عاشقة القمر ..

ناس - الوطن - الميدان

2011-12-05T17:06:00.006+02:00

أنا مانزلتش الميدان في المرحلتين بتوع الثورة غير مرة واحدة في ال 18 يوم الأولانيين - قهرا من أولي الأمر - وأكتر حاجة كنت حباها ومبسوطة اني عايشاها كانت ناس الميدان .. الناس في الميدان كانوا حلوين أوي كل حاجة فيهم كانت حلوة بزيادة .. ناس من كل الأعمار والفئات والطبقات بس كلهم مصريين بجد .. كلهم بيحبوا بعض .. ناس ماحدش فيهم عارف التاني بس كلهم عارفين بعض .. كلهم بيخافوا على بعض.. طول ما أنا ماشية في الميدان كنت حاسة اني في بيت العيلة .. أكبر حبتين وناسه أكتر شويتين بس هو بيت العيلة .. مكان ملكنا كلنا بجد .. مكان حاسين فيه بمعنى الوطن .. كان نفسي أعيش في الميدان .. كان نفسي روح الميدان تتعمم على كل البلد .. وكل الناس في كل مصر تبقى ناس الميدان .. اللي بيحبوا بعض وبيخافوا على بعض .. اللي متجمعين على شيء واحد .. اللي بيختلفوا بس باحترام بعض ..

في المرحلة التانية دخلنا في كركبة ودربكة انتخابات واحزاب وتيارات وسندويتشات وبياعين بعربيات .. بس لسه ببص من جنب على جنب كده وبشوف ناس من ناس الميدان الأصليين .. المختلفين بس متجمعين .. اللي لسه بيفدوا ويضحوا بكل غالي وعزيز عشان البلد كلها تبقى زي الميدان ..

في 18 يوم كانت ثورة وفي الميدان كانت المدينة الفاضلة .. وبعد ما فات داخلين على سنة يا ترى هنخلص انتخابات ومباحثات وتيارات وكلام عن انقسامات وترجع المدينة الفاضلة ويتعمم الميدان .. وتبقى الناس
في كل مصر ناس الميدان ؟

أتمنى ده يحصل أصلي بشوف الناس اللي في الميدان دول هما المصريين الأصليين .. ناس كده شبه البلد دي فيهم حاجة حلوة

إزاي تساعد ميدان التحرير ؟ .. منقول

2011-11-21T23:04:00.006+02:00

دعم كل فرد مهم, حتى لو مش قادرين تبقوا معانا في الميدان في طرق كتيرة ممكن تساعدونا بها هناك. هاحاول أجمع هنا كل طرق المساعدة من داخل و خارج الميدان.

1- متطوعين:

محتاجين متطوعين من الأطباء يبقوا متواجدين في المستشفيات الميدانية. في مستشفى في جامع عمر مكرم و مستشفى في كنيسة قصر الدوبارة خلف المجمع. الاتنين بعاد عن خطوط التشابك مع الأمن المركزي. محتاجين متطوعين كتير لأن الاصابات و القتلي في تزايد و الأطباء اللي هناك أرهقوا.
محتاجين متطوعين محامين . أما بتواجدهم عند مشرحة زينهم للمتابعة مع أهالي الشهداء و التأكد من اتخاذ الاجراءات اللازمة لاثبات الاصابات التي أدت للوفاة, او بالتواجد في نيابة قصر النيل - محكمة عابدين للتواجد مع المتظاهرين المقبوض عليهم و الموجه لمعظمهم حتى الان تهم اصاباة و قتل زملاءهم المتظاهرين!! للتنسيق أتصلوا بجبهة الدفاع عن متظاهري مصر 01220624003 أو التوجه لمركز هشا مبارك للقانون 1ش سوق التوفيقية , الدوا الخامس. خلف دار القضاء العالي- وسط البلد
متطوعين عند مشرحة زينهم , يتواجدوا مع أهالي الشهداء لدعمهم معنويا و للتصدي لأاي محاولات من العاملين بالمشرحة لفبركة التقريرات أو التعتيم على الاجراءات

2- التبرع بالدم:

التوجه لمستشفى القصر العيني القديم - مركز الدم

3-اعاشة و احتياجات للمستشفى الميداني و للشهداء:

أكل نواشف ( بسكوت بالعجوة, بقسماط, .. ) , تمر, موز, لبن, عصائر, مياه, حلاوة, مربى, عيش, معلبات سهل الفتح
ماسك و نظارات ماء للوقاية من الغاز المسيل للدموع ( بيتباعوا في محلات الأمن الصناعي ش الجمهورية محطة مترو أحمد عرابي, الماسك ب 13 جنيه )
توابيت للمشرحة في زينهم . ممكن تشتروها من جورج عزيز نهاية شارع الترعة البولاقية شبرا
كمامات , بخاخات تنفس فنتولين, هيدرو سيف (يخفف من أعراض الغاز المسيل للدموع) , محلول ملح. محلول جفاف, فولتارين امبولات, ابيكو جل , قطرة نافكون, مراهم حروق.
بطاطين و كوفرتات

تابعوا احتياجات المستشفى و الميدان على تويتر على هاشتاج #TahrirNeeds‏
تابعوا نقاط تجمع الاعاشة في مناطق مختلفة من القاهرة

المعادي : 01007779965 والاسم أحمد عزب

الزمالك: 01223293958

باقي الأماكن مذكورة هنا

هنا
أرقام المستشفي الميداني 01149900115 & 01117678422

4- نشر حقيقة الأحداث:

بداية الأحداث: فض اعتصام لمصابي الثورة. الاعتصام كان بقاله أكثر من أسبوع. عدد المعتصمين يوم الجمعة بالليا لم يتعدى ال 200 شخص. الاعتصام بالأساس كان في الجنينة اللي قدام المجمع, و المرور في الميدان كان مفتوح و عادي. نزلت قوات من الأمن المركزي

بأعداد غفيرة, و فضت الاعتصام بالقوة و تعدت على المصابين.

أنا قابلت شاب من المعتصمين رجله مبتورة لأنه كان واخد فيها 12 رصاصة! تفتكروا دول مطلوب منهم يتصرفوا ازاي مع قوات أمن مركزي نازلة بتسحل و تضرب فيهم!

دي صورة حسن السوهاجي, أحد الظباط اللي كانوا بيشرفوا على الضرب بنفسهم. شوفته بنفسي بيمسك ولد و بيرميه في وسط مجموعة عساكر و هم طوحوا فيه ضرب بالهراوات و الرجلين.

كان بيشتم و هو بيضرب و يقول " سيبونا نشوف شغلنا"

بعدها نزل ميدان التحرير أعداد أكثر للتضامن. و من ساعتها و المعركة مستمرة لم تتوقف الا ساعتين بالظبط صباح اليوم 21 نوفمبر.

المتظاهرين أسلحتهم الأساسية للدفاع عن نفسهم : طوب و اعادة القاء القنابل المسيلة للدموع اللي بتضرب ناحيتنا تجاه الأمن
الأمن استخدم: خرطوش, غاز مسيل للدموع, رصاص مطاط و رصاص حي

المستشفى الميداني - خلف هارديز- اتهاجمت أكثر من مرة بقنابل غاز مسيل للدموع. و امبارح بالليل أقتحموها. و بعد أما تصدى لهم الأطباء و سألوهم اذا كانوا هيعتدوا على أطباء و مرضى, سابوا المستشفى لكن قبل ما يمشوا رموا جواها قنبلة غاز مسيل للدموع!
ملحوظة : المستشفى عالجت 3 جنود من الأمن و سابتهم

عناصر الداخلية كانت بتضرب في مستوى الرأس و الصدر:
صورة ل 3 من أجمل شباب مصر, فقدوا أعينهم
مالك مصطفى - مبرمج, ناشط حقوقي و مدون فقد عينه اليمنى
أحمد عبد الفتاح- صحفي بالمصري اليوم
أحمد حرارة - طيبي أسنان فقد عينه اليمين في 28 يناير, فقد عينه الأخرى 19 نوفمبر

الفيديو ده مصور من ناحية الداخلية في الثانية 38 :
ظابط يوجه عدة طلقات, ثم حوار بينه و بين أخر
-جت في عين الواد
- جت في عين أمه أبن ال ***
-جدع يا باشا

https://www.facebook.com/photo.php?v=1941764522684

دي صورة الملازم المسؤول عن التصويب في عين الشباب
مصدر الصورة

يقال ان تم التعرف على صاحب الصورة و ان هو : ملازم أول محمود صبحي الشناوي دفعة 2009 كلية شرطة و دفعى 2005 فرير. لكن لم يتم تأكيد المعلومة

صورة بتوضح جثث شهداءنا ملقاة في وسط القمامة في ميدان التحرير :
مصدر الصورة

و ده فيديو بيوضح جر أحد الجثث من قبل عناصر من الأمن بمصاحبة مدنيين و القاءه على الجنب مع القمامة

النهاردة بالليل: الليلة 11 م يستضيف يسري فودة على برنامجه "اخر كلام" على قناة أون تي في : مالك مصطفى و أحمد

حرارة (فقدوا عينهم للثورة) و أسرة شهيد الأسكندرية "بهاء السنوسي" ... شجع كل حد يتفرج عليهم و يسمع قصصهم

منقول من هنا

شوية سكوت لله

2011-10-18T17:05:00.003+02:00

كأن تقول لأحدهم أن وجهك يؤلمك بشدة .. فيقرر علاجك بأن ينهال على وجهك لطما بكل ما أوتي من قوة .. فتجد نفسك لا تستطيع الكلام من المفاجأة وشدة الألم معا ..

...........

جميعهم يرون في عيونها وصمتها نظرة الاكتئاب .. وبالرغم من ذلك فالجميع يهاجمها وكأن هذا هو ما ينقصها .. الجميع يتحدثون إليها عن مصلحتها وعن ما يجب عليها أن تفعله والكل مستاء جدا من صمتها ورضائها بالاكتئاب .. وكأنها سعيدة بالفعل بكونها مكتئبة .. الكل يتكلم ويتكلم ويتكلم ويتشاجر إذا لزم الأمر – وأخذته الجلاله - .. وهي لا تفعل شيئا سوى الصمت والاستماع .. فقد فقدت الرغبة في الدفاع أو حتى الرد والنقاش ..

تظل تنظر إليهم وهي شاردة تسمع أصواتهم تأتيها من بعيد وهي صامتة وتتخيل نفسها تصرخ في وجوههم بأن يصمتوا وينهوا حديثهم إلى الأبد..

أيها الناس لقد مللت أحاديثكم الناصحة .. لقد مللت أحاديثكم ونظراتكم وشعوري بأني أصبحت عبء نفسي عليكم .. فأحاديثكم وحلولكم أيضا ما هي إلا أعباء تثقلوني بها ولقد اكتفيت أثقالا وأعباءا .. اصمتوا قليلا - أو كثيرا - فأنا وصمتي لسنا بحاجة إلى كلامكم .. اصمتوا وارحموني يرحمكم الله

طب إيه ؟

2011-10-16T23:18:00.001+02:00

- هو انتي ليه بقيتي دايما مكشرة ومتضايقة كده ؟ .. وحتى لو مش مكشرة ادام الناس ف مكشرة معايا أنا ؟ ..
طب أنا عايزة ألعب وأجري ..
طب عايزة أركب مورجيحة ..
طب عايزة اتكلم واهزر واضحك ..
هو انتي مش بتردي عليا ليه ؟ ..
طب ليه بقيتي سايبة الدنيا مكركبة حواليا كده وخنقاني ؟ .. بقى فيه حاجات كتير أوي هنا وأنا مش عارفه أتحرك ..
بصي هنا بقى فيه إيه .. الكوم الكبير ده مكتوب عليه " اكتئاب " .. وهنا مكتوب " زعل ونكد " .. والناحية دي لقيت مكتوب " تكشير وخنقة " .. وهنا الصندوق الكبير ده مكتوب عليه " كلام " و مليان كتييييييييير اوي بس من كتره مش عارف يخرج بس عمال يخبط في كل جوانب الصندوق وبيخبط فيا وبيوجعني ..
وبصي هناك كده فيه " دموع " بس بقالي كتير أوي ماشوفتهاش مفتوحة .. مع إني ساعات كتير بشوفها هتنزل وأقول خلاص هتغرق المكان حواليا وتشيل كل الكراكيب دي وتنضف المكان بس مش بيحصل ..
هو انتي هتبقي كويسة تاني إمتى ؟ ..
طب أنا عايزاكي تبقي كويسة بقى عشان تسيبيني أرجع ألعب تاني وتخلينا نرجع نضحك بجد .. أنا عايزة أضحك أوي .. خرجيني تاني بقى .. أنا بقيت خايفة أوي هنا ..
هو انتي هتفضلي ساكتة كده ومش هتردي عليا أبدا ؟ .. انتي كنتي هتتكلمي أهوه قوليلي كنتي هتقولي إيه ...

- أنا كمان بقيت خايفة أوي عليكي لا تموتي وأبص في يوم جوايا مالاقيكيش ؟ ..

* يجب أن نصغى إلى الطفل الذي كناه ذات يوم ، والذي مازال موجودا فينا .. فذلك الطفل يعلم ما هي اللحظات السحرية .. دائما ما نستطيع أن نكتم بكاءه .. لكننا لا نستطيع أن نسكت صوته ..

