.. أعز الناس

مازالت أجواء الربيع تقبضني وتثير حزني .. بالرغم من مرور الوقت وبعد مرور 8 سنوات مازال قلبي وعقلي يحتفظان بنفس المشاعر والذكريات لنفس الأجواء

يرتبط الربيع عند الجميع بالبهجة والسرور والألوان والزهور بالرغم من إجماعهم على أجوائه المتغيره والتي تنافي تماما كلام عمنا صلاح جاهين " الدنيا ربيع والجو بديع "

يأتي الربيع وتبدأ تجهيزات احتفالاته وتنتشر البهجة بين الناس .. وأحاول أنا التعايش مع هذه الأجواء السعيدة كالآخرين ولكني لا أستطيع .. فأنا لم استطع النسيان .. فمع بداية الربيع يبدأ انقباضي وحزني وشرودي .. ولم تستطع السنين إذابة كل هذا .. وكيف لها أن تستطيع ؟ .. فقد ارتبط الربيع في حياتي بذكرى رحيلك دون وداع .. لم تستطع السنين أن تمحي من ذاكرتي أي من ملامح هذا اليوم المؤلم ..فملامح هذا اليوم تظل تحوم برأسي وتسيطر على خيالي طوال هذه الفترة المسماه بالربيع واحتفالاته .. فرحيلك كان في اليوم السابق لاحتفال الربيع .. وسط البهجة والسعادة والصخب يأتي خبر رحيلك المؤلم .. رحيلك الذي لون كل شيء بالسواد .. رغم مرور السنوات الكثيرة فأنا اذكر كل تفاصيل هذا اليوم وكأنه كان أمس .. وكيف لي أن أنسى وهو يوم رحيل أعز الناس

الله يرحمك يا عمي يا حبيبي .. وحشتني أوي

على طول الحياة نقابل ناس ونعرف ناس ونرتاح ويا ناس عن ناس .. وبيدور الزمن بينا يغير لون ليالينا .. ونتوه بين الزحام والناس ويمكن ننسى كل الناس ولا ننسى حبايبنا أعز الناس حبايبنا .. أعز الناس حبايبنا

القسم اتضرب يا رجااااااااااااااله

أولا انا اسفه طبعا على التأخير اللي كان لظروف موودية بحته .. اعذروني

في يوم من ذوات الايام .. مساء الاحد .. قاعدين لا بينا ولا علينا وفجأة صوت زعيق وتهليل ودوشة رهييييييبة ووراها صوت حاجات بتنفجر وتطرقع وتتكسر .. وبما ان اخويا الصغير في الوقت ده كان في الشارع واحنا مش فاهمين اصلا ايه اللي احنا سامعينه ده ولا ايه اللي بيحصل فكان اننا كلنا نزلنا جري على الشارع فزعا .. واذا بالمشهد العجيب .. احنا بيتنا على مسافة قريبة من القسم .. نزلت الشارع لقيت الناس بتجري في كل الاتجاهات ومش فاهمين حاجة وانا ولا فارق معايا انا بدور على اخويا عشان اطمن .. واول ما خرجت للشارع اللي بيوصل بينا وبين القسم لقيت دخان - عرفت بعدها انهم كانوا مولعين في موتوسيكل - عند القسم قافل الشارع ومش مبين القسم اساسا وبرضو مش فاهمه ايه اللي بيحصل.. طب دي حريقة في عمارة جنب القسم ولا الصوت ده كابلات كهربا وضربت ولا ايه افهم طيب .. والحمد لله لقيت اخويا واطمنت عليه وبدأت اقف اتفرج بقى عشان افهم
المشهد بالظبط زي ماشوفته بعيني
مجموعة شباب كتيييييييييير .. كتير كتير يعني .. ودخان .. واصوات مفرقعات او رصاص ماعرفش اهي اصوات وخلاص .. وطوب وازاز بيتكسر .. وكل ده ضد القسم
شباب بيحدف طوب وشباب بيحدف حاجات كده مولعه ماعرفش ايه دي .. وشاب - ده انا كنت على بعد كام متر منه - راكب عربية القسم اللي هي البوكس دي و طلع بيها فوق الرصيف وعمال يخبطها في سور المدرسة لحد العربية ما اتدغدغت .. وفضل المشهد على كده تكسير وتخبيط وترزيع لغاية ما دغدغوا القسم وعربياته وبدأوا هتاف باسم الحربية وهنا بدأت اعرف انا هما مين وايه اللي بيحصل عشان الناس اللي في الشارع بدأت تحكي اللي حاصل وبدأت اخد كلمة من هنا وحوار من هنا والحمد لله طلعت بيتنا وانا فاهمه ومتفرجة واخر تمام .. بس تاني يوم على النت لقيت حاجات عجيبه كده ان الموضوع دام بتاع 3 ساعات وده اصلا ماحصلش ده فتي .. وان الموضوع كان اشتباك بين الناس اللي في القسم والشباب بتوع الحربية دول ودي بصراحه انا ماعرفش انا ماشوفتش في الاول غير كام عسكري كده واختفوا في دقايق وبعد كده ماظهرش اي حد من القسم غير بعد ما الشباب دول اختفوا من الشارع والمكان هدي تاني ومابقاش فيه غير المتفرجين من اهالي المدينة .. وبرضو الله اعلم يمكن كان فيه وانا ماخدتش بالي .. واللي عرفته من كلام الناس برضو ان كل اللي حصل ده كان انتقاما لأحد زملائهم اللي اتاخد في القسم قبلها بيومين تقريبا

