يوم الخسوف

في يوم الخسوف قررنا الخروج لمكان مفتوح لنتابع الأمر بشكل أفضل .. ومنذ أن خرجت من البيت إلى أن وصلت إلى المكان المقصود وأنا أفكر أن اليوم سيخرجون الناس جميعا مثلنا لمتابعة الأمر.. وسيظلوا يحدقون في القمر ويراقبونه عن كثب
وأتخيل أن هذا الأمر سيجعله يتضايق ويكون غير مرتاح من تحديق الناس به ومراقبتهم له دون أن يستطيع الهرب أو الاختباء من أعينهم ..
ولكن عندما وصلت وبدأ الخسوف إلى أن انتهى لم أرى شخصا واحدا ينظر للقمر إلا ليرى لماذا ننظر أنا وعائلتي لأعلى من حين لآخر .. فلم يكن هناك من يدري بما يحدث للقمر اليوم ..

الجميع يسيرون في كل مكان وكأن لا شيء يحدث فوق رؤوسهم .. شعرت بأني اريد أن أذهب لكل من حولي وأجبرهم على رفع رؤوسهم للسماء ومشاهدة ما يحدث

في بداية اليوم أشفقت على القمر لمجرد تخيلي جميع الناس يحدقون به .. ولكن مع نهاية اليوم شعرت بالإشفاق عليه والحزن لأجله لأن أحدا لم يهتم بأمره ولا بما يحدث له..

.

الذكرى السنوية الأولى لخالد سعيد

من كام يوم نزلت لأول مرة وقفة من الوقفات الصامتة اللي اتعملت عشان خالد .. كتير كنت بفتكره وادعيله واترحم عليه واقراله قرآن .. بس المرة دي كانت أول مرة أحس إني بعمل حاجة عشانه وأنا واقفة أقراله قرآن بس مع شباب وبنات وأمهات وآباء وأطفال كتييير لسه فاكرين خالد ومش هيسمحوا إن حقه يضيع

كنت رايحة وأنا مع كل خطوة بقرب بيها من المكان خايفة أوي تكون الناس نسيته أو خلاص مابقاش الموضوع مهم وأروح مالاقيش غير مجموعة شباب يتعدوا على الصوابع .. بس أول ما وصلت حسيت بابتسامة كبيرة أوي على وشي وجوايا مابحسهاش كتير .. كنت فرحانة أوي بالمنظر .. شوفته كتير في الصور بس إني اعيشه كانت حاجة مختلفة

كنت فرحانة أوي وأنا شايفة كل الناس دي مهتمة إنها تنزل في يوم زي ده عشان تقول لخالد ولكل شهيد ماتخافش لا نسيناك ولا هننسا .. ولا حقك عمره هيضيع طول ما احنا لسه ما اتقابلناش معاك

كنت بجري بين العربيات وأعدي الشارع من هنا لهناك عشان أصور المنظر ده اللي عمري ماهنساه أبدا .. وكنت مبسوطة أوي أما حد يفتح شباك عربيته ويسألنا انتوا واقفين النهاردة ليه فأرد عليه وأقوله النهاردة سنوية خالد سعيد .. أكيد ماكنتش مبسوطة انهم مش عارفين بس أكيد كنت مبسوطة وأنا بقولها عشان أنا هنا عشان خالد سعيد

كان عاجبني أوي اننا قادرين نشد انتباه الناس ونجبرهم إنهم يسألوا ويعرفوا ويشوفوا إن كل دول واقفين عشان يرجع حق ناس مابقوش قادرين يطالبوا بحقوقهم

شوفت في عينين الناس ورا إزاز عربياتهم حاجات كتير أوي وحاجات مختلفة طبعا من شخص للتاني

عدى علينا الأمهات والآباء اللي سألوا واقفين ليه وأما قولنالهم اترحموا عليه ودعوله ودعولنا معاه

وعدى علينا عمو سواق التاكسي اللي حسبن علينا بعلو صوته زي ما نكون احنا ولاد العادلي والعياذ بالله ولا واقفين حاله بإننا واقفين بعرض الكوبري مثلا

