي .. وصداع .. وضحك .. وشقاوة .. قلق قلق يعني .. لأ وكل ده بمجرد نطق اسمها .. أمال أما تظهر الشخصية نفسها بقى إيه اللي بيحصل .. المهم إن كل الناس كل الناس أول ما بيشوفوها لأول مرة أول حاجة بتتقال ( إيه البنوتة الرقة الصغنتوتة دي ) لكن أول ما تبدأ - صباح الطرقعة - الكل بيسحب كلامه على طول .. رقة مين وهدوء إيه .. إحنا آسفين ماكناش نقصد مش انتي على فكرة .. ههههههه - زمانها دلوقتي نفسها تموتني - بجد مش بهزر وأول الناس دول كانت مامتي أول ما شافتها أول مرة معايا ( عسل .. مين البنوتة الرقة دي ؟ .. هي دي ميرو ) ودلوقتي بتدعي عليا إني عرفت مرام أساسا .. كل ده تهريج طبعا .. مرام .. مرام دي أحلى حاجة في كل حاجة .. صحبتي .. حبيبتي .. نصي التاني اللي ماقدرش أبعد عنه أبدا مهما حصل بينا .. صحيح أنا و مرام مافيناش حاجتين على بعض شبه بعض فيهم عشان يخلونا أصحاب .. بس إحنا أصحاب .. ودي حاجة بتخلي الناس كلها مستغربة إزاي أنا و مرام أصحاب حتى ناظرة مدرستنا في ثانوي - فاكرة يا ميرو أما شافتك في يوم واقفة معايا عملت إزاي - .. الست يا عيني كان هيجرى لها حاجة .. عينيها برقت وراحت مسوطة ( انتي صاحبة مرااااااااااام ) .. هههههههه .. هي دايما بتبقى صدمة لكل الناس .. أصل إحنا فعلا تقريبا النقيض بالظبط .. حاجة كده خلف خلاف .. أنا مثلا ليا في الهدوء حبتين وهي مطرقعة 3 حبات .. ودي حاجة من حاجات كتييييييير .. بس أنا دايما بقول على الموضوع ده إننا بكده بنكمل بعض - بتلكك يعني - بس إحنا فعلا بنكمل بعض أوي في حاجات كتير بسبب اختلاف صفاتنا ده ..

المهم المهم إنها أجمل حاجة في حياتي وأكتر حاجة ليها معنى في حياتي هي ميرو .. ما ينفعش يوم يعدي من غير ما نكلم بعض 7 أو 8 مرات في التليفون - وقريب أوي هنتطرد من بيوتنا بسبب الموضوع ده - على فكرة على فكرة .. أنا و ميرو في الأول ماكناش لبعض أي حاجة .. في الأساس كنا أصحاب صحابنا .. يعني هي كانت صاحبة صحبتي .. لكن أنا وهي ماكناش أصحاب خاااااالص ولا عمرنا تخيلنا اننا نبقى ولا كنا عايزين أساسا :] .. وسبحان مغير الأحوال دلوقتي إحنا أهم حاجتين في حياة بعض .. المهم إن اللي وصلت ليه صداقتنا ده تاعب ناس كتييير أوي - حاجة كده غيرة .. حقد بعيد عنكم - .. لو قعدت أكتب عن ميرو مش هبطل كتابة وعمري ما هعرف أخلص كلام عنها وعن علاقتنا ببعض بس بالمختصر المزيد - على رأي محمد سعد - هي الصديقة اللي بجد .. اللي بلاقيها وقت ما احتاجها من غير حتى ما أقول إني محتاجالها .. في كل وقت هي اللي معايا وهي اللي فاهمه وحاسة ومقدره من غير ما اتكلم .. أتمنى إني أكون أستاهل منها كده فعلا وما أخيبش ظنها فيا أبدا في يوم من الأيام .. وآسفة يا ميرو يا حبيبتي على أي حاجة أي حاجة حصلت بيننا وزعلتك مني مهما كانت وأيا كانت بقصد أو من غير قصد .. بحبــــــــــــــك يا أغلى ميرو في الدنيا ..