وانتهى اليوم بانتهاء هذا العرض وانشكاح المتفرجين اللي في الشارع ودعوات الأمهات من المتفرجين - ربنا يحميهم لشبابهم ويخليهم لأهاليهم .. رجالة بصحيح - عندهم حق العيال بصراحه كانوا رجولة رجولة يعني

:)

المضحك عندنا بقى في الموقف هو المنظر بعد الحوار ما خلص .. خلاص الفرجة خلصت والناس بدأت تركز بقى مع بعضها .. وبدأوا بقى في سلامات واخبارات والجيران بقى اللي ماشافوش بعض من شهور ومن سنين اتجمعوا وهات يا رغي واسئلة عن الأحوال والاخبار وبقت هيصه .. بس كان جو من الالفة فظيع

:)

المحزن بقى في الموقف واللي كان غريب عليا .. هو موقف حكتهولي اختي بعد الحوار ده .. وهو ان طفلة من جيراننا كانت في الشارع في الوقت ده .. طفلة عندها بتاع 6 سنين .. ف يا عيني اول ما سمعت اللي انا حكيته ده كله جريت على البيت وهي منهاره وعماله تصرخ وتعيط وهي بتخبط على الباب .. افتحي يا ماما اسرائيل جت عندنا افتحي يا ماما اسرائيل جت

ساعتها حسيت بحزن على ذاكرة وتفكير وخيال طفلة زي دي

والفيديوهات هتلاقوها على اليوتيوب

ومرة تانية اسفه على التأخير واسفه كمان لو البوست طلع ملخبط حبتين تلاتة ستاشرلنفس الظروف الموودية البحتة

:)

تحديث

....................................

في حدث غير مسبوق في مدينتنا اتقلبت الدنيا وقسم الشرطة اتدغدغ فوق دماغ اللي جواه

والدنيا ولعت .. ضرب تلاقي .. انفجارات تلاقي .. عربيات مابقالهاش معالم تلاقي .. مظاهرة وهتاف باسم الحربية هتلاقي - عشان اللي قاموا بالموضوع اجمد شباب حربية - والله ولسه فيكي رجالة يا مصر

الحدث لسه خلصان من دقايق ومش قادرة اجمعلكم ملامحه اللي شوفتها بعيني .. بس كل اللي اقدر اقوله ان الدنيا مقلوبة عندي

وتقريبا الداخلية هتبات في شارعنا النهاردة -اصلي بكتب وسامعة العربيات تتوافد على القسم جنب بيتنا .. سوري قصدي بواقي القسم - سنوافيكم بكافة الأخبار أول ما اعرف اجمع

ويمكن تلاقوا صور وفيديو كمان عشان اللي معايا دلوقتي صوت بس

بصوا بصوا من الآخر انا هاجي تاني وهبقى مركزة اكتر ان شاء الله

ده لو فضل حد في حينا في بيته

:)

.. خوف

في عز فرحتنا دايما نلاقي الخوف واقف في سكتنا مشتاق لنا وملهوف كأننا واحشينه مع إننا عايشينه .. خوف خلانا واحنا مغمضين بنشوف .. لا عمره خلى القلب يفرح فرحه بجد ولا عمره خلى حد يطمن لحد

كل يوم بنقابل ناس ونتعرف على ناس منهم اللي بيبقى مقابلة عابرة ومنهم اللي بيكمل معانا حياتنا .. نبدأ نتعرف أكتر ونقرب أكتر ونعرف عن بعض أكتر وأكتر .. حياة وطباع وأسلوب .. مشاكل وأفراح وحاجات كتيير .. ويبدأ مع التعارف أكتر والقرب أكتر التعود أكتر وأكتر .. ومعاهم ييجي اللي قالت عليه أنغام " كل ما نقرب لبعض كل ما يزيد الاشتياق .. كل ما نحب اللقا كل ما نخاف م الفراق " .. دايما أما بنقرب من حد ونحس إن الحد ده من الناس الكويسة اللي ما تتعوضش ونتعود على وجوده في حياتنا أيا كانت صفته إيه - صديق حبيب قريب - لازم يظهر مع التعود ده الخوف من فراقه .. لأي سبب من الأسباب بيتواجد الخوف .. خوف من حاجات كتير .. خوف من إنه يطلع غير ما احنا شايفينه .. خوف من إنه يفهمنا غلط في أي حاجة فيحصل فراق .. خوف من إننا نضيعه من حياتنا بأي سبب ممكن جدا يكون السبب هو الخوف ده نفسه