وعدى علينا الشاب - الحيلة - اللي مش عاجباه وقفتنا وبيقول لمامته بقرف احنا واقفين كده ليه .. واللي كان نفسي جدا اقوله مانت قاعد جنب أمك ماحصلكش اللي حصلهم

عدى علينا الشاب سواق التاكسي اللي مشغل يا حبيبتي يا مصر بصوت عااااااااالي وحاسس بفخر

وعجبني أوي حوار قصير جدا بس جميل جداااا واحساسه حلو اوي دار بين بنتين واقفين جنبي

الأولى قالت لصاحبتها الجو حلو أوي
أنا بحس إن الجو بيبقى مختلف في الوقفات اللي زي دي
فردت عليها صاحبتها بكل بساطة ومن غير لحظة تفكير دا جو و احساس الحرية

وخلص اليوم ورجعت بيتنا مرهقة جدا وحاسة بالتعب كتير جدا بس الأهم إني رجعت حبانا جدا .. انا بجد بحبنا أوي واحنا متجمعين مع بعض على حاجة حلوة أو حاجة صح

صوت الحرية

في كل شارع في بلادي صوت الحرية بينادي

لأول مرة في حياتي انزل من بيتنا عشان أشارك في استفتاء .. عمري ما شاركت لا في استفتاء ولا انتخابات ولا كان ليا أي اختيار في الحياة السياسية ابدااااااا ولا في حياة بلدنا خالص .. بحبها وبموت فيها آه بس رأيي بقوله في بيتنا .. النهاردة بس ولأول مرة نزلت وانا حاسه ان ليا صوت ليه قيمة ولازم أشارك بيه .. وتقريبا زيي بالظبط كان كل الناس

بما اني ساكنة ادام مدرسة دايما بيكون فيها لجنة انتخابية ودايما بكون شايفة المشهد وعارفاه من قبل ما يبدأ وعمره ما اتغير أقدر النهاردة أقول ان كل حاجة فعلا بدأت تتغير .. طول اليوم فيه ناس بتتوافد على اللجنة من كل الاعمار والاشكال .. ناس كتير واخدين بعض ورايحين يشاركوا .. أسر وعائلات وجيران .. شباب و وبنات و رجالة وسيدات كبار في السن متسندين على ولادهم وداخلين يشاركوا .. ناس حست بالمسئولية وحست ان ليها حق في البلد دي تقدر دلوقتي تطالب بيه وتشارك في رجوعه

انا بجد مبسوطة اووووووووي اوي .. و زي ما أول يومين في الثورة كنت بقول ان أيا كانت الثورة هتنتهي على إيه فمن مكاسبها إننا قدرنا نتجمع على حاجة واحدة متحضرة بالمنظر ده .. فالنهاردة كمان أنا شايفه ان أيا كانت نتيجة الاستفتاء فاللي حصل النهاردة من مشاركة غير مسبوقة من الناس برضو مكسب كبير ..

بقولكم إيه في يوم زي ده ماتنسوش تقروا الفاتحة لكل شهدائنا

رجووووووع

انتهت الأجازة السنوية الرسمية من القاهرة ورجعنا للحر من تاني
:)
ورجعت كمان لمدونتي حبيبتي .. وكالعادة إليكم بعض صور الطبيعة المصيفية
:)

السما قبل الشروق تقريبا بساعة


ودي السما وهي لا جايبه شروق ولا ليل .. بين البينين يعني .. والنقطة البيضه اللي فوق على اليمين دي كانت نجمه على فكره
:)


بداية الشروق



ده بقى غروب



أول لحظة بعد نزول الشمس في البحر


طبعا عمر ما حد هيصدق ان ده القمر .. بس والله العظيم ده فعلا القمر
:)