* باولو كويلو ..
على نهر بييدرا هناك جلست فبكيت ..

أبجدية إبداع عفوي

2011-09-15T19:48:00.003+02:00

ولأول مرة في الحياة .. وبعد مجهود رائع وجبار من القائمين على المشروع
بقالي تدوينة منشورة في كتاب - إلكتروني حاليا وهيكون ورقي - قريبا بإذن الله
أبجدية إبداع عفوي
التدوينة هي الذكرى السنوية الأولى لخالد سعيد
موجودة في الكتاب في صفحة 84
و تحميل الكتاب بكل صوره من هنا

تصبحي على خير يا حبيبتي

2011-06-24T18:37:00.005+02:00

ذهبت إلى السرير لتبدأ محاولاتها المستميتة في استجداء النوم .. ولكنها شعرت بأنها تريد أن تستدعيه قبل أن تنام لعلها تحلم به .. فأخذت هاتفها لتتفحص أي من رسائله السابقة .. ولكنها ما أن أمسكت بالهاتف حتى جاءتها رسالة جديدة منه ..

قرأت الرسالة وابتسمت وهي تشعر وكأنها طفلته التي سمع صوتها تناديه فجاء ليضعها في سريرها ويغطيها ويطبع على جبينها قبلة حانية قائلا ..

" تصبحي على خير يا حبيبتي "

فأغمضت عينيها في أمان وناااااااااااااامت

يوم الخسوف

2011-06-20T23:17:00.008+02:00

في يوم الخسوف قررنا الخروج لمكان مفتوح لنتابع الأمر بشكل أفضل .. ومنذ أن خرجت من البيت إلى أن وصلت إلى المكان المقصود وأنا أفكر أن اليوم سيخرجون الناس جميعا مثلنا لمتابعة الأمر.. وسيظلوا يحدقون في القمر ويراقبونه عن كثب
وأتخيل أن هذا الأمر سيجعله يتضايق ويكون غير مرتاح من تحديق الناس به ومراقبتهم له دون أن يستطيع الهرب أو الاختباء من أعينهم ..
ولكن عندما وصلت وبدأ الخسوف إلى أن انتهى لم أرى شخصا واحدا ينظر للقمر إلا ليرى لماذا ننظر أنا وعائلتي لأعلى من حين لآخر .. فلم يكن هناك من يدري بما يحدث للقمر اليوم ..

الجميع يسيرون في كل مكان وكأن لا شيء يحدث فوق رؤوسهم .. شعرت بأني اريد أن أذهب لكل من حولي وأجبرهم على رفع رؤوسهم للسماء ومشاهدة ما يحدث

في بداية اليوم أشفقت على القمر لمجرد تخيلي جميع الناس يحدقون به .. ولكن مع نهاية اليوم شعرت بالإشفاق عليه والحزن لأجله لأن أحدا لم يهتم بأمره ولا بما يحدث له..

.

الذكرى السنوية الأولى لخالد سعيد

2011-06-10T23:56:00.017+02:00

من كام يوم نزلت لأول مرة وقفة من الوقفات الصامتة اللي اتعملت عشان خالد .. كتير كنت بفتكره وادعيله واترحم عليه واقراله قرآن .. بس المرة دي كانت أول مرة أحس إني بعمل حاجة عشانه وأنا واقفة أقراله قرآن بس مع شباب وبنات وأمهات وآباء وأطفال كتييير لسه فاكرين خالد ومش هيسمحوا إن حقه يضيع

كنت رايحة وأنا مع كل خطوة بقرب بيها من المكان خايفة أوي تكون الناس نسيته أو خلاص مابقاش الموضوع مهم وأروح مالاقيش غير مجموعة شباب يتعدوا على الصوابع .. بس أول ما وصلت حسيت بابتسامة كبيرة أوي على وشي وجوايا مابحسهاش كتير .. كنت فرحانة أوي بالمنظر .. شوفته كتير في الصور بس إني اعيشه كانت حاجة مختلفة

كنت فرحانة أوي وأنا شايفة كل الناس دي مهتمة إنها تنزل في يوم زي ده عشان تقول لخالد ولكل شهيد ماتخافش لا نسيناك ولا هننسا .. ولا حقك عمره هيضيع طول ما احنا لسه ما اتقابلناش معاك

كنت بجري بين العربيات وأعدي الشارع من هنا لهناك عشان أصور المنظر ده اللي عمري ماهنساه أبدا .. وكنت مبسوطة أوي أما حد يفتح شباك عربيته ويسألنا انتوا واقفين النهاردة ليه فأرد عليه وأقوله النهاردة سنوية خالد سعيد .. أكيد ماكنتش مبسوطة انهم مش عارفين بس أكيد كنت مبسوطة وأنا بقولها عشان أنا هنا عشان خالد سعيد

كان عاجبني أوي اننا قادرين نشد انتباه الناس ونجبرهم إنهم يسألوا ويعرفوا ويشوفوا إن كل دول واقفين عشان يرجع حق ناس مابقوش قادرين يطالبوا بحقوقهم

شوفت في عينين الناس ورا إزاز عربياتهم حاجات كتير أوي وحاجات مختلفة طبعا من شخص للتاني

عدى علينا الأمهات والآباء اللي سألوا واقفين ليه وأما قولنالهم اترحموا عليه ودعوله ودعولنا معاه

وعدى علينا عمو سواق التاكسي اللي حسبن علينا بعلو صوته زي ما نكون احنا ولاد العادلي والعياذ بالله ولا واقفين حاله بإننا واقفين بعرض الكوبري مثلا

وعدى علينا الشاب - الحيلة - اللي مش عاجباه وقفتنا وبيقول لمامته بقرف احنا واقفين كده ليه .. واللي كان نفسي جدا اقوله مانت قاعد جنب أمك ماحصلكش اللي حصلهم

عدى علينا الشاب سواق التاكسي اللي مشغل يا حبيبتي يا مصر بصوت عااااااااالي وحاسس بفخر

وعجبني أوي حوار قصير جدا بس جميل جداااا واحساسه حلو اوي دار بين بنتين واقفين جنبي

الأولى قالت لصاحبتها الجو حلو أوي
أنا بحس إن الجو بيبقى مختلف في الوقفات اللي زي دي
فردت عليها صاحبتها بكل بساطة ومن غير لحظة تفكير دا جو و احساس الحرية

وخلص اليوم ورجعت بيتنا مرهقة جدا وحاسة بالتعب كتير جدا بس الأهم إني رجعت حبانا جدا .. انا بجد بحبنا أوي واحنا متجمعين مع بعض على حاجة حلوة أو حاجة صح

الوقفة الصامتة على كوبري قصر النيل في الذكرى السنوية الأولى لخالد سعيد

2011-06-10T22:05:00.035+02:00

زي بُكرة من سنة خالد اتقتل

2011-06-05T21:46:00.008+02:00

بداية ف دول تَذكِرة بقضية خالد سعيد

لإمتى يا بلد ؟ .. شهيد الطوارئ

قومي افتحي لولادك الطيبين قووووومي

زي بُكرة من سنة اتقتل خالد سعيد

خالد سعيد اللي انا شخصيا بشوف انه سبب رئيسي من أسباب قيام ثورة 25 يناير .. فيه ناس كتير ممكن تقول لا مش خالد السبب في قيام ثورة 25 يناير والاسباب كانت حاجات تانية كتير وحاجات اكبر من موت خالد كمان .. وانا مش هعترض ماشي اوك انا مع كل حد بيقول كده وان الناس كانت خلاص لازم تنفجر لانها اتملت على الآخر من كل حاجة بتحصل حواليهم .. بس بالنسبة لي برضو خالد السبب يمكن من وجهة نظري بشكل مختلف .. الشكل ده هو إن انا لأول مرة أشوف أمهات وأباء نازلين مع أولادهم الشباب اللي من سننا في مظاهرات كان بسبب قتل خالد .. أول مرة أشوف العدد الرهيب ده من الشباب في جميع المحافظات واقفين في وقفات صامتة متحضرة جدا على كل كورنيش في البلد ومتجمعين على حاجة غير الكورة كان بسبب قتل خالد

أنا شايفة إن خالد ليه فضل كبيييييير أوي في الموضوع ده .. و ف إن الأعداد الرهيبة دي من الناس باختلاف كلللللل حاجة .. دين ونوع وسن و طبقة اجتماعية وثقافة وكل حاجة اتجمعت وقررت إنها تطالب بحق الشاب ده ومن بعدها المطالبة بحقوقهم هما شخصيا .. بالنسبة لي خالد هو اللي نزل الناس الشارع .. هو اللي بطل ناس كتير من أباء وأمهات يقولوا لولادهم امشوا جنب الحيط لانهم شافوا ان حتى اللي ماشي جنب الحيط بقوا بيلبسوه في الحيط ويموتوه .. فبدل

ما يقعدوهم جنبهم بقوا ينزلوا معاهم

من يوم ما شوفت صوره قبل وبعد اللي حصله وقريت وتابعت قضيته وعيطت عليه بحرقه وأنا بحس إني أعرفه من

زمااااااان .. أيا كانت صفة معرفتي بيه دي إيه .. كنت دايما بستغرب حبي ليه ودفاعي عنه كأنه جاري اللي متربيين مع بعض أو زميلي اللي بشوفه كل يوم أو صديقي اللي اعرف عنه كل حاجة .. رغم إن كل معرفتي بيه هي صوره وقضيته وكلام الناس عنه زيي زي أي حد

زي بُكرة من سنة اتقتل خالد ولسه حقه مارجعش .. عشان كده لازم ننزل بكره كلنا عشان حق خالد لازم يرجع .. وعشان خالد يعرف إننا لسه فاكرينه ومش هنسيب حقه

وهنا هتلاقوا أماكن الوقفات الصامتة بتاعة بكرة إن شاء الله

الاتنين 6-6الذكرى السنويه الأولى لأستشهاد خالد سعيد

صعبان عليا .. ولا انت مش فاكر

2011-05-30T01:20:00.003+02:00

كثيرا ما كان يضربها ويمنعها عن الاكل ويعكر صفو يومها .. ويظل يفعل كل ما يضايقها

ولكنه الان وبعد أن رحلت يجلس صامتا ومنزويا .. لا يَقدِم على الطعام بلهفه كما كان يفعل .. ولا يجوب المكان ذهابا وإيابا .. لا يصدر عنه اي فعل ولا صخب كما هي عادته

تُرى فيما يفكر ؟

فيها وفي وجوده وحيدا ، وكيف كانت تملأ عليه الحياة رغم هدوءها وصمتها المعتاد ؟

تُرى هل يؤنب نفسه على ما كان يفعله بها ؟

هل يكون حزين الآن على فراقها ويشتاق وجودها معه ؟ أم يكون كما يقولون عن الاسماك أنها لا تملك ذاكرة وهو الآن لا يذكر وجودها من الاساس .. وكل ما هو به ليس إلا شعور بالملل والوحدة لوجوده في الحوض بمفرده .. و أنا فقط من أحمل همه ومعاناته التي لا يعرف عنها شيئا ولا يتذكرها؟

بكرة أحلى .. الحلقة الأولى.. صف واحد

2011-05-15T19:09:00.002+02:00

بكرة أحلى .. حلقة المقدمة

2011-05-07T23:26:00.001+02:00

بكرة أحلى

2011-05-07T23:21:00.002+02:00

بدأ برنامج "بكرة أحلى" على القناة الثانية على التليفزيون المصري وعلى الفضائية المصرية كل يوم خميس وجمعة على الهواء مباشرة ولمدة ساعتين، من الساعة 10 وحتى 12 مساءً بتوقيت القاهرة، وستكون الحلقة الأولى عبارة عن مقدمة صغيرة، وذلك يوم غد الخميس 5-5-2011 ثم يستمر بعد ذلك بإنتظام ابتداءاً من الخميس 12-5-2011.

يعد هذا البرنامج هو الأول من نوعه الذي يظهر فيه د.عمرو خالد كمحاور يطرح فيه قضايا سياسية واقتصادية واجتماعية.

البرنامج من إنتاج د.محمد يحيي، صاحب فكرة البرنامج والمشرف العام علي إنتاجه، ومنتج فني هشام سليمان وإخراج مؤمن كريم، ويتولي رئاسة تحرير البرنامج الكاتب الصحفي نبيل عمر، مدير تحرير جريدة الأهرام، في أول تعاون بينه وبين عمرو خالد تليفزيونياً.

www.amrkhaled.net

تراب الماس .. رواية رائعة لأحمد مراد

2011-05-02T18:43:00.002+02:00

قبل أن تذبحني الكآبة بسكين مُتبلد .. قبل أن تجثم فوقي الذكريات .. تلك المسامير الصلبة المغروسة في صدري .. أتململ في جلستي سجين كرسي أبكم لا يعلم بأي الكلمات يواسي شبحا تنهشه الخواطر .. كم أختنق .. ببطء .. أمسك القلم .. محاولا أن أكتب .. أضغط على رأسه .. أستنفر بقايا الحبر فيه .. أستنطقه .. أستحلفه أن يفرج عما في خلاياي .. أن يروض أعتى شروري .. يكبح كراهية تستعر في أعماقي .. يسكت بركانا يغلي .. يجد ترياقا للسم المنقوع في رئتي .. أو حتى ينغرز في صدري
............