خوف خوف خوف .. ومن كتر الخوف نحاول نفكر في " ما بلاش نتعود كده على بعض أحسن لو ضيعنا في يوم من بعض هنضيع اوي ونتعب أوي لو مرة حسينا بحنين ولقينا صعب نلاقي بعض " .. - آه والله بتقول حكم - بس ساعتها بنلاقي إننا خلاص أصلا اتعودنا واللي كان كان .. لكن ما نقدرش برضو نعمل زيها - انغام - ونقول " مش مهم الجاي إيه احنا نتعب روحنا من دلوقتي ليه .. لو حتى فرقنا الوداع .. لو حتى ضيعنا في الهوا .. مش برضو الضياع احساس هيجمعنا سوا " ما ينفعش الروقان ده لان الضياع والوداع بيوجعوا ويتعبوا ما هماش بالسهولة دي .. بالذات لو هتفارق حد فراقه خسارة فادحة في حياتك .. فبتستسلم للأمر الواقع بعد تعودك وتبدأ رحلة جديدة أصعب وهي الخوف من المشاكل والزعل والفهم الغلط اللي ممكن يؤدوا للخسارة .. وتفضل في كل ده .. في محاولات للحفاظ على صداقتكم .. وده ليه وجهين .. من ناحية ف انت خوفك ده جاي من غلاوة الانسان ده عندك فبتحاول انك ما تخسروش ودي حاجة كويسة .. ومن ناحية تانية انكم من كتر الخوف على زعل بعض ومن كتر المحاولات دي بتزيد بينكم الحساسية وممكن تحسوا انكم بتتلككوا لبعض أو كل واحد فيكم بيتلكك لنفسه عشان يحاسب نفسه على زعل التاني واللي ممكن جدا مايكونش هو سبب فيه أساسا

ويفضل الخوف يزيد ويزيد .. ويوصل لإنه يرخم على أي لحظة حلوة أو أي ميزة حلوة في علاقتكم ببعض لإنك بتتخانق مع نفسك عشان تبطل حاجات بدأت تتعود عليها وانت خايف من تعودك عليها لإنها لو انتهت في يوم من الأيام لسبب خارج عن إرادتك هيوجعك اوي احساسك بفقدانها زي ما هيوجعك تأنيبك لنفسك إنك سيبتها توصل للدرجة دي من التعود .. ورجعت تآمن للناس أوي كده

ويا سلام بقى لو قدرت تحافظ عليه من كل ده وما بقاش يأثر في علاقتكم أي حاجة لانكم فاهمين بعض كويس اوي وأغلى عند بعض من أي زعل ولا أي مشكلة ممكن تحصل بينكم .. وييجي بقى الخوف الأكبر .. تدخُل الغير في الحياة دي .. إن الغير ما يعجبهومش اللي انتوا فيه ده وتطلب معاهم فركشة .. وللأسف الغير دول ليهم سلطة على حد فيكم وأصحاب رأي و قرار كمان ومش حبينك كده لله في لله لمجرد إنهم مش عارفينك أو مش عايزين يعرفوك أساسا .. انت في نظرهم زفت والسلام .. ومش في إيدك أي حاجة تعملها ولا حتى تغير وجهة نظرهم دي لإنهم تربسوا على كده خلاص .. ويزيد خوفك وتحس إنه بدأ العد التنازلي .. وهنا تتأكد إن خوفك الأولاني اللي بتخافه أول ما تتعود على وجود ناس في حياتك وتحبهم ماكانش هبل منك ولا حاجة لان اسباب الخوف أهيه ممكن تتحقق ولو بعد سنين طويلة .. ومع ذلك فممكن برضو يكون مجرد خوف لانك مش ممكن تتنازل عنه ابداااااااا .. أو بمعنى أصح خوف بقى رعب مش فارقة انت مش ممكن تتنازل عنه ابدااااا غصب عن أي حد وخلاص - بلطجة يعني - .. ايووون بلطجة هو كده وإن كان عاجب .. قال اتنازل قال

أصحابي حبايبي أصدقائي الصدوقين ياللي بخاف من ضياعكم مني ربنا مايحرمنيش منكم ابداااااااااا ابدا

وعمري ما ازهق ولا استغنى ولا اتنازل عنكم .. تبقوا كلكم مشاكل .. تبقوا مزفتين بزفت - على رأيي :) - عاجبني .. وانا ما اشتكتلكومش ما تشيلوش انتوا همي ومالكومش دعوة .. هو أنا فيه في حياتي كام حد فظيع زيكم .. ناس عجيبة صحيح

;)

أعقل ؟؟؟؟؟؟؟ تفتكروا ؟؟

هابي بيرث داي تو يو .. هابي بيرث داي تو يو .. هابي بيرث داي تو بيرو .. هابي بيرث داي تو يو .. هييييييييه

كل سنة وانتي طيبة يا بيرو يا حبيبتي وعقبال مليووون سنة - أيون أيون أنا بقولي فيها حاجة دي - والله وكبرتي يا حبيبتي ووصلتي لسن العقل و العاقلين .. بس مش عارفه بصراحه إن كنتي هتعقلي ولا لأ .. والله ما عارفه .. أنا كنت بفكر بجدية في الموضوع ده وقولت أحاول وكده يمكن فعلا أعقل بس الموضوع اتقابل برفض فزززززيع من أصدقائي المقربين وحلفوا لا يقطعوا علاقتهم بيا لو عقلت فعلا زي ما بقول كده .. ومنهم كمان اللي قال إني بكدب وعمري ما هعرف أعقل أساسا ومش مصدقيني