القسم اتضرب يا رجااااااااااااااله

أولا انا اسفه طبعا على التأخير اللي كان لظروف موودية بحته .. اعذروني

في يوم من ذوات الايام .. مساء الاحد .. قاعدين لا بينا ولا علينا وفجأة صوت زعيق وتهليل ودوشة رهييييييبة ووراها صوت حاجات بتنفجر وتطرقع وتتكسر .. وبما ان اخويا الصغير في الوقت ده كان في الشارع واحنا مش فاهمين اصلا ايه اللي احنا سامعينه ده ولا ايه اللي بيحصل فكان اننا كلنا نزلنا جري على الشارع فزعا .. واذا بالمشهد العجيب .. احنا بيتنا على مسافة قريبة من القسم .. نزلت الشارع لقيت الناس بتجري في كل الاتجاهات ومش فاهمين حاجة وانا ولا فارق معايا انا بدور على اخويا عشان اطمن .. واول ما خرجت للشارع اللي بيوصل بينا وبين القسم لقيت دخان - عرفت بعدها انهم كانوا مولعين في موتوسيكل - عند القسم قافل الشارع ومش مبين القسم اساسا وبرضو مش فاهمه ايه اللي بيحصل.. طب دي حريقة في عمارة جنب القسم ولا الصوت ده كابلات كهربا وضربت ولا ايه افهم طيب .. والحمد لله لقيت اخويا واطمنت عليه وبدأت اقف اتفرج بقى عشان افهم
المشهد بالظبط زي ماشوفته بعيني
مجموعة شباب كتيييييييييير .. كتير كتير يعني .. ودخان .. واصوات مفرقعات او رصاص ماعرفش اهي اصوات وخلاص .. وطوب وازاز بيتكسر .. وكل ده ضد القسم
شباب بيحدف طوب وشباب بيحدف حاجات كده مولعه ماعرفش ايه دي .. وشاب - ده انا كنت على بعد كام متر منه - راكب عربية القسم اللي هي البوكس دي و طلع بيها فوق الرصيف وعمال يخبطها في سور المدرسة لحد العربية ما اتدغدغت .. وفضل المشهد على كده تكسير وتخبيط وترزيع لغاية ما دغدغوا القسم وعربياته وبدأوا هتاف باسم الحربية وهنا بدأت اعرف انا هما مين وايه اللي بيحصل عشان الناس اللي في الشارع بدأت تحكي اللي حاصل وبدأت اخد كلمة من هنا وحوار من هنا والحمد لله طلعت بيتنا وانا فاهمه ومتفرجة واخر تمام .. بس تاني يوم على النت لقيت حاجات عجيبه كده ان الموضوع دام بتاع 3 ساعات وده اصلا ماحصلش ده فتي .. وان الموضوع كان اشتباك بين الناس اللي في القسم والشباب بتوع الحربية دول ودي بصراحه انا ماعرفش انا ماشوفتش في الاول غير كام عسكري كده واختفوا في دقايق وبعد كده ماظهرش اي حد من القسم غير بعد ما الشباب دول اختفوا من الشارع والمكان هدي تاني ومابقاش فيه غير المتفرجين من اهالي المدينة .. وبرضو الله اعلم يمكن كان فيه وانا ماخدتش بالي .. واللي عرفته من كلام الناس برضو ان كل اللي حصل ده كان انتقاما لأحد زملائهم اللي اتاخد في القسم قبلها بيومين تقريبا

وانتهى اليوم بانتهاء هذا العرض وانشكاح المتفرجين اللي في الشارع ودعوات الأمهات من المتفرجين - ربنا يحميهم لشبابهم ويخليهم لأهاليهم .. رجالة بصحيح - عندهم حق العيال بصراحه كانوا رجولة رجولة يعني

:)

المضحك عندنا بقى في الموقف هو المنظر بعد الحوار ما خلص .. خلاص الفرجة خلصت والناس بدأت تركز بقى مع بعضها .. وبدأوا بقى في سلامات واخبارات والجيران بقى اللي ماشافوش بعض من شهور ومن سنين اتجمعوا وهات يا رغي واسئلة عن الأحوال والاخبار وبقت هيصه .. بس كان جو من الالفة فظيع

:)

