ضحكة عيون حبيبي

دائما ما أراها تتعجب عندما يتحدث أحدهم عن مدى روعة ابتسامتها .. واتعجب بدوري من تعجبها .. لحبي الشديد لابتسامتها ومعرفتي القوية عما يتحدثون عنه .. 

ولكن كيف لي أن ألومها وهي لا ترى ابتسامة عيونها .. كيف لها أن تعرف أن ابتسامة عيونها تخترق كل الحواجز وصولا إلى القلب والروح لتضفي عليهما نوعا من الراحة والبهجة - الغير مفهومة - ..

طفلتي الصغيرة .. لا أحد أيا كان سعيدا أو مهموما يستطيع أن يراكي تبتسمين ولا يبتسم بدوره لمجرد رؤيته لابتسامة عيونك الصافية المحرضة على الابتسام المليئة بالطفولة مثلك تماما 

شششششششششش

نفسي اعمل زي ايفا - بطلة وول إي - واتقفل وافصل خاااااااااالص وماحدش يقدر يرجعني .. انا بس اللي ارجع وقت ما اقرر اني مستعدة اني ارجع .. اتقفل كده لا اسمع حد ولا اتكلم مع حد ولا اشوف حد إلا بمزاجي طبعا .. لا تليفونات ولا ناس ولا اي حاجة
بس ايفا اتقفلت اما انهت مهمتها اللي نازلة عشانها .. اما انا ف هبقى مغلق للتحسينات

حب وحياة

 

كنت اعلم جيدا بحبهما.. ودائما ما كنت أرى هذا الحب في حديثهما.. في طريقة تعاملهما.. في هدية عيد ميلاده التي تهتم بها كثيرا وتنتقيها بعناية شديدة .. في الورد والشيكولاتة عندما يأتي بهما دون مناسبة..
ولكن اليوم، رأيت مشهداً بخمس وعشرين سنة حب وحياة..
عندما كنا نقف أمام العيادة، وأخبرته أن قلق الأيام الماضية قد انتهى.. وأن الطبيب طمأنها أن اختباراتها سليمة وليس بها شيء خطير كما كانوا يظنون.. 

 وإذا به يسجد لله شكرا ويقوم من سجوده وعيناه ممتلئتان بدموع طفل وجد أمه بعد أن ضاعت منه .. وأخذها بين أحضانه وكأنما وهبه الله إياها من جديد

 

 

.............

استيقظت على شعور بفجوة في صدرها تتسع بسرعة وتبتلع كل احساس بأمان أو هدوء .. كانت تتسع بسرعة أكبر كلما حاولت معرفة سببها .. شعرت بالهلع وباحتياجها إلى من يضمها حتي تتوقف هذه الفجوة عن الاتساع .. فوجدت انها بمفردها .. فاحتضنت نفسها ونامت .. ومازالت الفجوة لم تلتئم

حفل توقيع كتاب أبجدية إبداع عفوي .. في هذا الكتاب لي تدوينة

أبجدية إبداع عفوي .. كتاب جميل وفظيع وأمور ليا فيه تدوينة .. أيوه أيوه كل الحاجات دي عن الكتاب وأكتر .. كتاب بيضم مجموعة ناس جامدة جدا بيكتبوا حلو اوي خالص .. بس انا مش عارفه اتكلم عنه حلو دلوقتي لظروف نتاوية بحته .. بس هبقى آجي تاني ونحكي كتير .. بس احنا هنتجمع مع بعض في حفل توقيع الكتاب
هنا
بوابة الشروق وهي بتقول على حفل توقيعنا
هنا
وكمان جريدة الفجر وهي بتقول على حفل توقيعنا
هنا

هنستناااااااااااااكم

اعتذار واجب جدااااا

هما اعتذارين مش اعتذار واحد اعتذار واجب جدا جدا جدا لمدونتي حبيبتي .. انا اسفة جدا جدا جدا على غيابي الطووووووووووييييل عنك واللي مش عارفه لسه هخلصه امتى لانه مش بسببي المره دي ولكن بسبب الزفت النت الاعتذار التاني لكل حد شرفني بالمرور على مدونتي وسابلي كومنت وانا للأسف اتأخرت في الرد عليه لنفس السبب ان النت عندي فيه مشاكل ندعو الله انها تتحل قريبببببااااااااا
أنا آسفة جدااااااااااااا