كانت نوع ثالث .. نوع يسلبك كل فرصة في الرحيل عنه .. تلك التي لا تعلم كم ستبقى معها .. ولن تبحث عن إجابة .. فقط ترغب في أن تراها كل يوم .. كل ساعة .. تصغي لها ولا تسمع .. تسبح في ملامحها .. تتأمل أصغر تفاصيلها .. والعيوب التي أصبحت تحبها .. فقط لأنها فيها
....................

الناس ماينفعش معاها غير أسلوب واحد .. الخوف .. من أيام ” موسى ” عليه السلام وهي بتتحكم بيه .. خدوا على كده خلاص .. كُل نبي كان بينزل للناس .. إلا موسى .. هو الوحيد اللي نزل ل” فرعون ” .. لييييييه؟ عشان ماينفعش تكلم الناس .. في مصر تكلم الكبير يظبط الصغير

صوت الحرية

2011-03-19T22:30:00.004+02:00

في كل شارع في بلادي صوت الحرية بينادي

لأول مرة في حياتي انزل من بيتنا عشان أشارك في استفتاء .. عمري ما شاركت لا في استفتاء ولا انتخابات ولا كان ليا أي اختيار في الحياة السياسية ابدااااااا ولا في حياة بلدنا خالص .. بحبها وبموت فيها آه بس رأيي بقوله في بيتنا .. النهاردة بس ولأول مرة نزلت وانا حاسه ان ليا صوت ليه قيمة ولازم أشارك بيه .. وتقريبا زيي بالظبط كان كل الناس

بما اني ساكنة ادام مدرسة دايما بيكون فيها لجنة انتخابية ودايما بكون شايفة المشهد وعارفاه من قبل ما يبدأ وعمره ما اتغير أقدر النهاردة أقول ان كل حاجة فعلا بدأت تتغير .. طول اليوم فيه ناس بتتوافد على اللجنة من كل الاعمار والاشكال .. ناس كتير واخدين بعض ورايحين يشاركوا .. أسر وعائلات وجيران .. شباب و وبنات و رجالة وسيدات كبار في السن متسندين على ولادهم وداخلين يشاركوا .. ناس حست بالمسئولية وحست ان ليها حق في البلد دي تقدر دلوقتي تطالب بيه وتشارك في رجوعه

انا بجد مبسوطة اووووووووي اوي .. و زي ما أول يومين في الثورة كنت بقول ان أيا كانت الثورة هتنتهي على إيه فمن مكاسبها إننا قدرنا نتجمع على حاجة واحدة متحضرة بالمنظر ده .. فالنهاردة كمان أنا شايفه ان أيا كانت نتيجة الاستفتاء فاللي حصل النهاردة من مشاركة غير مسبوقة من الناس برضو مكسب كبير ..

بقولكم إيه في يوم زي ده ماتنسوش تقروا الفاتحة لكل شهدائنا

أوصفهالك

2011-03-09T17:13:00.004+02:00

غدارة وقلبها اسود وفي كثير من الأحيان أنانية

هذا ما قيل عنها ضمن خليط من الصفات الجيدة والسيئة .. ولكن هذه الكلمات ما نزلت على مسامعي كالصاعقة .. فانتابتني الصدمة وأنا أسمعها .. فهذه الكلمات لا يمكن لها أن تنطبق على فتاة مثلها .. كيف لنا أن نكون نتحدث عن نفس الفتاة

اسمح لي فأنت لا تراها جيدا .. فمثل هذه الصفات لا تقترن بفتاة عندما تدخل إلى حياة أي شخص تكون هي أجمل ما حدث بهذه الحياة أيا كانت صفتها .. تجدها إلى جوارك عندما تحزن وتغلق الدنيا أبوابها أمامك دون أن تطلب وجودها .. وعندما تبتسم وتضحك من أعماق قلبك تنظر بجوارك لتجدها أيضا وفي الأغلب تكون هي سبب هذه الابتسامة والسعادة .. تفعل أي شيء وكل شيء وتجتهد بكل ما تملك لإسعاد من تحبهم .. ومساعدتهم في إيجاد طرقهم إلى السعادة والنجاح ولا تنتظر منهم شيئا .. والكثير والكثير من الصفات والأشياء الجميلة التي تنبع من داخلها لتنير كل ما حولها ولكن الكلمات لا تساعدني في ترجمة ما أشعر به منها وتجاهها .. فبمجرد النظر إلى ابتسامة عيونها الصافية تشعر بمعنى وقيمة وجودها في حياتك

صديقي .. أنا موقنة أنك لا تقصد ما قلت بالمعنى الحرفي ولكن خانك التعبير وخانتك الكلمات التي خرجت من فمك كطلقات الرصاص دون أن تشعر .. فأرجو أن تعي كلامك وتأتي بتوضيح واعتذار يليق بفتاة مثلها

....................

بتقولي اوصفهالك اوصفلك رقيقة بريئة زي الموج بتتحرك .. الضحكة الحلوة نور الصبح بيضحكلك .. وصوتها غناها عصفور بيحكي ويشاغلك ..

لما تكون تعبان من الدنيا وتبقى الراحه عنيها .. لما تكون عطشان استنى هتشرب من لياليها .. لما تحس انك متطمن وانت في حضن ايديها .. وتقولي اوصفهاااااااااالك

..........

طبعا طبعا مع الاعتذار الفظيع انها اغنية لتشيمووووو بس هعمل ايه كان بيقول كلام يتسمع وهي بتحبها

محتاجين تبرع بالدم

2011-02-02T22:05:00.002+02:00

الناس الطيبين المؤيدين او المعارضين

تذكر قول الله تعالى ومن أحيا نفسا فكأنما أحيا الناس جميعا

أخوتنا محتاجينا أوي في المستشفيات ومحتاجين كل نقطة دم نقدر نتبرع بيها

في فروع رسالة في مصر الجديدة والمهندسين والمعادي

من الساعة 10 صباحاً إلى الساعة 3 عصراً يوم 3-فبراير 2011

عناوين الجمعية بهذه الأماكن

المهندسين : 24 ش المدينة المنورة - متفرع من محي الدين أبو العز

المعادي : تقسيم اللاسلكي أمام مؤمن

مصر الجديدة : 9 ش أحمد عبدالخالق - ميدان الحجاز أمام مدرسة أبو زهرة الإسلامي

لأي أستفسار بالتبرع في جمعية رسالة: 0147872160

في مستشفى القصر العيني الفرنساوي وكمان في معهد ناصر

مستشفى القصر العيني الفرنساوي

التبرع في أي وقت والعنوان: شارع القصر العيني - كورنيش النيل

ولمزيد من الاستفسار:23654060

مستشفى معهد ناصر

عنوان : شبرا 135 ش كورنيش النيل اغاخان شبرا.

للمزيد من الأستفسار تليفون:2039164-2036261-203 .

مستشفى الدمرداش

العنوان: بجوار محطه مترو الدمرداش

ياريت نحاول نساعد بالتبرع بالدم وبسررررررعة ونقول لأصحابنا وأهالينا ومعارفنا يتبرعوا

ولو مش هنقدر ننزل نتبرع ياريت نساعد على نشر الكلام ده وارقام تليفونات المستشفيات لاكبر عدد من الناس

التبرع بالدم في المحافظات

بنك الدم بالأسكندرية

العنوان: كوم الدكة

المستشفى الميري بالأسكندرية

العنوان: محطة الرمل

بنك الدم الأقليمي بطنطا

العنوان: ش حافظ وهبى

لمزيد من المعلومات من بنك الدم: 040\ 3509575

ملحوظة: تقوم جمعية رسالة بطنطا بتنظيم حملات للتبرع لمزيد من الاستفسار: 040\3345676

للتبرع بالدم في المنـوفيــة: مستشفى القصر العيني بشبين الكوم ومستشفى الجامعة وأيضا توجد عربات أسعاف بجوار عمر أفندي

منقوووووووووووووول

إيه بقى ؟

2011-02-02T20:58:00.003+02:00

طب وبعدين ؟! .. مش كفاية بقى ولا إيه ؟

لإمتى هنفضل مرعوبين في بيوتنا وبنموت في كل لحظة لو سمعنا حركة في الشارع ؟

لإمتى هنفضل نعد ف مصابين وقتلى ؟

مين هيموت تاني ؟! .. وهيموت إزاي .. في الشارع ولا في بيته ؟ .. بإيد الأمن ولا بطوبة من أخوه ؟! .. من بتوع السجون اللي دخلوا البيوت ولا من الرعب والخوف ؟!

هتخلص إمتى بقى وأخرتها إيه ؟! .. بدأنا ننسحب في طريق عمرنا ما كنا نقصده .. خلينا نفكر في بعض شوية وف أماننا ونبدأ نهدا عشان نعرف نتلم تاني ونبقى إيد واحدة زي ما كنا

والله ولسه فيكي رجاله يا بلدي

2011-01-26T20:06:00.000+02:00

الإعلان الرسمي لحملة "إنترنت بلا فتنة".. الكامل

2011-01-12T15:26:00.001+02:00

عمرو خالد في العاشرة مساءً.. إنترنت بلا فتنة

2011-01-12T15:26:00.000+02:00

د.عمرو خالد يعلن بدء حملة إنترنت بلا فتنة

2011-01-07T15:21:00.000+02:00

رمضان جانا

2010-08-12T16:56:00.003+02:00

كل سنة وكل الناس طيبين وكويسين وصايمين ومصليين وعاملين كل الحاجات الحلوة اللي تدخلهم الجنة

السنة دي ان شاء الله كل حاجة تخص رمضان وبرنامج الدكتور عمرو خالد رحلة للسعادة هتلاقوها كلها كلها على مدونتي الرمضانية .. رمضانيات

ورمضان كريم علينا وعليكم كلكم

2010-08-08T00:49:00.008+03:00

شخص تسلل إلى داخلها وفتح باب قلبها ولم تحاول أن تعترضه او تمنعه بالرغم من أنها اعترضت الفكرة نفسها لفترات طويلة

دخل إلى قلبها بهدوء المتجول في مكان يعرفه جيدا وأخذ يدها برفق فلم تستطع أن تسحبها من يده ولم تُرد ، وراح يتجول بها داخل حدائق قلبها ويعرفها عليه من جديد ، فهو يسعى جاهدا لطمئنتها ويربت على كتفها بكلماته وأفعاله قائلا " أن ما فات لن يعود منه شيئا ولن يكون في مستقبلهم معا ما يُذّكر به " ، و قلبها مطمئنا له وبه ، يشعر بشيء من الراحه والأمان لم يعرفهما من قبل

تقف كل يوم أمام المرآه وتنظر إلى نفسها نظرتها العابرة فتستوقفها النظرة واللمعان اللذان لم تراهما قبل ذلك الوقت .. فهي ترى في عينيها نظرة لم تفهمها وبريق لم تعهده من قبل

في عز فرحتنا دايما نلاقي الخوف واقف في سكتنا مشتاق لنا وملهوف

ولكن كعادة قلبها كلما زاد حبه أكثر كلما زاد خوفه أكثر وأكثر .. خوفه الغير مبرر والمجهول السبب

مالحقتش اقول يا ساتر ولا قلبي خدله ساتر ولا فاكر إلا كلمة إلحقني بتخطف

تسلل إلى قلبها دون أن تدري حتى أصبح جزءا لا يتجزأ منه ولا تدري كيف ولا متى حدث ذلك .. كل ما تعرفه أن حبها له يزيد يوما بعد يوم .. فهي تعرفه منذ سنين وتجمعهم صداقة قوية جدا لا حدود لها .. ولكن متى جاء الحب وأين كان له كل هذا الحب ؟ .. لا تدري .. أين ذهبت مواصفات فارس الأحلام أو كيف كانت ؟ .. لا تذكُر .. فهذه المواصفات الآن أصبحت متمثلة فيه ولا تذكُر كيف كانت قبله .. فهي تريده هو فقط كما هو بطيبته وحنيته وعصبيته ونرفزته .. بمميزاته وعيوبه .. تريده كما هو

قومي افتحي لولادك الطيبين قووومي .. ( شهيد الطوارئ ) وقفات يوم 25 / 6

2010-06-26T23:15:00.049+03:00

المره اللي فاتت اما كتبت كنت متضايقه اوي من البلد .. رغم حبي الفظيع ليها بس كنت متضايقه ومجروحة وصعبان عليا منها .. بس بعد كده بأيام شوفت صور وفيديوهات خلتني قولت طبعا بحبها وازاي ماحبهاش .. الصور والفيديوهات دي كانت بتاعة المظاهرات والوقفات اللي اتعملت عشان خالد سعيد الله يرحمه .. حسيت اني فعلا ليا حق في حبي ليها .. اكيد بحبها عشان ناسها وولادها دول .. الناس اللي نزلت الشوارع واتعرضت للأذى من اللي مايتسموش في كل لحظة عشان يدافعوا عن حق واحد اصلا مايعرفوهوش .. واحد ماعرفوهوش غير بعد ما مات او بمعنى اصح اتقتل .. ورغم كل شيء مُصرين ياخدوا حقه مهما حصل ومهما اتضيق عليهم مكملين وكل يوم بيزيدوا لغاية ما يرجع حق خالد