المحزن بقى في الموقف واللي كان غريب عليا .. هو موقف حكتهولي اختي بعد الحوار ده .. وهو ان طفلة من جيراننا كانت في الشارع في الوقت ده .. طفلة عندها بتاع 6 سنين .. ف يا عيني اول ما سمعت اللي انا حكيته ده كله جريت على البيت وهي منهاره وعماله تصرخ وتعيط وهي بتخبط على الباب .. افتحي يا ماما اسرائيل جت عندنا افتحي يا ماما اسرائيل جت

ساعتها حسيت بحزن على ذاكرة وتفكير وخيال طفلة زي دي

والفيديوهات هتلاقوها على اليوتيوب

ومرة تانية اسفه على التأخير واسفه كمان لو البوست طلع ملخبط حبتين تلاتة ستاشرلنفس الظروف الموودية البحتة

:)

تحديث

....................................

في حدث غير مسبوق في مدينتنا اتقلبت الدنيا وقسم الشرطة اتدغدغ فوق دماغ اللي جواه

والدنيا ولعت .. ضرب تلاقي .. انفجارات تلاقي .. عربيات مابقالهاش معالم تلاقي .. مظاهرة وهتاف باسم الحربية هتلاقي - عشان اللي قاموا بالموضوع اجمد شباب حربية - والله ولسه فيكي رجالة يا مصر

الحدث لسه خلصان من دقايق ومش قادرة اجمعلكم ملامحه اللي شوفتها بعيني .. بس كل اللي اقدر اقوله ان الدنيا مقلوبة عندي

وتقريبا الداخلية هتبات في شارعنا النهاردة -اصلي بكتب وسامعة العربيات تتوافد على القسم جنب بيتنا .. سوري قصدي بواقي القسم - سنوافيكم بكافة الأخبار أول ما اعرف اجمع

ويمكن تلاقوا صور وفيديو كمان عشان اللي معايا دلوقتي صوت بس

بصوا بصوا من الآخر انا هاجي تاني وهبقى مركزة اكتر ان شاء الله

ده لو فضل حد في حينا في بيته

:)

أعقل ؟؟؟؟؟؟؟ تفتكروا ؟؟

هابي بيرث داي تو يو .. هابي بيرث داي تو يو .. هابي بيرث داي تو بيرو .. هابي بيرث داي تو يو .. هييييييييه

كل سنة وانتي طيبة يا بيرو يا حبيبتي وعقبال مليووون سنة - أيون أيون أنا بقولي فيها حاجة دي - والله وكبرتي يا حبيبتي ووصلتي لسن العقل و العاقلين .. بس مش عارفه بصراحه إن كنتي هتعقلي ولا لأ .. والله ما عارفه .. أنا كنت بفكر بجدية في الموضوع ده وقولت أحاول وكده يمكن فعلا أعقل بس الموضوع اتقابل برفض فزززززيع من أصدقائي المقربين وحلفوا لا يقطعوا علاقتهم بيا لو عقلت فعلا زي ما بقول كده .. ومنهم كمان اللي قال إني بكدب وعمري ما هعرف أعقل أساسا ومش مصدقيني

:)

وف نفس الوقت الناس اللي في البيت نفسهم ومنى عينهم إني أعقل وأبقى زي الناس الكُبارين - أبطل آكل مصاصة وأكلم الدباديب بتاعتي وأبطل اشتريهم أساسا وأبطل اسمع أغاني الأطفال اللي كنت بسمعها وأنا صغيرة ........ إلخ - أبقى عاقلة يعني وكده .. ف مش عارفه أحقق لمين رغبته وأحبط مين وأضيع أمله .. بس أقولكم على سر شكلي هحبط فريق البيت ومش هرجع عاقلة تاني - آه أصل انا في الأساس كنت عاقلة وطرقعت على كبر - أصلي لقيت إني زهقت من العقل وحبيت الجنان و الطرقعة أكتر واللي ماعرفش أساسا ظهروا كده إزاي ولا أصلا كانوا فين .. كلام تاني في سركم هو اللي أنا متأكده منه في موضوع الظهور ده إن سببه الأساسي معرفتي لحبيبة قلبي ميرو النيرو كوانيرو -هو فيه طرقعة أكتر من كده - ماحدش يقولها بقى

:)

Happy BirhDay To Me ..