ناس - الوطن - الميدان

أنا مانزلتش الميدان في المرحلتين بتوع الثورة غير مرة واحدة في ال 18 يوم الأولانيين - قهرا من أولي الأمر - وأكتر حاجة كنت حباها ومبسوطة اني عايشاها كانت ناس الميدان .. الناس في الميدان كانوا حلوين أوي كل حاجة فيهم كانت حلوة بزيادة .. ناس من كل الأعمار والفئات والطبقات بس كلهم مصريين بجد .. كلهم بيحبوا بعض .. ناس ماحدش فيهم عارف التاني بس كلهم عارفين بعض .. كلهم بيخافوا على بعض.. طول ما أنا ماشية في الميدان كنت حاسة اني في بيت العيلة .. أكبر حبتين وناسه أكتر شويتين بس هو بيت العيلة .. مكان ملكنا كلنا بجد .. مكان حاسين فيه بمعنى الوطن .. كان نفسي أعيش في الميدان .. كان نفسي روح الميدان تتعمم على كل البلد .. وكل الناس في كل مصر تبقى ناس الميدان .. اللي بيحبوا بعض وبيخافوا على بعض .. اللي متجمعين على شيء واحد .. اللي بيختلفوا بس باحترام بعض ..

في المرحلة التانية دخلنا في كركبة ودربكة انتخابات واحزاب وتيارات وسندويتشات وبياعين بعربيات .. بس لسه ببص من جنب على جنب كده وبشوف ناس من ناس الميدان الأصليين .. المختلفين بس متجمعين .. اللي لسه بيفدوا ويضحوا بكل غالي وعزيز عشان البلد كلها تبقى زي الميدان ..

في 18 يوم كانت ثورة وفي الميدان كانت المدينة الفاضلة .. وبعد ما فات داخلين على سنة يا ترى هنخلص انتخابات ومباحثات وتيارات وكلام عن انقسامات وترجع المدينة الفاضلة ويتعمم الميدان .. وتبقى الناس
في كل مصر ناس الميدان ؟

أتمنى ده يحصل أصلي بشوف الناس اللي في الميدان دول هما المصريين الأصليين .. ناس كده شبه البلد دي فيهم حاجة حلوة

إزاي تساعد ميدان التحرير ؟ .. منقول

دعم كل فرد مهم, حتى لو مش قادرين تبقوا معانا في الميدان في طرق كتيرة ممكن تساعدونا بها هناك. هاحاول أجمع هنا كل طرق المساعدة من داخل و خارج الميدان.

1- متطوعين:

• محتاجين متطوعين من الأطباء يبقوا متواجدين في المستشفيات الميدانية. في مستشفى في جامع عمر مكرم و مستشفى في كنيسة قصر الدوبارة خلف المجمع. الاتنين بعاد عن خطوط التشابك مع الأمن المركزي. محتاجين متطوعين كتير لأن الاصابات و القتلي في تزايد و الأطباء اللي هناك أرهقوا.
• محتاجين متطوعين محامين . أما بتواجدهم عند مشرحة زينهم للمتابعة مع أهالي الشهداء و التأكد من اتخاذ الاجراءات اللازمة لاثبات الاصابات التي أدت للوفاة, او بالتواجد في نيابة قصر النيل - محكمة عابدين للتواجد مع المتظاهرين المقبوض عليهم و الموجه لمعظمهم حتى الان تهم اصاباة و قتل زملاءهم المتظاهرين!! للتنسيق أتصلوا بجبهة الدفاع عن متظاهري مصر 01220624003 أو التوجه لمركز هشا مبارك للقانون 1ش سوق التوفيقية , الدوا الخامس. خلف دار القضاء العالي- وسط البلد
• متطوعين عند مشرحة زينهم , يتواجدوا مع أهالي الشهداء لدعمهم معنويا و للتصدي لأاي محاولات من العاملين بالمشرحة لفبركة التقريرات أو التعتيم على الاجراءات

2- التبرع بالدم:

التوجه لمستشفى القصر العيني القديم - مركز الدم

3-اعاشة و احتياجات للمستشفى الميداني و للشهداء:

• أكل نواشف ( بسكوت بالعجوة, بقسماط, .. ) , تمر, موز, لبن, عصائر, مياه, حلاوة, مربى, عيش, معلبات سهل الفتح
• ماسك و نظارات ماء للوقاية من الغاز المسيل للدموع ( بيتباعوا في محلات الأمن الصناعي ش الجمهورية محطة مترو أحمد عرابي, الماسك ب 13 جنيه )
• توابيت للمشرحة في زينهم . ممكن تشتروها من جورج عزيز نهاية شارع الترعة البولاقية شبرا
• كمامات , بخاخات تنفس فنتولين, هيدرو سيف (يخفف من أعراض الغاز المسيل للدموع) , محلول ملح. محلول جفاف, فولتارين امبولات, ابيكو جل , قطرة نافكون, مراهم حروق.
• بطاطين و كوفرتات