:)

وف نفس الوقت الناس اللي في البيت نفسهم ومنى عينهم إني أعقل وأبقى زي الناس الكُبارين - أبطل آكل مصاصة وأكلم الدباديب بتاعتي وأبطل اشتريهم أساسا وأبطل اسمع أغاني الأطفال اللي كنت بسمعها وأنا صغيرة ........ إلخ - أبقى عاقلة يعني وكده .. ف مش عارفه أحقق لمين رغبته وأحبط مين وأضيع أمله .. بس أقولكم على سر شكلي هحبط فريق البيت ومش هرجع عاقلة تاني - آه أصل انا في الأساس كنت عاقلة وطرقعت على كبر - أصلي لقيت إني زهقت من العقل وحبيت الجنان و الطرقعة أكتر واللي ماعرفش أساسا ظهروا كده إزاي ولا أصلا كانوا فين .. كلام تاني في سركم هو اللي أنا متأكده منه في موضوع الظهور ده إن سببه الأساسي معرفتي لحبيبة قلبي ميرو النيرو كوانيرو -هو فيه طرقعة أكتر من كده - ماحدش يقولها بقى

:)

Happy BirhDay To Me ..

.. معرض الكتاب 2009

الحمد لله ربنا كتبهالي ورحت المعرض قبل ما يقفل .. بداية فأعتقد إن زيارتي للمعرض السنة دي كانت مختلفة بعض الشيء .. يعني شوية كده فيها اختلاف عن كل سنة في كام حاجة كده هييجوا في النص

كالعادة في هذا الوقت من كل عام هو معرض الكتاب بكتبه بقاعاته بسلطاته ببابا غنوجه :) .. ما اختلفش في شيء غير شوية التغيير في أماكن القاعات ودور النشر – واللي مش هيفرق معايا في حاجة تنقلها أو ثباتها لاني هدوخ والف حوالين نفسي يعني هلف حوالين نفسي .. هو ده معرض الكتاب – والاختلاف الثاني كان في إن الفلوس السنة دي كانت بتخلص أسرع من أي سنة تانية لسببين .. الأول إن ما شاء الله الكتب كلها غالية نااار .. والثاني إني السنة دي رايحة وعارفة انا عايزة إيه يعني مش بتفرج واللي يعجبني اشتريه .. لا أنا رايحة ومعايا لستة مليانة كتب

طارق بس وهو بيوقع لي هدوء القتلة .. طمع بقى ما انا ماصدقت

:)

سيبنا من كل الرغي ده بقى ونيجي لأهم اختلاف في الاختلافات .. وهو إني السنة دي ولأول مرة في حياتي حضرت حفلات توقيع للكتب .. وقابلت كاتبي المفضل .. الجميل طارق إمام .. وبجد مش عارفه أقولكم إيه ولا إيه لو قعدت أحكي عن فرحتي وسعادتي من هنا لبكره مش هخلص .. حاجة جميلة جدا جدا إنك تقابل كاتبك المفضل ويوقعلك على الكتاب – الأرملة تكتب الخطابات سرا - والأجمل واللي كان هيخلي عقلي يطير من الفرحة هو إن كاتبك المفضل يكون عارفك – من كتر مانت مصدعو بردودك على كتاباته .. ودي ميزة حبيبي الفيس بوك – يختيييييييييييي كنت هطير من الفرحة وهتجنن وأنا واقفة بتكلم معاه وأما طلع عارفني وعارف أد إيه انا متابعاه ومتابعة كل كلمة بيكتبها .. وطلع فعلا طارق إمام زي ما دايما بسمع عنه .. بجد مش بس كاتب رائع وكمان إنسان أكتر من رائع .. شخصية جميلة جدا أي حد يسعد بمعرفته
وفضلت أنا بقيت اليوم مابقولش أي حاجة طول ما أنا ماشية غير طلع عارفني .. طلع عارفني .. طلع عارفنييييييييي ..... مجنونة انا عارفه

:)

وآخر اختلاف كان ثاني أجمد حاجة في اليوم وهو توقيع كتاب ضربة شمس .. وبما إن فيه ضربة شمس يبقى فيه ضربشمساويين .. يعني أجمل ناس ممكن تقابلهم .. ناس حقيقية كده وجميلة .. عدد غير عادي من الضربشمساويين جايين يباركوا لزعيم الضربشمساويين خالد كساب على كتاب ضربة شمس .. وده لوحده حدث كده مالهوش حل وأنا ببقى مبسوطة مووت أما بنتقابل .. بس للأسف يومي خلص بدري أوي ومالحقتش أكمله معاهم لإني كنت مضطرة أروح .. يلا خيرها في غيرها

ودي كانت أحداث معرض الكتاب 2009 واللي بالحدثين السابقين دول بعتبره أجمل معرض كتاب عدى عليا في حياتي .. صحيح رجعت منه مفلسه ومديونة بس ربنا يخليلي ماما وسلفة معرض الكتاب بتاعة كل سنة .. وأهل الخير برضو .. واللي معاه فلوس زيادة يسيبها على باب البلوج وهو خارج .. تعاطفك لوحده مش كفاية