.. معرض الكتاب 2009

الحمد لله ربنا كتبهالي ورحت المعرض قبل ما يقفل .. بداية فأعتقد إن زيارتي للمعرض السنة دي كانت مختلفة بعض الشيء .. يعني شوية كده فيها اختلاف عن كل سنة في كام حاجة كده هييجوا في النص

كالعادة في هذا الوقت من كل عام هو معرض الكتاب بكتبه بقاعاته بسلطاته ببابا غنوجه :) .. ما اختلفش في شيء غير شوية التغيير في أماكن القاعات ودور النشر – واللي مش هيفرق معايا في حاجة تنقلها أو ثباتها لاني هدوخ والف حوالين نفسي يعني هلف حوالين نفسي .. هو ده معرض الكتاب – والاختلاف الثاني كان في إن الفلوس السنة دي كانت بتخلص أسرع من أي سنة تانية لسببين .. الأول إن ما شاء الله الكتب كلها غالية نااار .. والثاني إني السنة دي رايحة وعارفة انا عايزة إيه يعني مش بتفرج واللي يعجبني اشتريه .. لا أنا رايحة ومعايا لستة مليانة كتب

طارق بس وهو بيوقع لي هدوء القتلة .. طمع بقى ما انا ماصدقت

:)

سيبنا من كل الرغي ده بقى ونيجي لأهم اختلاف في الاختلافات .. وهو إني السنة دي ولأول مرة في حياتي حضرت حفلات توقيع للكتب .. وقابلت كاتبي المفضل .. الجميل طارق إمام .. وبجد مش عارفه أقولكم إيه ولا إيه لو قعدت أحكي عن فرحتي وسعادتي من هنا لبكره مش هخلص .. حاجة جميلة جدا جدا إنك تقابل كاتبك المفضل ويوقعلك على الكتاب – الأرملة تكتب الخطابات سرا - والأجمل واللي كان هيخلي عقلي يطير من الفرحة هو إن كاتبك المفضل يكون عارفك – من كتر مانت مصدعو بردودك على كتاباته .. ودي ميزة حبيبي الفيس بوك – يختيييييييييييي كنت هطير من الفرحة وهتجنن وأنا واقفة بتكلم معاه وأما طلع عارفني وعارف أد إيه انا متابعاه ومتابعة كل كلمة بيكتبها .. وطلع فعلا طارق إمام زي ما دايما بسمع عنه .. بجد مش بس كاتب رائع وكمان إنسان أكتر من رائع .. شخصية جميلة جدا أي حد يسعد بمعرفته
وفضلت أنا بقيت اليوم مابقولش أي حاجة طول ما أنا ماشية غير طلع عارفني .. طلع عارفني .. طلع عارفنييييييييي ..... مجنونة انا عارفه

:)

وآخر اختلاف كان ثاني أجمد حاجة في اليوم وهو توقيع كتاب ضربة شمس .. وبما إن فيه ضربة شمس يبقى فيه ضربشمساويين .. يعني أجمل ناس ممكن تقابلهم .. ناس حقيقية كده وجميلة .. عدد غير عادي من الضربشمساويين جايين يباركوا لزعيم الضربشمساويين خالد كساب على كتاب ضربة شمس .. وده لوحده حدث كده مالهوش حل وأنا ببقى مبسوطة مووت أما بنتقابل .. بس للأسف يومي خلص بدري أوي ومالحقتش أكمله معاهم لإني كنت مضطرة أروح .. يلا خيرها في غيرها

ودي كانت أحداث معرض الكتاب 2009 واللي بالحدثين السابقين دول بعتبره أجمل معرض كتاب عدى عليا في حياتي .. صحيح رجعت منه مفلسه ومديونة بس ربنا يخليلي ماما وسلفة معرض الكتاب بتاعة كل سنة .. وأهل الخير برضو .. واللي معاه فلوس زيادة يسيبها على باب البلوج وهو خارج .. تعاطفك لوحده مش كفاية