موته عمل حاجة غريبة اوي و جميلة اوي ان المظاهرات والوقفات مابقتش مجرد مجموعة من الشباب .. لا بقى فيها امهات وآباء عرفوا ان السكات مش هيحافظ على ولادهم ويخليهم يربوا العيال لانهم حتى وهما ساكتين العيال بتموت .. آباء وامهات حاسين بحرقة قلب على ابنهم اللي راح

وفي نفس الوقت متابعة كل اللي بيحصل ده خلاني في يوم لقيتني بقول ازاي خالد ده يكون واحد وحش زي ما هما بيقولوا عنه .. ازاي ده كان بني آدم وحش وربنا مسخرله كل الناس دي بتدافع عن حقه وتقف بالساعات بتدعيله وتقراله قرآن .. صعب اوي يتصدق ان ده كان بني آدم مش كويس

صور الوقفة الاحتجاجية من اسكندرية يوم الجمعة

25 / 6

صور من الوقفة الصامتة الثانية يوم الجمعة

25/ 6

من القاهرة واسكندرية وبورسعيد وطنطا والمنوفية و راس البر والفيوم والمنصورة والمنيا واسماعيلية
اسكندرية

كوبري 6 اكتوبر

كورنيش المعادي

اسماعيلية

خالد في مهرجان الكوربة

وصور لمصريين في فرنسا وانجلترا وامريكا ودبي و الدوحة ومكة المكرمة

مكة المكرمة

مصريات في امريكا

مصري في انجلترا

قطر

باقي الصور وكل ما يخص القضية هتلاقوه هنا

لإمتى يا بلد ؟ .. ( شهيد الطوارئ ) مع التحديثات

2010-06-11T22:17:00.023+03:00

يمكن أكون من الصبح مش عارفه اتكلم في اي حاجة ولا مع اي حد .. ولا عارفه ابطل عياط ولا عارفه اسرح ف حاجة

تانية غير الصورة اللي شوفتها الصبح وكل اللي قريته عن الموضوع

كل اللي اعرفه اني حاسه بأحاسيس واجعاني اوي ومش عارفه اتخلص منها ولا لحظة واحدة .. حاسه بغضب شديد من

اللي حاصل .. حاسه اني صعبان عليا اوي من البلد دي .. صعبان عليا اوي اوي

اللي هو انا بحبك اوي ودايما بدافع عنك اوي ضد اي حد يغلط فيكي ويقول بيكرهك ودايما بقولهم اننا مابنكرههاش

وماينفعش نكرهها احنا بنكره اللي بيحصل فيها .. بس كفاية بقى .. لامتى يا بلد هيتقتلوا ولادك وحتى مش قادره

تصرخي .. مش عارفه اكرهك بس برضو مش هقدر احس بالأمان فيكي .. ومش قادره استوعب ازاي الاتنين ولادك

القاتل والمقتول .. وازاي يتقتل وانتي ساكته وبتتفرجي .. لو كُرهك كان حاجة سهلة اكيد كنا ارتحنا وكرهناكي .. بس

الصعب ان اللي حاصل فيكي بقى كتير علينا وبرضو مش قادرين نكرهك وده اللي تاعبنا اكتر .. شايلين الاتنين جوانا

والصراع بينهم كبير وتاعبنا معاهم .. هفضل احبك وانا خايفه فيكي ولا خوفي هيقتل حبي ليكي

هنا كلام والدة خالد عن الحادثة في جريدة الشروق

و هنا بقى كلام النيابة في اليوم السابع

في الكلام التاني بقى كلام لازم يكون بيتحكي لأطفال في الحضانه عشان ميعملوش زي عمو الشرير .. اتقال فيه ان خالد

صاحب قضايا ومطلوب ضبته وكان معاه مخدرات وان الشرطة حاولت تمسكه وهو هرب لكن قدروا يمسكوه وبلع

المخدرات اللي كانت معاه وهو ده اللي موته .. ان الورقة المفضضه الملفوف فيها المخدرات هما اللي قتلوه

طب ماشي اوك مش فاهماك برضو انت بتحاول تفهمني او تقنعني بإيه .. بتقنعني بإنه كان مجرم ؟ طب حتى لو

افترضت انه كان مجرم فين اللي بيديهم احق انهم يعملوا فيه كده ويدغدغوا دماغه

ولا انت قصدك تقنعني ان اللي موته انه اتخنق من المخدرات اللي بلعها زي ما بتقول .. طب يا ترى المخدرات اللي

بلعها هي برضو اللي كسرت دماغه ووشه كده بعد ما مات ولا ايه

حسبي الله ونعم الوكيل

..............

تحديث

...

اليوم السابع : الأمن يحاصر مظاهرة للتنديد بحادث ضحية الاسكندرية

...............

اليوم السابع : الداخلية تنفي مسئوليتها عن وفاة الشاب خالد سعيد

ده بقى اللي بيتقال عليه ان اللي اختشوا ماتوا .. حتى والدته طلعوها قالت عنه انه متعاطي مخدرات .. وبرضو هفضل معاك للآخر حتى لو هو بتاع مخدرات فين اللي بيديك الحق انك تعمل فيه كده

.................

فيديو شهادة صاحب السيبر في مقتل خالد

.................

تحديثات اليوم 13 يونيو

بيان العقيد عمر عفيفي عن قتل الشهيد خالد محمد سعيد

محطة مصر : انفراد الشروق بقضية شهيد الطوارئ ساعد على كشف الحقيقة

جيران خالد شهيد الطوارئ يتحدثون لمحطة مصر

فيديوهات من مظاهرة القاهرة

هنا

و هنا

صور من مظاهرة القاهرة

صور مظاهرة الاسكندرية

فيديو مظاهرة الاسكندرية .. هنا

تعليق الاستاذ ابراهيم عيسى على اللي حصل

نعم وقفة احتجاجية .. ولو كان حشاشا .. ولو كان قاتلا .. اقراه هنا

انا كمان بقول كده .. اه بقى وقفة احتجاجية حتى لو كان حشاش ومجرم بكل الجرايم اللي في الدنيا عشان كل ده مايديش الحق بقتله بالصورة دي

أغنية ليه .. اهداء إلى روح خالد

شهود يردون على ما أشيع عن خالد في الاعلام الحكومي

إلى متى ستصدُق العلامات ؟

2010-03-28T16:43:00.020+02:00

تجلس في غرفتها إلى جهاز الكمبيوتر و تستمع إلى الراديو

تدخل لتتصفح بريدها الالكتروني فيفاجئها اسمه معلنا عن

وجوده مع تأكدها أنها محت اسمه وكل ما يخصه من حياتها وبريدها وكل شيء

ولكن تجده ولا تعرف كيف .. وكالعادة

ظهر اليوم بعد أن سبق ظهوره الكثير من الأشياء التي تُذكر به

كأشخاص يشبهونه

كأماكن تحدث عنها

كأغاني لطالما سمعتها

منذ أيام ليست بقليلة وهذه الأشياء تطاردها في كل مكان وتحكم عليها الخناق

ولكنها كانت تطردها من حياتها كما طردته هو في السابق وهي تؤكد لنفسها استحالة ظهوره مره ثانية

فمجرد ظهور أي شيء يُذكر به يحيل مزاجها إلى حالة من الامتعاض والقرف

وهي إلى الآن لا تستطيع تفسير صدق العلامات في حياتها فيما يخصه فقط

كانت تحدق في اسمه بنظرة شاردة وترتسم على وجهها ملامح الاندهاش والحيرة حين أتاها صوت فيروز ملء المكان بأكثر كلمات اقترنت به وبذكراه

تذكر آخر مره شفتك سنتا

تذكر وقتا آخر كلمة قلتا وماعدت شفتك وهلأ شفتك

تذكر آخر سهرة سهرتا عندنا تذكر كان فيه واحدة مضايق منك

هيدي امي بتعتل همي منك انت ملا انت
........

تذكر آخر مرة شو قلتلي بدك ضلي بدك فيكي تفلي زعلت بوقتا وما حللتا انه انت هيدا انت

غدا في معرض الكتاب .. كلاكيت تاني مرة

2010-02-08T02:58:00.004+02:00

زي السنة اللي فاتت بالظبط .. بكره ان شاء الله في معرض الكتاب حدثين هما اهم أحداث معرض الكتاب بالنسبة لي

بكره او النهاردة باعتبار اننا دخلنا يوم الاثنين 8 / 2 حفلتين توقيع من اجمل حفلات التوقيع

حفل توقيع كتاب " حكاية رجل عجوز كلما حلم بمدينة .. مات فيها " للروائي الرائع وعراف ضربة شمس طارق إمام .. وده بصراحة كتاب انا شخصيا كنت مستنياه من زماااااااااان لانه بيضم كل حكايات طارق امام اللي عشقنا قرايتها في صفحة ضربة شمس

حفلة التوقيع هتكون من الساعة 3 : 5 في جناح دار نهضة مصر - صالة 8 - بجوار بوابة 10

وكتاب " أنا راعي بقر وحيد " للزعيم خالد كساب .. رئيس جمهورية ضربة شمس

حفلة التوقيع هتكون الساعة 5 في جناح دار الشروق

حاليا بالمكتبات .. معلش مخدتش بالي .. معاذ شهاب

2009-12-15T12:58:00.004+02:00

معلش مخدتش بالي

لا ولا يهمك يا حبيبي

......معلش مخدتش بالي

يعم بتقول ايه ده انت ابو الاصول برضه

......معلش مخدتش بالي

لا لا ابقى خده بعد كده ياروح ماما

......معلش مخدتش بالي

يعم عادي..مفيش حاجة حصلت

.......معلش مخدتش بالي

انت لازم تتربي عشان تاخده بعد كده

......معلش مخدتش بالي

يا برنس الليالي خده وهاتلى بالباقي دخان ..وانت فاهمنى

معلش مخدتش بالي

حاليا بالمكتبااااااااااااااات كتاب صديقنا العزيز معاذ شهاب صاحب مدونة

معاذ شهاب

معلش مخدتش بالي

قصص قصيرة.. تحمل من الخيال لمحة.. ومن الواقع لمحات قد ترى فيها نفسك.. وقد ترى فيها آخرون يعيشون في حياتك طوال الوقت قصص قصيرة..أحيانا تكون بطلها.. وأحيانا تكون فيها الضحية ربما تجد فيها المرشد والدليل والمواسي والمحفز والصديق.. ربما تجد فيها البسمة.. والأمل.. الحلم.. والفرصة.. والطموح.. وربما تجد فيها لمسة حانية .. عند لحظة انكسار قصص قصيرة في فن الحياة تخدعك.. إذا لم تفهمها جيدا معلش مخدتش بالي قصص قصيرة.. تصدر عن دار أكتب للنشر والتوزيع

حاليـــــــــــا .. بالمكتبــات

أماكن التوزيع وكل حاجة عن الكتاب هتلاقوها هنا

يا حبيبتي يا أم الدنيا يا أغلى الأوطان

2009-11-22T23:38:00.005+02:00

أيام من أغرب الأيام اللي عيشتها في حياتي لدرجة اني حاسه انها حلم غريب .. مش عارفه أبدأ منين أو أقول إيه .. بس المره دي مش من قلة الكلام ولا تايهه ومش عارفه اقول ايه .. بس يمكن من كتر الكلام .. من كتر الأحاسيس اللي حساها .. حاسه بحاجات كتييييير اوي وكلها صادقة اوي اوي .. موجوعة ومخنوقة بالدموع وحاسة بالإهانه ونقح الكرامة ومبسوطة وحاسة بحب رهيب .. كلها أحاسيس من الغريب انها تجتمع مع بعض بس أنا حساهم كلهم مع بعض حسيت إني موجوعة ومجروحة ومخنوقة ونفسي أعيط وأنا بسمع إن المصريين مطاردين في الشوارع ومهددين بالموت في كل لحظة .. حسيت بالإهانه ونقح الكرامة أما سمعت إن المصريين بيتضربوا ومطاردين بالسلاح من شوية همج ورعاع مجرمين وخريجي سجون .. كنت حاسة أحاسيس غبية عمري ما حسيتها قبل كده .. أول مره أعرف يعني إيه كرامتي توجعني أوي وأحس إني هموت من الغيظ من غير ما اتعرض لموقف شخصي يمس كرامتي ولقيت الموقف اصعب وهو بيمس كرامة بلدي اللي بعشق كل شبر فيها غصب عن عين أي حد جواها أو براها .. أول مره برضو أحس إني خايفة وقلقانه على ناس ماعرفش فيهم أي حد ولا يربطني بأي حد فيهم أي حاجة غير أنه مصري وفجأة حسيت ان ليا في الشوارع دي اخ و اب واخت وام وخايفه عليهم بجد
وبعدها بيوم خالط الأحاسيس دي أحاسيس تانية حبيتها اوي .. فرحة كبيرة أوي أما شوفت شباب البلد دي متجمعين على حاجة واحدة وهي أهم حاجة اسم مصر .. سعيدة جدا بدرجة صعب اوصفها بالكلام إن العدد الرهيب ده من الشباب متجمعين وبيهتفوا باسم مصر بس مش في ماتش كورة إنما بيهتفوا باسمها وهما بيطالبوا برد كرامتها .. الشباب اللي بيتقال عيلهم ما بيحبوهاش وماعندهومش انتماء ليها واقفين وبيهتفوا باسمها ومحروقين عليها .. حبيت أوي لمتنا كلنا كشعب واحد بكل فئاته وطبقاته على نفس الحاجة وهي حبها ورد كرامتها من أول علاء مبارك اللي حبيت كلامه جدا واحترمته مرورا بموقف الراجل الجميل الجدع الفنان اللي بجد فتحي عبد الوهاب وصولا لأصغر حد هتف باسم مصر واتحرق من اللي حصلها
كل الناس بتتكلم والكل غضبان والكل بيطالب برد كرامتنا والبعض شايف اننا لازم نفضل الكبار واللي بنسامح واللي مش عارفه ايه واحنا وهما اخوات .. بس انا من كام يوم شوفت جملة كتباها واحده كتعليق على الفيس بوك وعجبتني اووووي ولقيته رأي صح جدا
وكانت إن الأخ الكبير ممكن في وقت يلطش اخوه الصغير ده قلم يفوقه ويعرفه حجمه
وهما بصراحه محتاجين ستين قلم مش الم واحد

مات بعد ما موتنا من الضحك

2009-10-19T23:25:00.004+02:00

قصيدة شجر الدشمله .. اقف تحت شجر الدشمله .. اترنح من كثرة الدهوله .. انظر إلى اوراقها .. غصونها .. فروعها .. واحتار بل اتساءل يا ترى ده يمين ولا دشمله
....................