تابعوا احتياجات المستشفى و الميدان على تويتر على هاشتاج #TahrirNeeds‏
تابعوا نقاط تجمع الاعاشة في مناطق مختلفة من القاهرة

المعادي : 01007779965 والاسم أحمد عزب

الزمالك: 01223293958

باقي الأماكن مذكورة هنا

هنا
أرقام المستشفي الميداني 01149900115 & 01117678422

4- نشر حقيقة الأحداث:

بداية الأحداث: فض اعتصام لمصابي الثورة. الاعتصام كان بقاله أكثر من أسبوع. عدد المعتصمين يوم الجمعة بالليا لم يتعدى ال 200 شخص. الاعتصام بالأساس كان في الجنينة اللي قدام المجمع, و المرور في الميدان كان مفتوح و عادي. نزلت قوات من الأمن المركزي

بأعداد غفيرة, و فضت الاعتصام بالقوة و تعدت على المصابين.

أنا قابلت شاب من المعتصمين رجله مبتورة لأنه كان واخد فيها 12 رصاصة! تفتكروا دول مطلوب منهم يتصرفوا ازاي مع قوات أمن مركزي نازلة بتسحل و تضرب فيهم!

دي صورة حسن السوهاجي, أحد الظباط اللي كانوا بيشرفوا على الضرب بنفسهم. شوفته بنفسي بيمسك ولد و بيرميه في وسط مجموعة عساكر و هم طوحوا فيه ضرب بالهراوات و الرجلين.

كان بيشتم و هو بيضرب و يقول " سيبونا نشوف شغلنا"

بعدها نزل ميدان التحرير أعداد أكثر للتضامن. و من ساعتها و المعركة مستمرة لم تتوقف الا ساعتين بالظبط صباح اليوم 21 نوفمبر.

المتظاهرين أسلحتهم الأساسية للدفاع عن نفسهم : طوب و اعادة القاء القنابل المسيلة للدموع اللي بتضرب ناحيتنا تجاه الأمن
الأمن استخدم: خرطوش, غاز مسيل للدموع, رصاص مطاط و رصاص حي

المستشفى الميداني - خلف هارديز- اتهاجمت أكثر من مرة بقنابل غاز مسيل للدموع. و امبارح بالليل أقتحموها. و بعد أما تصدى لهم الأطباء و سألوهم اذا كانوا هيعتدوا على أطباء و مرضى, سابوا المستشفى لكن قبل ما يمشوا رموا جواها قنبلة غاز مسيل للدموع!
ملحوظة : المستشفى عالجت 3 جنود من الأمن و سابتهم


عناصر الداخلية كانت بتضرب في مستوى الرأس و الصدر:
صورة ل 3 من أجمل شباب مصر, فقدوا أعينهم
مالك مصطفى - مبرمج, ناشط حقوقي و مدون فقد عينه اليمنى
أحمد عبد الفتاح- صحفي بالمصري اليوم
أحمد حرارة - طيبي أسنان فقد عينه اليمين في 28 يناير, فقد عينه الأخرى 19 نوفمبر



الفيديو ده مصور من ناحية الداخلية في الثانية 38 :
ظابط يوجه عدة طلقات, ثم حوار بينه و بين أخر
-جت في عين الواد
- جت في عين أمه أبن ال ***
-جدع يا باشا

https://www.facebook.com/photo.php?v=1941764522684

دي صورة الملازم المسؤول عن التصويب في عين الشباب
مصدر الصورة

يقال ان تم التعرف على صاحب الصورة و ان هو : ملازم أول محمود صبحي الشناوي دفعة 2009 كلية شرطة و دفعى 2005 فرير. لكن لم يتم تأكيد المعلومة

صورة بتوضح جثث شهداءنا ملقاة في وسط القمامة في ميدان التحرير :
مصدر الصورة

و ده فيديو بيوضح جر أحد الجثث من قبل عناصر من الأمن بمصاحبة مدنيين و القاءه على الجنب مع القمامة




النهاردة بالليل: الليلة 11 م يستضيف يسري فودة على برنامجه "اخر كلام" على قناة أون تي في : مالك مصطفى و أحمد

حرارة (فقدوا عينهم للثورة) و أسرة شهيد الأسكندرية "بهاء السنوسي" ... شجع كل حد يتفرج عليهم و يسمع قصصهم

منقول من هنا

شوية سكوت لله

كأن تقول لأحدهم أن وجهك يؤلمك بشدة .. فيقرر علاجك بأن ينهال على وجهك لطما بكل ما أوتي من قوة .. فتجد نفسك لا تستطيع الكلام من المفاجأة وشدة الألم معا ..