:)

غدا في معرض الكتاب

أخيراااااااااا وبعد طول انتظار هروح بكرة ان شاء الله معرض الكتاب .. وطلع زي ماالناس بتقول ان طولة البال تبلغ الأمل وعلى رأي اللي قال اللي يصبر ينول - بعيدا عن وصلة المصطبة دي - .. من حسن حظي إن بكرة ان شاء الله في معرض الكتاب حدثين مهمين ليا جدااا

والحدثين دول هما حفلتين توقيع لكتابين كنت منتظراهم من كتييير وهما

رواية الأرملة تكتب الخطابات سرا .. لكاتبي المفضل وراوي جمهورية ضربة شمس الجميل طارق إمام

حفلة التوقيع في جناح دار العين في جناح المانيا من الساعة 3 : 7

وكتاب ضربة شمس .. لرئيس جمهورية ضربة شمس العظمى الزعيم خالد كساب

حفلة التوقيع في جناح دار ميريت في صالة 4 من الساعة 4 : 7

الأرملة تكتب الخطابات سرا وضربة شمس في معرض الكتاب في يوم واحد .. أحمدك ياااااااااارب

.. تاااااج السعاااااادة .. برضو السلطاااااااانية

ورجعنا للأسئلة بعد الامتحانات

ده تاج كان المفروض يتجاوب وينزل من زمااااااان وكتير بس الظروف بقى

التاج ده جايلي من الصديق العزيز ابن مصر .. سوري يا محمد على التأخير ده كله

تاج السعااااااادة .. برضو السلطااااااانية

:)

ماهي السعادة من وجهة نظرك ؟

هو أنا أولا ممكن أقلبها شوية بس وبدل السعادة دي أخليها انبساط ، أصلي مش عارفه ليه حاسه ان السعادة دي بتاعة نهارك سعيد يا نينه :) يعني على اساس ان الواحد بيقول أنا مبسوط اكتر من أنا سعيد دي - مع احترامي لكاتب التاج طبعا - ما علينا كده أو كده خلينا في السؤال اللي أنا تقريبا مش عارفه إجابته بس هحاول

تصدق مش عارفه .... اصلها اكيد حاجات كتير عميقة اوي- كويسه عميقة دي - صعب تتجاوب في سؤال أقولك ممكن نقول .. بال مرتاح وقلب مظأطط وابتسامة على الشفايف مع لمعة في العينين .. ده اختصار لسعادة .. وممكن نخليها أغنية يسرا في فيلم حرب الفراولة

السعادة تبقى إيه ؟ إمتى احس اني سعيدة ولا ليه ؟ امتى احس القلب يرجع للصبا وتبقى كل الناس لذيذة وطيبة ونجوم سمايا احس بيها قريبة وان مهما الكون قسي هقدر عليه .. أهي دي برضو سعادة

كيف تصل إلى السعادة ؟

أعتقد يعني أعتقد أما أعمل حاجات بتفرحني وفي نفس الوقت أعمل حاجات ترضي ربنا أكيد ساعتها هكون سعيدة

هل السعادة وهم أم أنها حلم صعب ؟

ماعتقدش أبدا انها وهم لان أكيد كل واحد فينا فيه في حياته حاجات بتخليه مبسوط وسعيد .. لكن ممكن فعلا تكون حلم صعب في ظل كل حاجة حوالينا .. واللي يأكد إجابتي دي إن الناس في عز ما هم بيضحوا تلاقي حد قالك خير اللهم اجعله خير .. ربنا يستر .. زي ما يكون ماينفعش يتبسط كده من غير نكد

هل السعادة طريق للنجاح ؟ وضح ؟

آه .. المفروض .. لان الواحد في الطبيعي أما بيكون سعيد بيبقى عايز يعمل حاجات كتييير .. ف لو وظف طاقته الإيجابية - مصطلح ضربشمساوي - دي صح أكيد هيوصل للنجاح

ما هي أكثر اللحظات التي شعرت فيها بالسعادة ؟

إممممم .. دي بقى حاجات كتير وفي نفس الوقت ممكن تكون حاجات عجيبة أو بسيطة أوي زي كده منير أما قال " سعات بحب حاجات مايحبهاش غيري " أنا برضو كده وسعات حاجات تبسطني تكون الحاجات دي ماتبسطش حد غيري .. فممكن نقول من اللحظات دي مثلا أما أشوف طفل بيبتسم ابتسامة تحس انها من قلبه أوي .. أما أتفوق في رمضان على جدول أعمالي واعمل حاجات كويسه .. أما بكون مع ميرو حبيبتي وبنعمل حاجات بنحبها .. وأما بشوفها مبسوطة وعينيها بتلمع من الانبساط .. أما أقول أو أعمل حاجة وتضحك ماما أوي ماعرفش ليه ببقى مبسوطة جدا اني ضحكتها اوي كده .. أما احس اني ساعدت حد او قدرت اقف جنبه صح وهو محتاجلي .. ووجودي في اسكندرية طبعا دي مش عايزة كلام

:)