:)

.. قهوة سادة

أقول إيه أو أبدأ منين .. بصراحة مش عارفه أساسا .. أصلهم يتقال عليهم كتيييير وكتييير اوي وف نفس الوقت الكلام مايكفيش واللي هما عاملينه أكبر من الكلام بكتييير .. أقولكم تعالوا كالعادة نبدأ من الأول خالص .. استنوا أما أقولكم أنا بتكلم عن مين وعن ايه .. أنا بتكلم عن العرض المسرحي " قهوة سادة " .. حتة عرض مالهوش حل .. مالهوش حل بكل المقاييس يعني .. بقالي فترة كبيرة بسمع عن مسرحية رهيبة اسمها قهوة سادة وكل الناس بتقول عنها انها جامدة مووت بس ماكنتش شوفتها ولا أعرف مين اللي عاملها اساسا .. وف يوم في أول رمضان اتفرجت على برنامج اسمه " من غير مقص " حاجة كده تحفة والناس اللي عاملينه جامدين آخر حاجة ناس كده فظيعة بس برضو ماعرفهمش وإن كان فيهم كذا حد ظهر قبل كده وبقى معروف بس الأغلبيه ماعرفهمش .. المهم اني حبيتهم وعشقتهم وبقيت اتفرج على البرنامج كل يوم .. ويشاء السميع العليم اني اعرف بالصدفة ان الناس بتاعة من غير مقص هما بتوع عرض قهوة سادة .. طبعا من غير كلام حلفت اني لازم اشوف العرض ده .. وفعلا روحت عشان احضر عرض قهوة سادة وعينكم ما تشوف إلا الجمال والإبداع والفن والفنانين اللي بجد .. صدقوني أنا متأخرة في البوست ده بتاع شهر مثلا عشان مش عارفه اقول عنهم ايه .. الكلام فعلا مايعرفش يوصف ابداع الناس دي .. بجد بجد أنا هحاول بس مهما قولت عايزاكم تبقوا متأكدين ان ده اقل من حقهم ومن اللي يتقال عنهم بكتيييير
العرض قهوة سادة .. قهوة سادة على حاجات كتير اوي .. قهوة سادة على فن جميل راح .. قهوة سادة على ظروف عايشينها .. قهوة سادة على حاجات حلوة ضاعت .. قهوة سادة على شباب حلم وقبل ما حلمه يتولد كان هو مات .. قهوة سادة على حاجات كتيير
العرض يفكرك بهم يضحك وهم يبكي .. انت بتضحك من أول ثانية لآخر ثانية ومش أي ضحك ده ضحك من اللي بيوقع من على الكراسي ده .. حاجة كده مش عادية .. صحيح ممكن تظبط نفسك متلبس كام مرة بلمحة حزن بتلمع جواك على حاجة حلوة راحت أما بيعدي عليها كلمة من كلامهم .. احساس من جواهم .. تعبير من تعبيراتهم الرائعة .. لكن برضو مش قادر تبطل ضحك أو حتى تقلله .. ده بالنسبة للمحة سريعة سريعة جدا كمان عن العرض
في حاجات كتير بقى في العرض ما ينفعش تتساب صحيح أنا مش ناقد ولا ليا في الكلام عن الفن بس ده مش كلام ناقد ده كلامي كحد شاف العرض وحبه وعجبه جدا
من الحاجات الكتير دي مثلا ونبدأ من الأول .. المشهد الأول .. يالهوووووي على ده مشهد .. العرض كله كوميدي آخر حاجة على عكس اسمه تماما ومع ذلك المشهد الأول ده فيه كمية حزن مش طبيعيه بالرغم من انه مفيهوش ولا كلمة إنما هما عملوه بشكل اكتر من رائع يحسسك انك عايز تعيط من غير سبب .. تعبيراتهم كانت رهيبة محتاج بوست لوحده للمشهد ده .. وبجد بحييهم مووت عليه .. من الحاجات الكتير دي كمان الموسيقى الجامدة الفظيعة والإضاءة الرهيبة والسرعة الغير عادية .. بسم الله ما شاء الله عليهم بجد كل حاجة من الحاجات اللي أنا قولتها دي تحسسك انك قاعد بتتفرج على حاجة مسجلة وبتتعرض في التليفزيون .. صعب اوي تكون بتتعمل ادامك حالا .. سرعتهم في أخذ أماكنهم في الاسكتشات ورا بعض وانت مش شايفهم .. تناغم الإضاءة مع الموسيقى مع حركة شرب القهوة في الفاصل بين الاسكتشات .. تحفة تحفة تحفة .. من الحاجات دي تاني مشهد عاملا رباب ناجي .. المشهد ده معمول بشكل رائع وهي صوتها جاااامد وأدائها فيه عالي .. عالي مووت يعني .. لو قعدت اتكلم من هنا لبكره على كل تفصيله في العرض مش هقدر اديها حقها .. لازم لازم تشوفوا بنفسكوا .. انا شخصيا ان شاء الله داخلاه تاني
وأخيرا وليس آخرا .. الممثلين اللي في العرض وأنا سيبتهم في الآخر في الروقان عشان بجد الناس دي الواحد مش يتكلم عليهم ده يقول فيهم قصايد .. ناس كده ماينفعش انك تقول على حد فيهم ( ممثل ) ما ينفعش انه يكون مجرد ( ممثل ) ده ( فناااااااان ) فنان بجد .. كلهم أداءهم أكتر من رائع وبحييهم كلهم على العرض الهايل ده