يااااا قيصر الصقيع .. خِش جوا الدنيا برد .. لا يجيلك زكام ماينجدك أي حد .. ومفيش انتيبايوتك .. ولعلمك الصيدلية قافله

دي أجزاء من مشاهد الفنان الجميل محمد فاروق في عرض قهوة سادة واللي فوجئت بخبر وفاته امبارح
اتضايقت جدا وحزنت اما عرفت بوفاته لاني كنت حباه جدا من اول مره حضرت فيها العرض ..
بس بالليل جه في بالي وافتكرت كل مشاهده اللي بتموتني من الضحك كل ما اشوفها او افتكرها وساعتها ابتسمت ابتسامه كبيرة جدا واترحمت عليه
جه في بالي ساعتها ان أكيد حاجة جميلة جدا ان الواحد بعد ما يموت والناس يفتكروه يكون سبب في ابتسامتهم فيترحموا عليه من قلبهم اوي

الله يرحمه ويسكنه فسيح جناته

عيد ميلاد الليلة مين

2009-10-02T22:47:00.021+02:00

عيد ميلاد الليلة مين .. عيد ميلاد نيمو .. يعني عيد ميلاد صديقي الصدوق الفظيع اعسل العسولين وأفظع الفظيعين كل سنة وانت طيب يا نيمو يا جميل وعقبال مليوووون سنة وحبه كمان كتير ..
ويارب كل سنينك الجايه تبقى كلها اجمل من بعضها وتحقق فيها كللللللل اللي بتتمناه واللي مابتتمناهوش ولا كان يخطرلك على بال اساسا :)
بس بقى بطل رغي عشان عندنا عيد ميلاد
اقولك بداية تعالى اعزمك على الغدا بما انه عيد ميلادك وكده بس طبعا ما تقوليش انتي اللي عاملاه عشان ما اتضايقش عليك

كفاية أكل عشان فيه حاجات تانية كتير .. اقولك روح هات شنطة وتعالى عشان تلم هداياك اللي هنا

صحيح انا مابحبهاش بس عشان خاطرك انت بس جيبتها ودخلتها بيتي
:)

عمرك انت شوفت الاختراع ده .. اتنين في واحد اهو توفير برضو .. انت عارف طبعا فظيعه
:)
انا بقى شخصيا عمري ما شوفت الانواع دي .. بس كلهم ليك .. هيصه بقى

دول بقى انت عارف طبعا .. زي الشاطر كده تاخدلك واحدة وماتمدش ايدك هنا تاني
:)

كده خلصت فقرة الغدا بقى والحاجات الحلوة .. نبدأ العيد ميلاد والهدايا بقى عشان الناس تروح وما يتأخروش برا البيت
:)

هابي بيرث داي تو يو .. هابي بيرث داي تو يو .. هابي بيرث داي تو نيمو .. هابي بيرث داي تو يو
سنة حلوة يا جميل .. سنة حلوة يا جميل .. سنة حلوة يا نيمو .. سنة حلوة يا جمييييييييل .. هففففففف

يللا حالا بالا بالا هنوا ابو الفصاد هيكون عيد ميلاده الليلة اسعد الاعياد فليحيا ابو الفصاد هييييييييييه
التورتاااااااااات .. وبما انها تورتات لنيمو يعني لازم تكون حاجة كده سبيشيال ..
واكيد معروف ان اللي مش جايب هديه معاه مايمدش ايده منعا للإحراج
:)

دول بقى سكربنتص اصحاب كربنتص عاملهم كويس لو سمحت وماتكشرش في وشهم
:)

وده يا سيدي الرايتر اللي كنت هتجيبه .. اي خودعه
ودول سميهم زي مانت عايز بس بعيد عني عشان انا اصلا بخاف منهم

ودول شوية تي شيرتات كده على ما قسم تنقي منهم اللي يعجبك
:)

وفي الآخر أحب اقولك يا رب يكون عيد ميلادك الصغنتوت عجبك
وكل سنة وانت طيب وجميل وفظيع وكل الحاجات

جميع حلقات برنامج قصص القرآن .. ج2 .. متجدد

2009-09-03T00:09:00.006+02:00

لتحميل حلقات برنامج قصص القرآن الجزء الثاني .. الحلقة الأولى

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

...........

الحلقة الثانية .. قيمة العدل

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا
....................

الحلقة الثالثة .. فرعون والمصريون

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة الإخلاص ؟
أدخل شوف نفسك

........................

الحلقة الرابعة.. قيمة التوكل على الله

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة التوكل على الله ؟
أدخل شوف نفسك
..................

الحلقة الخامسة .. قيمة استكمال صفات القائد

لتجميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من صفات القائد ؟
أدخل شوف نفسك
................

الحلقة السادسة .. القدرة على الاختيار الصحيح

لتجميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

هل أنت قادر على الاختيار الصحيح ؟
أدخل شوف نفسك.

........................

الحلقة السابعة .. نصرة الضعيف

لتجميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة نصرة الضعيف ؟
أدخل شوف نفسك

.....................

الحلقة الثامنة .. المرونة مع ظروف الحياة المتقلبة

لتجميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين انت من قيمة المرونة مع ظروف الحياة المتقلبة ؟
أدخل شوف نفسك.

........................

الحلقة التاسعة .. افعل شيئا ليختارك الله

لتجميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة العمل لله ؟
أدخل شوف نفسك

...............................

الحلقة العاشرة .. التوازن بين الحكمة والشجاعة

لتجميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة التوازن بين الشجاعة والحكمة ؟
أدخل شوف نفسك.

........................

الحلقة الحادية عشرة ..احمل الحق وعيش للحق

لتجميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة احمل الحق وعيش للحق ؟
أدخل شوف نفسك

........................

الحلقة الثانية عشر .. صفات المؤمن الحقيقي

لتجميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة صفات المؤمن الحقيقي ؟
أدخل شوف نفسك

...............................

الحلقة الثالثة عشرة .. احذر امهال الله

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة احذر من امهال الله ؟
أدخل شوف نفسك

.......................

الحلقة الرابعة عشرة .. استشعار عظمة وقوة الله

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة استشعار عظمة وقوة الله ؟
أدخل شوف نفسك

........................

الحلقة الخامسة عشرة .. قيمة الشوق إلى الله

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة الشوق إلى الله ؟
أدخل وشوف نفسك
..........................

الحلقة السادسة عشرة .. قيمة العزة

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة العزة ؟
أدخل وشوف نفسك
.....................

الحلقة السابعة عشرة .. قيمة علاج أمراض القلب

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة علاج أمراض القلب ؟
أدخل وشوف نفسك
.................

الحلقة الثامنة عشرة .. قيمة حب المسجد الأقصى

لتحميل الحلقة برابط مباشر
أضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أن أنت من قيمة حب المسجد الأقصى ؟
أدخل وشوف نفسك
......................

الحلقة التاسعة عشر .. استشعار حلم الله ورحمته

لتحميل الحلقة برابط مباشر
اشغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

استشعار حلم الله ورحمته
أدخل وشوف نفسك
.....................

الحلقة العشرون .. الاقبال على العلم

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة الاقبال على العلم ؟
أدخل وشوف بنفسك
..................

الحلقة الحادية والعشرون .. الرضا عن قضاء الله

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

أين أنت من قيمة الرضا عن قضاء الله ؟
أدخل وشوف نفسك
......................

الحلقة الثانية و العشرون

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

لقراءة الحلقة
اضغط هنا

...........................

الحلقة الثالثة والعشرون

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا
......................

الحلقة الرابعة والعشرون

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا
.....................

الحلقة الخامسة والعشرون

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا
......................

الحلقة السادسة والعشرون

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا
...................

الحلقة السابعة والعشرون

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا
....................
الحلقة الثامنة والعشرون

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا
.......................

الحلقة التاسعة والعشرون

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا
.....................

الحلقة الثلاثون

لتحميل الحلقة برابط مباشر
اضغط هنا

لتحميل الحلقة برابط مباشر mp3
اضغط هنا

رمضان جااااااانااااااا

2009-08-21T21:41:00.004+02:00

كل سنة وانتم طيبين وكويسين وصايمين ومصليين وقايمين الليل ومتصدقين وعاملين كل حاجة كويسه وجميلة ترضي
ربنا وتقربكم اليه اكتر واكتر وتدخلكم الجنة بإذن الله .. ورمضان سعيد ومبارك علينا كلنا ان شاء الله

النهاردة ده بوست شااااااااامل فيه كل حاجة المفروض تكون موجوده النهاردة .. شوية اغاني من بتوع رمضان .. وبرنامج الليلة الاولى في رمضان اللي هي النهاردة .. وبرنامج اليوم والليلة من كل يوم في رمضان وكل سنة وانتم طيبين

وبفكركم ان من بكره ان شاء الله هتكون موجوده حلقات برنامج قصص القرآن الجزء التاني
رمضااااااااان كريييييييييم

..................

أغاني رمضان

هنا

....................

برنامج الليلة الأولى من رمضان - آخر يوم من شعبان

هنا

.......................

برنامج اليوم والليلة من كل يوم في رمضان

هنا

وكل عام وانتم بخييييييييير

رسائل من الاستاذ عمرو خالد

2009-08-20T04:25:00.003+03:00

رمضان خلاص بيخبط على الباب .. بيخبط ايه ده زمانه داخل وانا بتكلم كده .. كل سنة وانتم طيبين وكلكم بخير وتتقربوا لربنا اكتر واكتر ويتقبل منكم ويسعدكم .. وإن شاء الله البلوج هتكون زي السنة اللي فاتت في متابعة برنامج قصص القرآن الجزء التاني بكل حلقاته يوم بيوم بإذن الله .. دلوقتي انا هبطل رغي واسيبكم مع رسايل استاذ عمرو خالد كل سنة وانتم طيبين
......................

هذه الكلمة وجهها الأستاذ عمرو خالد بمناسبة الإعلان عن حملة سنحيا بالقرآن خلال شهر رمضان:

يقول الأستاذ عمرو خالد:

رمضان شهر القرآن ، والقرآن هو نعمة الله لهذه الأمة. والقرآن كما وصفه الله تعالى هو نور ورحمة وهداية وشفاء،

ولا أمل لهذه الأمة إلا بفهم القرآن حق الفهم ، ونحن في برنامج قصص القرآن هذا العام نشرح قصة موسى

عليه السلام ، وتشكل هذه القصة ما يقرب من ربع القرآن ، العديد من السور تناولت قصة موسى عليه السلام

كسورة طه والشعراء والأعراف والقصص والبقرة مما يجعل كل من يسمع ويتابع قصص القرآن هذا العام عنده

فرصة كبيرة لفهم ما يقرب من ربع القرآن. لذلك اخترنا أن نستفيد من هذه الفرصة العظيمة لنحيي لدى الملايين

حب القرآن والتعامل معه من خلال حملة سميناها سنحيا بالقرآن.

حملتنا تهدف إلى أن جمع ملايين من شباب ونساء الأمة حول القرآن ووضعنا مستهدف هو الوصول إلى 10 ملايين

ختمة من بين متابعي البرنامج.

سنضع عداد على موقع عمرو خالد دوت نت لتجمع هذه الختمات ونوايانا أن نلقى الله بهذه الختمات وبهذا العدد

الكبير لعل الله يرحمنا بها وندخل الجنة.

وحتى يكون الهدف قابل للتحقيق ،وليبقى باستمرار هناك تذكير للملايين بحب القرآن ، وضعنا بوستر يحمل هذه

الفكرة ليطبعه الناس ويضعوه في كل مكان ، كل من سيقرأ هذا البوستر سنحصل نحن على الثواب لأن كل من

سيراه إن شاء الله سيقبل على القرآن.