هل ممكن أن تحقق كل شيء ؟

اللي هو إيه أصلا الكل شيء ده .. هو الطبيعي ان مفيش انسان بيملك كل شيء أو يحقق كل شيء .. لكن ممكن تكون أحلامي بسيطة و تكون هي بالنسبة لي كل شيء وتتحقق .. مفيش حاجة بعيد عن ربنا

:)

السعادة تجعلك تقبل على الحياة أم لا ؟

أكيد طبعا .. الواحد وهو مبسوط بيبقى حابب كل حاجة حواليه وبيبقى عايز ينطلق ويخرج ويعمل كل حاجة حلوة .. وزي ما قال منير برضو في نفس الأغنية " لو زارني فرحي ساعات حواديتي مابتخلصش .. قمري حصان في الليل نجومه دي بترقص "

هل أحسست يوما أنك وصلت لقمة السعادة ؟

السعادة إحساس وفي اعتقادي إن مفيش احساس ليه حدود عشان توصل لآخره أو قمته .. يعني ممكن تحصلي حاجة وابقى حاسة إن ده أكتر يوم أنا حسيت فيه بالسعادة ومفيش سعادة أكتر من كده .. وبعدها تحصلي حاجة تانية أبقى سعيدة بيها أكتر وأكتر .. فأحس ان ده اسعد يوم في حياتي .. فالسعادة والأحاسيس عموما مالهاش حدود

لماذا تمر أوقات السعادة بسرعة ؟

أهو السؤال ده بقى انا مش هعرف أجاوبه لإني كاتبه عنه بوست وكنت ناسياه والسؤال فكرني بيه هبقى انزله ان شاء الله .. لكن بالنسبة للسؤال فالبوست هيأكدلك اني فعلا ماعرفش الإجابة .. ده هو البوست كله أصلا سؤال كبييير

هل ترى السعادة في التدين ؟

أكيد التدين عامل مهم من عوامل السعادة لان الانسان المتدين بيكون مرتاح وراضي ودي حاجات بتخليه مبسوط وسعيد .. بعدين القرب من ربنا سبحانه وتعالى في حد ذاته ليه سعادة خاصة ماينفعش نقارنها بأي سعادة ولا ينفع تتوصف

هل انت متفاءل أو عندك أمل ؟ وضح ؟

والله مافكرتش فيها قبل كده .. بس أنا مش متشائمة يعني .. بس فكرة التفاؤل والأمل والحياة وردي مش عارفه يمكن تكون أكتر يقين بالله .. بمعنى إني مؤمنة جدا ان كل خير ربنا كاتبهولي هيكونلي وهشوفه وماحدش يقدر يمنعه عني .. هيجيلي هيجيلي مادام ربنا كاتبهولي :) .. لو ده هو التفاؤل أو الأمل يبقى أنا متفائلة مش مشكلة

:)

إذا شعرت بالحزن ماذا تفعل ؟

غالبا بانعزل وأقعد لوحدي عشان لا ابقى خنيقة مع الناس ولا اتغابى على حد :) .. بس ممكن ساعات ابقى عايزة اتكلم عشان مانفجرش وده مش مع أي حد طبعا والحمد لله ان ربنا رازقني بالناس اللي اقدر اخنقهم معايا في الوقت ده ;) بس الأغلب ان وأنا متضايقة أو حزينة يعني هتلاقيني قاعدة ساكتة لوحدي كده وفي حالي

هل يستمر معك الحزن فترة أم ينقضي في الحال ؟

طبعا بيستمر .. أنا اصلا شخصية بيسيطر عليها الموود .. بعدين اعتقد انه لو ما استمرش لفترة أيا كانت كبيرة أو صغيرة ما يبقاش حزن .. يبقى أي حاجة تانية .. مضايقاية صغيرة مثلا وعدت وخلاص

ما رأيك في الأفراد المتشائمين ؟

يخنقوا ويجيبوا احباط .. بعدين وأنا أعرف أفراد متشائمين ليه هي ناقصة هم

:)

أنا كده الحمد لله رب العالمين خلصت التاج بتاعي ويااارب ماكونش مملة ولا كلامي ملخبط زيادة عن اللزوم .. وكل تاج وانتوا طيبين .. يبقى حد يعملها تاني

:)

.. كلام

ده كلام مالهوش لا بداية ولا نهاية .. مجرد كلام .. كلام وبس .. أصلنا أيام امتحانات وأيام الامتحانات الواحد بيبقى كلامه كتير وقليل

كتير عشان عنده كلام كتير عايز يقوله أو أهو بيرغي في أي حاجة تخرجه من موود المذاكرة والسلام .. وقليل لانه من كتر ماهو مخنوق ومش طايق نفسه بسبب الامتحانات فمش عايز يتكلم

الواحد اتعود إن دايما أيام الامتحانات بيظهر فيها حاجات بتلمع ادام عينيه طول الوقت وتبعده عن المذاكرة وتشغله .. زي الأفلام اللي بيموت فيها وأجمد الأفلام اللي بتتجمع كلها لوقت الامتحانات - زي هاري بوتر اللي دايما لازم ييجي ليلة امتحاني - والبرامج والمسرحيات والحركات .. وده عارفينه كل سنة .. انما المره دي اتقرر إننا ننشغل بشكل مختلف شكل أكثر فاعلية .. ضرب غزة قبل الامتحانات بكام يوم .. واللي مش هحكي طبعا عمل إيه في الكل .. والأخبار والتقريرات والتنديدات والاتهامات والاجتماعات والاتصالات وكل ما هو ات .. واللي مابيأتيش من وراه حاجة اساسا