واسمحولي اني أحيي اثنين منهم تحية خاصة عشان دول خلاص بقوا ممثليني المفضلين لانهم شدوا انتباهي وحبيتهم

مووت من أول من غير مقص مرورا بالإعلانات لغااااية ما اتفرجت على قهوة سادة والاثنين دول هما .. محمد فراج وهشام اسماعيل .. الاثنين دول بجد مالهومش حل في كل حاجة كتلة من الضحك والفن والروعة ماشيه على رجلين والاتنين عليهم تعبيرات وش تهلك من الضحك .. زي ما كان عليهم في مشهد النكد تعبيرات ماكونتش مصدقة ان هما دول الاتنين اللي بيموتوني من الضحك .. بحييهم جدا واتمنى اشوفهم قريب اوي في حاجات تانية كتييير
في النهاية عايزة اقفل البوست ومش عارفه .. أقولكم أنا نسيت أعرفهم في الأول هقولكم بقى في الآخر هما مين
هما .. نتاج ورشة الارتجال و التمثيل المسرحي - الدفعة الثانية

العرض في دار الأوبرا على مسرح مركز الإبداع

المسرحية بتتعرض أيام الخميس والجمعة والسبت الساعة 8 بس لازم تكونوا هناك من 6 عشان تلحقوا تذاكر

:)

والعرض بجد بجد اتفرجوا وادعولي

جروب المسرحية على الفيس بوك هنا

ودي بعض الصور من العرض من على الجروب

مش كفاية حمص الشام ب 90 جنية .. لا وكمان مسكر وساقع

حمص الشام ب90 جنية

.. أيوه .. أيوه .. أيوه هو حمص الشام العادي بتاعنا ده

اللي هو بيبقى في كبايه وسخن وشطة و ليمون

.. آه والله العظيم هو بس ب 90 جنية .. عادي جداااا .. هقولكم أنا

في يوم من ذوات الأيام الرمضانية وبعد طول غياب عن الخروجات العائلية قررنا ننزل الحسين زي كل سنة .. أنا وبابا وماما واخواتي الاتنين وخالتي وأولادها و صاحبتي حبيبتي ميرو وصاحبة اختي الصغيرة .. لمة حلوة كده .. وفعلا نزلنا واتمشينا مشي مش طبيعي أساسا وكم الناس كان غير عادي .. ماعلينا من الناس احسن دول عايزين بوست لوحدهم والبوست النهاردة لحمص الشام