...........

جميعهم يرون في عيونها وصمتها نظرة الاكتئاب .. وبالرغم من ذلك فالجميع يهاجمها وكأن هذا هو ما ينقصها .. الجميع يتحدثون إليها عن مصلحتها وعن ما يجب عليها أن تفعله والكل مستاء جدا من صمتها ورضائها بالاكتئاب .. وكأنها سعيدة بالفعل بكونها مكتئبة .. الكل يتكلم ويتكلم ويتكلم ويتشاجر إذا لزم الأمر – وأخذته الجلاله - .. وهي لا تفعل شيئا سوى الصمت والاستماع .. فقد فقدت الرغبة في الدفاع أو حتى الرد والنقاش ..

تظل تنظر إليهم وهي شاردة تسمع أصواتهم تأتيها من بعيد وهي صامتة وتتخيل نفسها تصرخ في وجوههم بأن يصمتوا وينهوا حديثهم إلى الأبد..

أيها الناس لقد مللت أحاديثكم الناصحة .. لقد مللت أحاديثكم ونظراتكم وشعوري بأني أصبحت عبء نفسي عليكم .. فأحاديثكم وحلولكم أيضا ما هي إلا أعباء تثقلوني بها ولقد اكتفيت أثقالا وأعباءا .. اصمتوا قليلا - أو كثيرا - فأنا وصمتي لسنا بحاجة إلى كلامكم .. اصمتوا وارحموني يرحمكم الله

طب إيه ؟

- هو انتي ليه بقيتي دايما مكشرة ومتضايقة كده ؟ .. وحتى لو مش مكشرة ادام الناس ف مكشرة معايا أنا ؟ ..
طب أنا عايزة ألعب وأجري ..
طب عايزة أركب مورجيحة ..
طب عايزة اتكلم واهزر واضحك ..
هو انتي مش بتردي عليا ليه ؟ ..
طب ليه بقيتي سايبة الدنيا مكركبة حواليا كده وخنقاني ؟ .. بقى فيه حاجات كتير أوي هنا وأنا مش عارفه أتحرك ..
بصي هنا بقى فيه إيه .. الكوم الكبير ده مكتوب عليه " اكتئاب " .. وهنا مكتوب " زعل ونكد " .. والناحية دي لقيت مكتوب " تكشير وخنقة " .. وهنا الصندوق الكبير ده مكتوب عليه " كلام " و مليان كتييييييييير اوي بس من كتره مش عارف يخرج بس عمال يخبط في كل جوانب الصندوق وبيخبط فيا وبيوجعني ..
وبصي هناك كده فيه " دموع " بس بقالي كتير أوي ماشوفتهاش مفتوحة .. مع إني ساعات كتير بشوفها هتنزل وأقول خلاص هتغرق المكان حواليا وتشيل كل الكراكيب دي وتنضف المكان بس مش بيحصل ..
هو انتي هتبقي كويسة تاني إمتى ؟ ..
طب أنا عايزاكي تبقي كويسة بقى عشان تسيبيني أرجع ألعب تاني وتخلينا نرجع نضحك بجد .. أنا عايزة أضحك أوي .. خرجيني تاني بقى .. أنا بقيت خايفة أوي هنا ..
هو انتي هتفضلي ساكتة كده ومش هتردي عليا أبدا ؟ .. انتي كنتي هتتكلمي أهوه قوليلي كنتي هتقولي إيه ...


- أنا كمان بقيت خايفة أوي عليكي لا تموتي وأبص في يوم جوايا مالاقيكيش ؟ ..


* يجب أن نصغى إلى الطفل الذي كناه ذات يوم ، والذي مازال موجودا فينا .. فذلك الطفل يعلم ما هي اللحظات السحرية .. دائما ما نستطيع أن نكتم بكاءه .. لكننا لا نستطيع أن نسكت صوته ..

* باولو كويلو ..
على نهر بييدرا هناك جلست فبكيت ..