أما الواحد يبقى قاعد بيذاكر حقوق انسان وقانون دولي ومجلس الأمن وقراراته الواجبة الاحترام والتنفيذ ومحكمة العدل الدولية وقراراتهم الملزمة .. ويخلص مذاكرة ويقوم يفتح التليفزيون عشان يشوف الأخبار والأحداث وصلت فين أو بمعنى أصح عدد الناس اللي رايحين ادام عينينا وصل لكام .. يلاقي مكتوب في شريط الأخبار مجلس الأمن يقرر وقف اطلاق النار الفوري في غزة .. وبعدها بكام عنوان أولمرت يعتبر قرار مجلس الأمن غير قابل للتطبيق

يا ترى المفروض إن الواحد المذاكر ده يروح تاني يوم الامتحان يكتب إيه .. يكتب اللي بيقوله الكتاب ولا اللي بيقوله الواقع والأخبار

أما تلاقي الأخبار جايبالك أطفال فضلوا محجوزين في بيت 4 أيام متعلقين بجثث أهاليهم 4 أيام لا أكل ولا شرب وعايشين مع جثث عيلتهم .. رعب وفزع وجوع ويُتم وضياع ومصير مجهول ومع كل ده مطلوب اني أكتب في الامتحان ان حقوق الإنسان محفوظة وقرارات مجلس الأمن مُلزمة وبتتنفذ والحياة وردي واللي يقول غير كده الله يحرقه .. ما علينا أنا هسكت بقى عشان أنا قولت من الأول إن الكلام ده لا ليه عندي بداية ولا ليه نهاية

حسبي الله ونعم الوكيل

مفيش كلام

بجد فعلا مفيش كلام .. اصل ايه الكلام اللي ممكن يتقال

اما يبقى من الظهر لغاية دلوقتي 225 شهيد و700 جريح .. يبقى ايه الكلام اللي ممكن يتقال

اما غزة تتعرض لمذبحة يموت فيها العدد ده - ولسه اللي جاي - واسرائيل بتقول ان دي مش النهاية وان اللي حصل ده مجرد افتتاحية لمعركة طويلة مدروسة ويكون الرد العربي او بمعنى اصح الحاجة اللي على اثرها اتذكر العرب في الاخبار هي الاتصالات والتنديدات والادانات .. يبقى فعلا مفيش كلام

اما يبقى كل ده حاصل من الصبح وتيجي تتكلم مع حد عليه يقولك انت بتتكلم على ايه هو ايه اللي حصل .. يبقى مفيش كلام

اما تحكيله اللي حصل وانت هتتشل ويسمعك وفي الآخر يسيبك ويمشي مش من غير ولا كلمة ده من غير اي تعبير على وشه يختلف عن قبل ما يسمع .. يبقى مفيش كلام