وستجدوا هذا الاستيكر على الموقع ، ضعوه في كل مكان لنشترك جميعا في الثواب ويكون رمضان خير علينا

جميعا.

فهيا يا شباب أحيوا في الأمة حب القرآن.

* عمرو خالد بيروت 17 اغسطس 2009
.....................................

كل عام وأنتم بخير يا شباب .. ربنا يسعدكم ويبارك لكم ويتقبل منكم رمضان .. ويجعله شهر بركة ورحمة وسعادة وعزة علينا جميعاً ، وأحب أن أقدم لكم بمناسبة هذا الشهر الكريم هدية بسيطة أتمنى أن نتواصى بها ونتعاون عليها إلا وهي :

جدول رمضان

وهو جدول مقترح للعبادة في رمضان مكون من 6 عبادات ومرفق به جدول للمحاسبة لمدة 30 يوم

أسال الله أن يتقبل مني ومنكم ويدخلنا بهذا العمل جنة الفردوس ..

جدول مقترح للعبادة في رمضان ... انقر هنا

http://server4.amrkhaled.net/downloa...mdan_Table.zip

كاتبي المفضل .. العراف وراوي الخيال

2009-08-12T00:57:00.009+03:00

حكايته من أول سطر فيها بتقطعلك تذكره لعالم الخيال اللامحدود اللي استحاله ترجع منه إلا مع آخر نقطه بتنهي الحكاية .. ومع ذلك رجوعك ماهواش رجوع لانك هتفضل منبهر ومسحور وسرحان .. هي دي حكايات طارق إمام .. حكايات بدأ انجذابي ليها يوم ما فتحت ضربة شمس ولقيت فيها حكاية قريتها وخدتني لعالم خيالي عيشت فيه من أول كلمة في الحكاية لآخر كلمة .. وحبيتها أوي وبقيت بستنى الحكاية كل أسبوع .. وبقى الأسبوع اللي مافيهوش حكاية اسبوع رخم يوم الأربعاء فيه ناقصه حاجة جميلة .. ومابقيتش عارفه اكتفي بحكاية كل اسبوع وبدأت أدور على طارق إمام يمكن ألاقي حاجات أكتر أقراها وفي نفس الوقت نفسي ابعتله وأقوله انه عبقري وحكاياته مالهاش حل .. وفعلا في يوم من ذوات الأيام لقيت مدونة باسم طارق إمام وطبعا فرحت فرحة العيد .. وساعتها قريت فيها بوست بيظهر جانب آخر لطارق إمام .. البوست ده كان اسمه قارئ إمام .. وكان بيتكلم فيه عن علاقة الكاتب بالقارئ بتاعه والعكس .. ولقيت أد إيه هو شخصية جميلة ومتواضعة وبيحب قُراءه وبيحترمهم إزاي – وده شفته بنفسي فيما بعد .. هجيلكم في الكلام – وكملت بحثي ووصلتله على الفيس بوك ومن ساعتها زهقته في عيشته بآرائي في كل حكاية أقراها وروايته – هدوء

القتلة - اللي كانت ومازالت مكسرة الدنيا

وفضلت على كده لغااية ما جه اليوم اللي أسعدني فيه حظي وقابلت فيه كاتبي المفضل الجميل طارق إمام يوم توقيع روايته الجديدة الأرملة تكتب الخطابات سرا في معرض الكتاب 2009 م .. ودي كانت أول مرة أقابله فيها وأشوف بعيني اللي كل الناس بتقوله عنه .. شخصية جميلة جدا .. متواضع مووت .. خجول ومحترم آخر حاجة .. بجد كنت مبسوطة جدا إني قابلته وطايرة من السعادة إنه عارفني .. بالنسبالي كان شيء خيالي إن كاتبي المفضل يبقى عارفني وفاكرني وأنا مجرد واحدة من آلاف القراء ..

واللي زاد وغطى يوم اللقاء الضربشمساوي الثاني أما اتفاجئت وهو بيقول اسمي كواحدة من قراءه المميزين .. يختييييي .. كنت هتجنن من السعادة اصلا .. وكان فاضلي حلم بقى اني احضرله ندوة من ندواته الجامدة اللي بسمع عنها .. و بعدها بفترة اتحقق الحلم وحضرتله ندوة عن الأرملة تكتب الخطابات سرا وبجد كنت سعيدة ومستمتعه جدا بوجودي في الندوة ماكانش ناقصني غير بس اني اتكلم وأقول رأيي وانا للأسف مابعرفش اتكلم في المواقف دي ..

في الندوة ناس اتكلموا عن إن الزمان والمكان في الرواية مجهولين وكانوا عايزين يعرفوا عنهم أكتر من كده .. بس بالنسبة لي وأنا طبعا مش ناقدة ومجرد قارئه عادية بس ببقى مستمتعة جدا .. هي بالنسبة لي حالة وأكيد حالة فريدة بعيش فيها من أولها لآخرها من غير ما أحس اني محتاجه أعرف عنها تفاصيل أكتر من اللي هو معرفهالنا عنها ولا عايزة أعدل على أي حاجة لا لغة ولا تفاصيل ولا مكان ولا زمان .. مستمتعة وبس ..

تقريبا أنا لو قعدت اتكلم مش هخلص النهاردة .. كل اللي أحب أقوله النهاردة في يوم عيد ميلاده .. إن انت بجد انسان جميل ومبدع وعليك خيال بسم الله ما شاء الله مالهوش حل دايما مخلينا منبهرين بوصولك ليه .. ويارب دايما من نجاح لنجاح أكبر وأكبر ومستنيه كتاب الحكايات والمفاجأة ..

صحيح نسيت اقولك اعتبر البوست ده عشان اقولك كل سنة وانت طيب وفي نفس الوقت اعتذار عن صمتي في الندوة اصلي ماعرفتش اقول هناك فجيت أقول هنا ..

كل سنة وانت طيب ومبدع وعبقري وعراف وراوي جمهوريتنا الضربشمساوية العزيزة ربنا يرجعها بالسلامة

رجووووووع

2009-08-10T21:15:00.029+03:00

انتهت الأجازة السنوية الرسمية من القاهرة ورجعنا للحر من تاني
:)
ورجعت كمان لمدونتي حبيبتي .. وكالعادة إليكم بعض صور الطبيعة المصيفية
:)

السما قبل الشروق تقريبا بساعة

ودي السما وهي لا جايبه شروق ولا ليل .. بين البينين يعني .. والنقطة البيضه اللي فوق على اليمين دي كانت نجمه على فكره
:)

بداية الشروق

ده بقى غروب

أول لحظة بعد نزول الشمس في البحر

طبعا عمر ما حد هيصدق ان ده القمر .. بس والله العظيم ده فعلا القمر
:)

.. أجازة مصيف

2009-07-31T05:26:00.003+03:00

أجازة من القاهرة بزحمتها بحرها بزهقها بسلاطتها ببابا غنوجها
:)
أجازة لمدة أسبوع يبدأ من النهاردة
اشوفكوا على خييييير - مش بتتقال كده برضو .. والله ماعرف-
:)

.. بحار .. بلاك تيما

2009-07-26T23:28:00.007+03:00

أجمد كليب لأجمد أغنية لأجمد فريق مالهوووووووش حل
بجد بموووت فيهم
ده أول كليب لفريق بلاك تيما

بحار خايف من المشوار .. في البحر وانت بعيد الموج تملي يزيد ويخبي في الأسرار
محبوب ومفيكش اي عيوب .. مهما تغيب ع العين نورك على الشطين .. حبك قدر مكتوب
ونّاس بتحب كل الناس صوتك يونسني من نظرة تهوسني وعينيك قمر بالناس
ونّاس بتحب كل الناس صوتك يونسني من نظرة تهوسني وعينيك قمر بالناس
وبدور وبعدي اي بحور .. تندهني وانا اروحلك تحضني وابوحلك ده الحب عصفور نور
محبوب ومفيكش اي عيوب .. مهما تغيب ع العين نورك على الشطين .. حبك قدر مكتوب
ونّاس بتحب كل الناس صوتك يونسني من نظرة تهوسني وعينيك قمر بالناس
ونّاس بتحب كل الناس صوتك يونسني من نظرة تهوسني وعينيك قمر بالناس

الأغنية بجد لحن وكلمات وكليب وأداء أكتر من راااااائع .. فعلا بداية كويسه جدا في التليفزيون
هما دول بلاك تيما .. يخربيت جمالهم
:)

.. تفكير .. تفكير .. تفكير

2009-07-22T03:21:00.006+03:00

نفسي وانا ماشية في ممرات حياتي اللي جوا دماغي ألاقي ريموت كنترول أعمل بيه ستوب (stop ) .. بس مش stop للحياة يعني أموت .. ولا stop اللي تخلي المشهد اللي أنا فيه يثبت وأقف اتفرج عليه وأراجعه .. لا stop مختلفة شوية .. stop تخلي كل حاجة تختفي .. فجأة تبقى كل ممرات دماغي دي فااااضياااااه وبيضا ..فراغ حواليا أبيض .. شبه مشاهد ماتريكس كده .. أعيش شوية في هدوء وصفاء .. من غير تفكير في مين بيحب ومين بيكره .. وبكره عامل ازاي والمفروض يبقى عامل ازاي .. وإيه اللي المفروض يحصل وأعمل إيه عشان يحصل

كام يوم فاضيين صافيين بعيد عن أي تفكير وأي مشاهد وأي ألوان وأي حوائط وأي مجسمات .. بعيد عن أي حاجة

ممكن تقابل عيني أو تفكيري غير الفراغ الأبيض الوااااااااسع اللي ماشوفش غيره ..

ومفيش مانع من إن المشهد يتغير شوية ويكون بدل الفراغ الأبيض شاطئ فاضي على بحر صافي وسما أصفى .. عيشة هدوء .. حلم صعب المنال ..

يا ترى ده ممكن يحصل ؟ .. استحاله .. ولو حصل أكيد في يوم هرجع لحياتي من تاني وساعتها هيكون كل شيء أسوأ .. لإنه هيبقى فات المعاد .. كل حاجة كنت بفكر فيها والمفروض أعملها أو أحلها هيكون فات معادها واتكركبت أكتر ..

قال يعني هي مش كده كده متكركبة ..

إحساسي بإن دماغي بقت عامله زي بكرة خيط متكعبلة .. خيوط كتيير داخله في بعض ومفيش ولا خيط باينله نهاية هو اللي مخليني أتمنى وأحلم بالحلم ده .. احتياجي لفترة راحة من التفكير كل التفكير مخليني نفسي ألاقي فيشة مخي عشان افصله شوية .. مخليني عايزة أعمل format لدماغي يمكن ارتاح منها شوية .. ومش عارفه أعمل إيه ولا الحل هيكون إزاي .. الفرج من عندك يا كريم .. افرجها ياااااا رب ..

Baaaaaaaack

2009-07-22T00:14:00.005+03:00

يااااااااااااااه .. بلوجي حبيبتي حياتي .. ياااااه ايه ده انا ماجيتش هنا من امتى .. ده من زمان اوي
مش عارفة المفروض ارجع على طول ولا لازم اعتذر ولا ايه
دي اطول فترة غياب تقريبا غيبتها عنها من يوم ما اتوجدت في حياتي اصلا
انا آسفه بجد يا بلوجي يا حبيبتي سامحيني على غيابي عنك كل الفترة الطويلة دي
بس والله غيابي عنك كان لاسباب كتير اوي ورا بعضها وعلى بعضها
اسباب نفسيه على اسباب تكنولوجيه - الكمبيوتر طبعا كان بايظ كالعادة - على اسباب صيفيه حر وزهق وكسل على صمت وكده يعني
بس انا جيت واتمنى ما امشيش تاني لا كتير ولا قليل
سوري بجد و وحشتيني موووووووووووت

.. ضربة شمس - من السمع إلى الإدمان - وحشتيني

2009-05-11T17:34:00.010+03:00

خالد كساب .. خالد كساب .. خالد كساب .. ضربة شمس .. خالد كساب .. الدستور .. خالد كساب .. خالد كساب .. ضربة شمس .. خالد كساب