المهم من كتر ما مشينا تعبنا و قررنا نقعد نشرب اي حاجة في اي حتة وفي مكان ما تعبنا قعدنا وطلبنا حمص الشام.. وياريتنا ما طلبنا .. المشكلة مش في حمص الشام ولا في إنه جه بعد 3 ايام ولا حاجة خالص .. الحوار كله في الشلل اللي حصلي بعد حمص الشام .. المفاجأة الكبرى إن في الحسين مكان ما قعدنا اللي هو ما ينفعش اننا نطلق عليه كوفي شوب ولا حتى قهوة لانها كراسي محطوطة في الهواء الطلق في الشارع .. ما علينا .. أهو في المكان ده ال 6 حمص الشام

بـ 90 جنية .. يا نهاار يا نهاااااااااار .. 6 حمص الشام بـ 90 جنية .. ليييييييه ؟ عشان إيه ؟ .. هو مش حمص الشام ده كان بتاع الغلابة .. حد يفكرني بس .. مش ده اللي كانوا بيقولوا عليه ان الغلبان اما بيحب يخرج ويتفسح بينزل الكورنيش يتمشى ويضرب واحد حمص الشام بـ جنيه أو 2 جنيه آخره يعني وواحد درة ويمكن ترمس ويروح ويبقى اخر تمام ؟ .. طب ايه ؟

كبايه حمص الشام في المكان العجيب ده ب 15 جنية .. أما لو خدتها في كوفي بجد هتبقى بكام .. حسبي الله ونعم الوكيل .. وبدل ما نخرج نتفسح ونتسحر خرجنا شربنا حمص الشام .. ومشينا وكلنا مش مصدقين نفسنا وعمالين نتريأ ونضحك ومش فاهمين ليه يعني

بس ابن خالتي ما شاء الله عليه ركز ولقطها وقالنا ليه

:)

هو قال انهم وهما بيقدموا لنا حمص الشام اكييييييد سمعوا ميرو وهي بتتحاور معايا فافتكرونا مش عارفين حمص الشام فقالك عاملهم أجانب دول مش عارفينه اساسا .. أصل ميرو النيرو كوانيرو حبي وحياتي سمعت عمو اللي بيقدم الطلبات وهو بيقول هجيبلكم الشطة برا وما كان منها غيييييييييييييير ........... اتفرجوااااااااا واعذروني

:D

إيه شطة ؟ شطة إيه ؟ وازاي شطة يعني هو مش حمص الشام ده مسكر ؟؟ أييييييييييييييييييييي ي .. ودي كانت الجملة اللي قالتها صاحبتي حبيبتي وعملي الأبيض في الدنيا ميرو وهي مفزوعه وعلى وشها براءة الأطفال المختلطة بالإزبهلال والعته بعيد عنكم وعن السامعين .. وده كان لعدم معرفتها اساسا بحمص الشام .. وده اللي عرفته ساعتها - بعد اكتر من 6 سنين صداقه - إن الحلوة الجميلة الفظيعة اللي هتشلني قريب لعدم معرفتها بمعظم الحاجات الطبيعية اللي في حياتنا - واللي مش هقولكم عليها خليها في قلبي خلوني ساكتة - عمرها ما أكلت حمص الشام ولا كان حصل بينهم سابق معرفه اساسا غير شكليا من بعيد لبعيد فكانت فاكرة إيه ؟ إيييييييييه ؟ .. إن حمص الشام بعيد عنكم وعن السامعين والقارئين مسكر وساقع .. مسكــــــــررررررر وســااااااااقع .. والسبب في لونه ده إن الميه اللي معاه دي عصير فراوله على برتقال .. شوفتوا الهنا اللي انا فيه .. دي حاجة من الحاجات الكتيييييييير يا اخوانا .. ما أنا كنت ناقصاها ساعتها مش كفاية حمص الشام ب 90 جنية لا وكمان مسكر وساقع .. لنا الله

:D