لكي الله يا غزّة

مش قادرين نعملها حاجة بس ما ننساهاش كمان في دعائنا وصلاتنا

دعوة لصيام الاثنين القادم والدعاء لأهل غزّة

.. قهوة سادة

أقول إيه أو أبدأ منين .. بصراحة مش عارفه أساسا .. أصلهم يتقال عليهم كتيييير وكتييير اوي وف نفس الوقت الكلام مايكفيش واللي هما عاملينه أكبر من الكلام بكتييير .. أقولكم تعالوا كالعادة نبدأ من الأول خالص .. استنوا أما أقولكم أنا بتكلم عن مين وعن ايه .. أنا بتكلم عن العرض المسرحي " قهوة سادة " .. حتة عرض مالهوش حل .. مالهوش حل بكل المقاييس يعني .. بقالي فترة كبيرة بسمع عن مسرحية رهيبة اسمها قهوة سادة وكل الناس بتقول عنها انها جامدة مووت بس ماكنتش شوفتها ولا أعرف مين اللي عاملها اساسا .. وف يوم في أول رمضان اتفرجت على برنامج اسمه " من غير مقص " حاجة كده تحفة والناس اللي عاملينه جامدين آخر حاجة ناس كده فظيعة بس برضو ماعرفهمش وإن كان فيهم كذا حد ظهر قبل كده وبقى معروف بس الأغلبيه ماعرفهمش .. المهم اني حبيتهم وعشقتهم وبقيت اتفرج على البرنامج كل يوم .. ويشاء السميع العليم اني اعرف بالصدفة ان الناس بتاعة من غير مقص هما بتوع عرض قهوة سادة .. طبعا من غير كلام حلفت اني لازم اشوف العرض ده .. وفعلا روحت عشان احضر عرض قهوة سادة وعينكم ما تشوف إلا الجمال والإبداع والفن والفنانين اللي بجد .. صدقوني أنا متأخرة في البوست ده بتاع شهر مثلا عشان مش عارفه اقول عنهم ايه .. الكلام فعلا مايعرفش يوصف ابداع الناس دي .. بجد بجد أنا هحاول بس مهما قولت عايزاكم تبقوا متأكدين ان ده اقل من حقهم ومن اللي يتقال عنهم بكتيييير
العرض قهوة سادة .. قهوة سادة على حاجات كتير اوي .. قهوة سادة على فن جميل راح .. قهوة سادة على ظروف عايشينها .. قهوة سادة على حاجات حلوة ضاعت .. قهوة سادة على شباب حلم وقبل ما حلمه يتولد كان هو مات .. قهوة سادة على حاجات كتيير
العرض يفكرك بهم يضحك وهم يبكي .. انت بتضحك من أول ثانية لآخر ثانية ومش أي ضحك ده ضحك من اللي بيوقع من على الكراسي ده .. حاجة كده مش عادية .. صحيح ممكن تظبط نفسك متلبس كام مرة بلمحة حزن بتلمع جواك على حاجة حلوة راحت أما بيعدي عليها كلمة من كلامهم .. احساس من جواهم .. تعبير من تعبيراتهم الرائعة .. لكن برضو مش قادر تبطل ضحك أو حتى تقلله .. ده بالنسبة للمحة سريعة سريعة جدا كمان عن العرض
في حاجات كتير بقى في العرض ما ينفعش تتساب صحيح أنا مش ناقد ولا ليا في الكلام عن الفن بس ده مش كلام ناقد ده كلامي كحد شاف العرض وحبه وعجبه جدا
من الحاجات الكتير دي مثلا ونبدأ من الأول .. المشهد الأول .. يالهوووووي على ده مشهد .. العرض كله كوميدي آخر حاجة على عكس اسمه تماما ومع ذلك المشهد الأول ده فيه كمية حزن مش طبيعيه بالرغم من انه مفيهوش ولا كلمة إنما هما عملوه بشكل اكتر من رائع يحسسك انك عايز تعيط من غير سبب .. تعبيراتهم كانت رهيبة محتاج بوست لوحده للمشهد ده .. وبجد بحييهم مووت عليه .. من الحاجات الكتير دي كمان الموسيقى الجامدة الفظيعة والإضاءة الرهيبة والسرعة الغير عادية .. بسم الله ما شاء الله عليهم بجد كل حاجة من الحاجات اللي أنا قولتها دي تحسسك انك قاعد بتتفرج على حاجة مسجلة وبتتعرض في التليفزيون .. صعب اوي تكون بتتعمل ادامك حالا .. سرعتهم في أخذ أماكنهم في الاسكتشات ورا بعض وانت مش شايفهم .. تناغم الإضاءة مع الموسيقى مع حركة شرب القهوة في الفاصل بين الاسكتشات .. تحفة تحفة تحفة .. من الحاجات دي تاني مشهد عاملا رباب ناجي .. المشهد ده معمول بشكل رائع وهي صوتها جاااامد وأدائها فيه عالي .. عالي مووت يعني .. لو قعدت اتكلم من هنا لبكره على كل تفصيله في العرض مش هقدر اديها حقها .. لازم لازم تشوفوا بنفسكوا .. انا شخصيا ان شاء الله داخلاه تاني
وأخيرا وليس آخرا .. الممثلين اللي في العرض وأنا سيبتهم في الآخر في الروقان عشان بجد الناس دي الواحد مش يتكلم عليهم ده يقول فيهم قصايد .. ناس كده ماينفعش انك تقول على حد فيهم ( ممثل ) ما ينفعش انه يكون مجرد ( ممثل ) ده ( فناااااااان ) فنان بجد .. كلهم أداءهم أكتر من رائع وبحييهم كلهم على العرض الهايل ده

واسمحولي اني أحيي اثنين منهم تحية خاصة عشان دول خلاص بقوا ممثليني المفضلين لانهم شدوا انتباهي وحبيتهم

مووت من أول من غير مقص مرورا بالإعلانات لغااااية ما اتفرجت على قهوة سادة والاثنين دول هما .. محمد فراج وهشام اسماعيل .. الاثنين دول بجد مالهومش حل في كل حاجة كتلة من الضحك والفن والروعة ماشيه على رجلين والاتنين عليهم تعبيرات وش تهلك من الضحك .. زي ما كان عليهم في مشهد النكد تعبيرات ماكونتش مصدقة ان هما دول الاتنين اللي بيموتوني من الضحك .. بحييهم جدا واتمنى اشوفهم قريب اوي في حاجات تانية كتييير
في النهاية عايزة اقفل البوست ومش عارفه .. أقولكم أنا نسيت أعرفهم في الأول هقولكم بقى في الآخر هما مين
هما .. نتاج ورشة الارتجال و التمثيل المسرحي - الدفعة الثانية

العرض في دار الأوبرا على مسرح مركز الإبداع

المسرحية بتتعرض أيام الخميس والجمعة والسبت الساعة 8 بس لازم تكونوا هناك من 6 عشان تلحقوا تذاكر

:)

والعرض بجد بجد اتفرجوا وادعولي

جروب المسرحية على الفيس بوك هنا

ودي بعض الصور من العرض من على الجروب