ودي كانت سيرة ضربة شمس و خالد كساب اللي مابتخلصش من صحبتي وحبيبتي انتيمتي مرام - مجنونة خالد كساب - واللي أنا ماعرفش عنهم حاجة غير السمع ده لدرجة اني حتى عمري ماشفتهم ولا القيت نظرة حتى .. لغاية ما في يوم انا فاكراه كويس أنعمت عليا وكانت عايزة توريني مقال لخالد وكانت أول مرة في حياتي أصلا امسك جرنال الدستور .. اديتني الجرنال مفتوح ومتظبط على مقال خالد وأنا ماسكة الجرنال أصلا بامتعاض - إيه امتعاض دي - رهيب لاني من الأساس بكره الجرايد .. بس عشان خاطرها قولت أقرا المقال .. ووقعت عيني على صفحتين ضربة شمس في أول لقاء بيننا وساعتها حسيت اني هبله .. اني مامسكتش جرايد قبل كده .. اني مش ماسكة جرنال مثلا .. ماعرفش كل اللي اعرفه اني مش فاهمه فيه إيه .. عمري ما شفت جرنال شكله حلو كده وعناوين المقالات بالشكل ده وكل حاجة فيه شبه كلامنا كده .. فكنت مستغربة جدا للدرجة اللي تخليني عمري ما أنسى المره دي أبدا .. وعدا الحوار وماشغلتش نفسي لاني فعلا بكره الجرايد وماتخيلتش أبدا اني ممكن أداوم على شراء جرنال .. بس تقريبا ان الحوار ماعداش ولا حاجة زي ما أنا تخيلت شكله اتخزن في الذاكرة وانا انجذبت .. وبدأت مرة في مرة فعلا أجيب الجرنال وأبدأ أهتم وأتابع واحفظ أسامي كتاب واستنى مقالات ناس .. لغاية ما وصلت للإدمان .. اللي هو انتظار يوم الأربعاء من الخميس اللي قبله .. واني أعلم الاسبوع بيوم الأربعاء .. يوم لقائي بحبيبتي ضربة شمس وناسها اللي بقابلهم في مقالاتهم

لأول مرة في حياتي أقابل ناس شبهي بالدرجة دي وأنا اللي كنت فاكره انهم مش موجودين أصلا .. بس لقيتهم اما لقيت ضربة شمس وبقيت كل ما أقابلهم في أي مناسبة أبقى نفسي أروح لخالد وأقوله شكرا .. شكرا على كل حاجة .. شكرا على الكيان الجميل اللي انت عملته .. شكرا لانك انت السبب في لمتنا الحلوة دي ومعرفتنا لبعض .. شكرا على كل حاجة فعلا لاني مش هقدر أعدد كل الحاجات

ضربة شمس بالنسبة لكل الضربشمساوية مش مجرد صفحتين في جريدة أو حتى جريدة كاملة .. ضربة شمس بقت حياة .. شيئ جميل انك تقابل ناس شبهك جدا تقريبا في كل حاجة

في يوم لقائنا التاني - لاني للأسف ماحضرتش الأولاني - كانت عندي حالة زهول .. ازبهلال .. انبهار .. مش عارفة .. كلنا قاعدين وبنتكلم ونتحاور ونتناقش وكل ما أفكر في حاجة تخص الموضوع اللي بنتكلم فيه ألاقي حد يقولها زي ما كنت بفكر فيها بالظبط .. لدرجة اني سرحت في إن احنا ازاي العدد ده كله من الناس متجمعين على حاجة واحدة كده .. وإزاي آرائنا تكون متفقه أوي كده في موضوع ما .. وساعتها زاد احساسي اني فعلا لازم أقول لخالد كساب - رئيس جمهورية ضربة شمس العظمي - شكراااااا .. شكرا كبيرة اوي يا خالد لان انت مش عامل مجرد أجمل صفحتين في جرنال لا انت عامل حاجة جميلة اوي اوي واكبر بكتير من اني اقدر اوصفها في كلمتين

شكرا يا كبير

أصدقائي الضربشمساويين - كتاب وقراء - .. بحبكم موووت وسعيدة جدا اني واحدة منكم

ضربة شمس حبيبتي .. وحشتيني آآآآخر حاجة ومفتقداكي جدا اوي خالص

بييييييس

.. فارسي المنتظر.. وهم ولا تايه ؟

2009-04-06T23:42:00.006+02:00

وهم ؟! .. هل أنت فعلا وهما ؟ .. كل من حولي يجمعون على أنك وهما .. وأنك لن تأتي أبدا .. وأن العمر سيمضي وأنت لا تأتي إلا في أحلامي .. لان الوهم لا يتجسد في صورة انسان .. ولكن من قال أنك مجرد انسان .. فأنت أجمل انسان .. فأنت في خيالي صورة نورانية لفارس نبيل أشبه للملاك .. وهذا ما يجعلهم يجمعون أنك مجرد وهم لن يأتي في الحياة .. لا أتحدث في تشبيهك بفارس جميل عن الشكل - مش طالبة مهند زي البنات - ولكني أتحدث عن طباع الفارس وشخصيته التي تسمو به ليصبح أشبه بملاك .. فعندما أصفك لهم بهذه الطريقة لا يكون منهم سوى الضحك والوعيد بضياع العمر في انتظار الوهم وفي النهاية قبول من يأتي أيا كان لمجرد اللحاق بآخر فرص العمر .. ولكني أظل متمسكة بمبدأي وإن كنت وهما .. فأنا مؤمنة بهذا الوهم وسأنتظره ولن أقبل بغيره .. ولكن مع إيماني وثباتي وكل شيء يظل سؤالا هاما يطرح نفسه بقوة .. هو انت فعلا مش موجود زي ما هما بيقولوا ؟ وأنا هستناك طول عمري ومش هتيجي ؟

اوعى .. أحسن ساعتها هيبقى شكلي وحش أوووووي أوي

.. أعز الناس

2009-03-28T01:16:00.006+02:00

مازالت أجواء الربيع تقبضني وتثير حزني .. بالرغم من مرور الوقت وبعد مرور 8 سنوات مازال قلبي وعقلي يحتفظان بنفس المشاعر والذكريات لنفس الأجواء

يرتبط الربيع عند الجميع بالبهجة والسرور والألوان والزهور بالرغم من إجماعهم على أجوائه المتغيره والتي تنافي تماما كلام عمنا صلاح جاهين " الدنيا ربيع والجو بديع "

يأتي الربيع وتبدأ تجهيزات احتفالاته وتنتشر البهجة بين الناس .. وأحاول أنا التعايش مع هذه الأجواء السعيدة كالآخرين ولكني لا أستطيع .. فأنا لم استطع النسيان .. فمع بداية الربيع يبدأ انقباضي وحزني وشرودي .. ولم تستطع السنين إذابة كل هذا .. وكيف لها أن تستطيع ؟ .. فقد ارتبط الربيع في حياتي بذكرى رحيلك دون وداع .. لم تستطع السنين أن تمحي من ذاكرتي أي من ملامح هذا اليوم المؤلم ..فملامح هذا اليوم تظل تحوم برأسي وتسيطر على خيالي طوال هذه الفترة المسماه بالربيع واحتفالاته .. فرحيلك كان في اليوم السابق لاحتفال الربيع .. وسط البهجة والسعادة والصخب يأتي خبر رحيلك المؤلم .. رحيلك الذي لون كل شيء بالسواد .. رغم مرور السنوات الكثيرة فأنا اذكر كل تفاصيل هذا اليوم وكأنه كان أمس .. وكيف لي أن أنسى وهو يوم رحيل أعز الناس

الله يرحمك يا عمي يا حبيبي .. وحشتني أوي

على طول الحياة نقابل ناس ونعرف ناس ونرتاح ويا ناس عن ناس .. وبيدور الزمن بينا يغير لون ليالينا .. ونتوه بين الزحام والناس ويمكن ننسى كل الناس ولا ننسى حبايبنا أعز الناس حبايبنا .. أعز الناس حبايبنا

القسم اتضرب يا رجااااااااااااااله

2009-03-08T23:26:00.004+02:00

أولا انا اسفه طبعا على التأخير اللي كان لظروف موودية بحته .. اعذروني

في يوم من ذوات الايام .. مساء الاحد .. قاعدين لا بينا ولا علينا وفجأة صوت زعيق وتهليل ودوشة رهييييييبة ووراها صوت حاجات بتنفجر وتطرقع وتتكسر .. وبما ان اخويا الصغير في الوقت ده كان في الشارع واحنا مش فاهمين اصلا ايه اللي احنا سامعينه ده ولا ايه اللي بيحصل فكان اننا كلنا نزلنا جري على الشارع فزعا .. واذا بالمشهد العجيب .. احنا بيتنا على مسافة قريبة من القسم .. نزلت الشارع لقيت الناس بتجري في كل الاتجاهات ومش فاهمين حاجة وانا ولا فارق معايا انا بدور على اخويا عشان اطمن .. واول ما خرجت للشارع اللي بيوصل بينا وبين القسم لقيت دخان - عرفت بعدها انهم كانوا مولعين في موتوسيكل - عند القسم قافل الشارع ومش مبين القسم اساسا وبرضو مش فاهمه ايه اللي بيحصل.. طب دي حريقة في عمارة جنب القسم ولا الصوت ده كابلات كهربا وضربت ولا ايه افهم طيب .. والحمد لله لقيت اخويا واطمنت عليه وبدأت اقف اتفرج بقى عشان افهم
المشهد بالظبط زي ماشوفته بعيني
مجموعة شباب كتيييييييييير .. كتير كتير يعني .. ودخان .. واصوات مفرقعات او رصاص ماعرفش اهي اصوات وخلاص .. وطوب وازاز بيتكسر .. وكل ده ضد القسم
شباب بيحدف طوب وشباب بيحدف حاجات كده مولعه ماعرفش ايه دي .. وشاب - ده انا كنت على بعد كام متر منه - راكب عربية القسم اللي هي البوكس دي و طلع بيها فوق الرصيف وعمال يخبطها في سور المدرسة لحد العربية ما اتدغدغت .. وفضل المشهد على كده تكسير وتخبيط وترزيع لغاية ما دغدغوا القسم وعربياته وبدأوا هتاف باسم الحربية وهنا بدأت اعرف انا هما مين وايه اللي بيحصل عشان الناس اللي في الشارع بدأت تحكي اللي حاصل وبدأت اخد كلمة من هنا وحوار من هنا والحمد لله طلعت بيتنا وانا فاهمه ومتفرجة واخر تمام .. بس تاني يوم على النت لقيت حاجات عجيبه كده ان الموضوع دام بتاع 3 ساعات وده اصلا ماحصلش ده فتي .. وان الموضوع كان اشتباك بين الناس اللي في القسم والشباب بتوع الحربية دول ودي بصراحه انا ماعرفش انا ماشوفتش في الاول غير كام عسكري كده واختفوا في دقايق وبعد كده ماظهرش اي حد من القسم غير بعد ما الشباب دول اختفوا من الشارع والمكان هدي تاني ومابقاش فيه غير المتفرجين من اهالي المدينة .. وبرضو الله اعلم يمكن كان فيه وانا ماخدتش بالي .. واللي عرفته من كلام الناس برضو ان كل اللي حصل ده كان انتقاما لأحد زملائهم اللي اتاخد في القسم قبلها بيومين تقريبا

وانتهى اليوم بانتهاء هذا العرض وانشكاح المتفرجين اللي في الشارع ودعوات الأمهات من المتفرجين - ربنا يحميهم لشبابهم ويخليهم لأهاليهم .. رجالة بصحيح - عندهم حق العيال بصراحه كانوا رجولة رجولة يعني

المضحك عندنا بقى في الموقف هو المنظر بعد الحوار ما خلص .. خلاص الفرجة خلصت والناس بدأت تركز بقى مع بعضها .. وبدأوا بقى في سلامات واخبارات والجيران بقى اللي ماشافوش بعض من شهور ومن سنين اتجمعوا وهات يا رغي واسئلة عن الأحوال والاخبار وبقت هيصه .. بس كان جو من الالفة فظيع

المحزن بقى في الموقف واللي كان غريب عليا .. هو موقف حكتهولي اختي بعد الحوار ده .. وهو ان طفلة من جيراننا كانت في الشارع في الوقت ده .. طفلة عندها بتاع 6 سنين .. ف يا عيني اول ما سمعت اللي انا حكيته ده كله جريت على البيت وهي منهاره وعماله تصرخ وتعيط وهي بتخبط على الباب .. افتحي يا ماما اسرائيل جت عندنا افتحي يا ماما اسرائيل جت

ساعتها حسيت بحزن على ذاكرة وتفكير وخيال طفلة زي دي

والفيديوهات هتلاقوها على اليوتيوب

ومرة تانية اسفه على التأخير واسفه كمان لو البوست طلع ملخبط حبتين تلاتة ستاشرلنفس الظروف الموودية البحتة

تحديث

....................................

في حدث غير مسبوق في مدينتنا اتقلبت الدنيا وقسم الشرطة اتدغدغ فوق دماغ اللي جواه

والدنيا ولعت .. ضرب تلاقي .. انفجارات تلاقي .. عربيات مابقالهاش معالم تلاقي .. مظاهرة وهتاف باسم الحربية هتلاقي - عشان اللي قاموا بالموضوع اجمد شباب حربية - والله ولسه فيكي رجالة يا مصر

الحدث لسه خلصان من دقايق ومش قادرة اجمعلكم ملامحه اللي شوفتها بعيني .. بس كل اللي اقدر اقوله ان الدنيا مقلوبة عندي

وتقريبا الداخلية هتبات في شارعنا النهاردة -اصلي بكتب وسامعة العربيات تتوافد على القسم جنب بيتنا .. سوري قصدي بواقي القسم - سنوافيكم بكافة الأخبار أول ما اعرف اجمع

ويمكن تلاقوا صور وفيديو كمان عشان اللي معايا دلوقتي صوت بس

بصوا بصوا من الآخر انا هاجي تاني وهبقى مركزة اكتر ان شاء الله

ده لو فضل حد في حينا في بيته

.. خوف

2009-02-17T17:59:00.012+02:00

في عز فرحتنا دايما نلاقي الخوف واقف في سكتنا مشتاق لنا وملهوف كأننا واحشينه مع إننا عايشينه .. خوف خلانا واحنا مغمضين بنشوف .. لا عمره خلى القلب يفرح فرحه بجد ولا عمره خلى حد يطمن لحد

كل يوم بنقابل ناس ونتعرف على ناس منهم اللي بيبقى مقابلة عابرة ومنهم اللي بيكمل معانا حياتنا .. نبدأ نتعرف أكتر ونقرب أكتر ونعرف عن بعض أكتر وأكتر .. حياة وطباع وأسلوب .. مشاكل وأفراح وحاجات كتيير .. ويبدأ مع التعارف أكتر والقرب أكتر التعود أكتر وأكتر .. ومعاهم ييجي اللي قالت عليه أنغام " كل ما نقرب لبعض كل ما يزيد الاشتياق .. كل ما نحب اللقا كل ما نخاف م الفراق " .. دايما أما بنقرب من حد ونحس إن الحد ده من الناس الكويسة اللي ما تتعوضش ونتعود على وجوده في حياتنا أيا كانت صفته إيه - صديق حبيب قريب - لازم يظهر مع التعود ده الخوف من فراقه .. لأي سبب من الأسباب بيتواجد الخوف .. خوف من حاجات كتير .. خوف من إنه يطلع غير ما احنا شايفينه .. خوف من إنه يفهمنا غلط في أي حاجة فيحصل فراق .. خوف من إننا نضيعه من حياتنا بأي سبب ممكن جدا يكون السبب هو الخوف ده نفسه

خوف خوف خوف .. ومن كتر الخوف نحاول نفكر في " ما بلاش نتعود كده على بعض أحسن لو ضيعنا في يوم من بعض هنضيع اوي ونتعب أوي لو مرة حسينا بحنين ولقينا صعب نلاقي بعض " .. - آه والله بتقول حكم - بس ساعتها بنلاقي إننا خلاص أصلا اتعودنا واللي كان كان .. لكن ما نقدرش برضو نعمل زيها - انغام - ونقول " مش مهم الجاي إيه احنا نتعب روحنا من دلوقتي ليه .. لو حتى فرقنا الوداع .. لو حتى ضيعنا في الهوا .. مش برضو الضياع احساس هيجمعنا سوا " ما ينفعش الروقان ده لان الضياع والوداع بيوجعوا ويتعبوا ما هماش بالسهولة دي .. بالذات لو هتفارق حد فراقه خسارة فادحة في حياتك .. فبتستسلم للأمر الواقع بعد تعودك وتبدأ رحلة جديدة أصعب وهي الخوف من المشاكل والزعل والفهم الغلط اللي ممكن يؤدوا للخسارة .. وتفضل في كل ده .. في محاولات للحفاظ على صداقتكم .. وده ليه وجهين .. من ناحية ف انت خوفك ده جاي من غلاوة الانسان ده عندك فبتحاول انك ما تخسروش ودي حاجة كويسة .. ومن ناحية تانية انكم من كتر الخوف على زعل بعض ومن كتر المحاولات دي بتزيد بينكم الحساسية وممكن تحسوا انكم بتتلككوا لبعض أو كل واحد فيكم بيتلكك لنفسه عشان يحاسب نفسه على زعل التاني واللي ممكن جدا مايكونش هو سبب فيه أساسا

ويفضل الخوف يزيد ويزيد .. ويوصل لإنه يرخم على أي لحظة حلوة أو أي ميزة حلوة في علاقتكم ببعض لإنك بتتخانق مع نفسك عشان تبطل حاجات بدأت تتعود عليها وانت خايف من تعودك عليها لإنها لو انتهت في يوم من الأيام لسبب خارج عن إرادتك هيوجعك اوي احساسك بفقدانها زي ما هيوجعك تأنيبك لنفسك إنك سيبتها توصل للدرجة دي من التعود .. ورجعت تآمن للناس أوي كده

ويا سلام بقى لو قدرت تحافظ عليه من كل ده وما بقاش يأثر في علاقتكم أي حاجة لانكم فاهمين بعض كويس اوي وأغلى عند بعض من أي زعل ولا أي مشكلة ممكن تحصل بينكم .. وييجي بقى الخوف الأكبر .. تدخُل الغير في الحياة دي .. إن الغير ما يعجبهومش اللي انتوا فيه ده وتطلب معاهم فركشة .. وللأسف الغير دول ليهم سلطة على حد فيكم وأصحاب رأي و قرار كمان ومش حبينك كده لله في لله لمجرد إنهم مش عارفينك أو مش عايزين يعرفوك أساسا .. انت في نظرهم زفت والسلام .. ومش في إيدك أي حاجة تعملها ولا حتى تغير وجهة نظرهم دي لإنهم تربسوا على كده خلاص .. ويزيد خوفك وتحس إنه بدأ العد التنازلي .. وهنا تتأكد إن خوفك الأولاني اللي بتخافه أول ما تتعود على وجود ناس في حياتك وتحبهم ماكانش هبل منك ولا حاجة لان اسباب الخوف أهيه ممكن تتحقق ولو بعد سنين طويلة .. ومع ذلك فممكن برضو يكون مجرد خوف لانك مش ممكن تتنازل عنه ابداااااااا .. أو بمعنى أصح خوف بقى رعب مش فارقة انت مش ممكن تتنازل عنه ابدااااا غصب عن أي حد وخلاص - بلطجة يعني - .. ايووون بلطجة هو كده وإن كان عاجب .. قال اتنازل قال

أصحابي حبايبي أصدقائي الصدوقين ياللي بخاف من ضياعكم مني ربنا مايحرمنيش منكم ابداااااااااا ابدا
وعمري ما ازهق ولا استغنى ولا اتنازل عنكم .. تبقوا كلكم مشاكل .. تبقوا مزفتين بزفت - على رأيي :) - عاجبني .. وانا ما اشتكتلكومش ما تشيلوش انتوا همي ومالكومش دعوة .. هو أنا فيه في حياتي كام حد فظيع زيكم .. ناس عجيبة صحيح
;)

أعقل ؟؟؟؟؟؟؟ تفتكروا ؟؟

2009-02-16T00:22:00.004+02:00

هابي بيرث داي تو يو .. هابي بيرث داي تو يو .. هابي بيرث داي تو بيرو .. هابي بيرث داي تو يو .. هييييييييه

كل سنة وانتي طيبة يا بيرو يا حبيبتي وعقبال مليووون سنة - أيون أيون أنا بقولي فيها حاجة دي - والله وكبرتي يا حبيبتي ووصلتي لسن العقل و العاقلين .. بس مش عارفه بصراحه إن كنتي هتعقلي ولا لأ .. والله ما عارفه .. أنا كنت بفكر بجدية في الموضوع ده وقولت أحاول وكده يمكن فعلا أعقل بس الموضوع اتقابل برفض فزززززيع من أصدقائي المقربين وحلفوا لا يقطعوا علاقتهم بيا لو عقلت فعلا زي ما بقول كده .. ومنهم كمان اللي قال إني بكدب وعمري ما هعرف أعقل أساسا ومش مصدقيني

وف نفس الوقت الناس اللي في البيت نفسهم ومنى عينهم إني أعقل وأبقى زي الناس الكُبارين - أبطل آكل مصاصة وأكلم الدباديب بتاعتي وأبطل اشتريهم أساسا وأبطل اسمع أغاني الأطفال اللي كنت بسمعها وأنا صغيرة ........ إلخ - أبقى عاقلة يعني وكده .. ف مش عارفه أحقق لمين رغبته وأحبط مين وأضيع أمله .. بس أقولكم على سر شكلي هحبط فريق البيت ومش هرجع عاقلة تاني - آه أصل انا في الأساس كنت عاقلة وطرقعت على كبر - أصلي لقيت إني زهقت من العقل وحبيت الجنان و الطرقعة أكتر واللي ماعرفش أساسا ظهروا كده إزاي ولا أصلا كانوا فين .. كلام تاني في سركم هو اللي أنا متأكده منه في موضوع الظهور ده إن سببه الأساسي معرفتي لحبيبة قلبي ميرو النيرو كوانيرو -هو فيه طرقعة أكتر من كده - ماحدش يقولها بقى

Happy BirhDay To Me ..

.. معرض الكتاب 2009

2009-02-07T19:17:00.009+02:00

الحمد لله ربنا كتبهالي ورحت المعرض قبل ما يقفل .. بداية فأعتقد إن زيارتي للمعرض السنة دي كانت مختلفة بعض الشيء .. يعني شوية كده فيها اختلاف عن كل سنة في كام حاجة كده هييجوا في النص

كالعادة في هذا الوقت من كل عام هو معرض الكتاب بكتبه بقاعاته بسلطاته ببابا غنوجه :) .. ما اختلفش في شيء غير شوية التغيير في أماكن القاعات ودور النشر – واللي مش هيفرق معايا في حاجة تنقلها أو ثباتها لاني هدوخ والف حوالين نفسي يعني هلف حوالين نفسي .. هو ده معرض الكتاب – والاختلاف الثاني كان في إن الفلوس السنة دي كانت بتخلص أسرع من أي سنة تانية لسببين .. الأول إن ما شاء الله الكتب كلها غالية نااار .. والثاني إني السنة دي رايحة وعارفة انا عايزة إيه يعني مش بتفرج واللي يعجبني اشتريه .. لا أنا رايحة ومعايا لستة مليانة كتب

طارق بس وهو بيوقع لي هدوء القتلة .. طمع بقى ما انا ماصدقت

سيبنا من كل الرغي ده بقى ونيجي لأهم اختلاف في الاختلافات .. وهو إني السنة دي ولأول مرة في حياتي حضرت حفلات توقيع للكتب .. وقابلت كاتبي المفضل .. الجميل طارق إمام .. وبجد مش عارفه أقولكم إيه ولا إيه لو قعدت أحكي عن فرحتي وسعادتي من هنا لبكره مش هخلص .. حاجة جميلة جدا جدا إنك تقابل كاتبك المفضل ويوقعلك على الكتاب – الأرملة تكتب الخطابات سرا - والأجمل واللي كان هيخلي عقلي يطير من الفرحة هو إن كاتبك المفضل يكون عارفك – من كتر مانت مصدعو بردودك على كتاباته .. ودي ميزة حبيبي الفيس بوك – يختيييييييييييي كنت هطير من الفرحة وهتجنن وأنا واقفة بتكلم معاه وأما طلع عارفني وعارف أد إيه انا متابعاه ومتابعة كل كلمة بيكتبها .. وطلع فعلا طارق إمام زي ما دايما بسمع عنه .. بجد مش بس كاتب رائع وكمان إنسان أكتر من رائع .. شخصية جميلة جدا أي حد يسعد بمعرفته
وفضلت أنا بقيت اليوم مابقولش أي حاجة طول ما أنا ماشية غير طلع عارفني .. طلع عارفني .. طلع عارفنييييييييي ..... مجنونة انا عارفه

وآخر اختلاف كان ثاني أجمد حاجة في اليوم وهو توقيع كتاب ضربة شمس .. وبما إن فيه ضربة شمس يبقى فيه ضربشمساويين .. يعني أجمل ناس ممكن تقابلهم .. ناس حقيقية كده وجميلة .. عدد غير عادي من الضربشمساويين جايين يباركوا لزعيم الضربشمساويين خالد كساب على كتاب ضربة شمس .. وده لوحده حدث كده مالهوش حل وأنا ببقى مبسوطة مووت أما بنتقابل .. بس للأسف يومي خلص بدري أوي ومالحقتش أكمله معاهم لإني كنت مضطرة أروح .. يلا خيرها في غيرها

ودي كانت أحداث معرض الكتاب 2009 واللي بالحدثين السابقين دول بعتبره أجمل معرض كتاب عدى عليا في حياتي .. صحيح رجعت منه مفلسه ومديونة بس ربنا يخليلي ماما وسلفة معرض الكتاب بتاعة كل سنة .. وأهل الخير برضو .. واللي معاه فلوس زيادة يسيبها على باب البلوج وهو خارج .. تعاطفك لوحده مش كفاية

غدا في معرض الكتاب

2009-02-02T18:50:00.005+02:00

أخيراااااااااا وبعد طول انتظار هروح بكرة ان شاء الله معرض الكتاب .. وطلع زي ماالناس بتقول ان طولة البال تبلغ الأمل وعلى رأي اللي قال اللي يصبر ينول - بعيدا عن وصلة المصطبة دي - .. من حسن حظي إن بكرة ان شاء الله في معرض الكتاب حدثين مهمين ليا جدااا

والحدثين دول هما حفلتين توقيع لكتابين كنت منتظراهم من كتييير وهما

رواية الأرملة تكتب الخطابات سرا .. لكاتبي المفضل وراوي جمهورية ضربة شمس الجميل طارق إمام

حفلة التوقيع في جناح دار العين في جناح المانيا من الساعة 3 : 7

وكتاب ضربة شمس .. لرئيس جمهورية ضربة شمس العظمى الزعيم خالد كساب

حفلة التوقيع في جناح دار ميريت في صالة 4 من الساعة 4 : 7

الأرملة تكتب الخطابات سرا وضربة شمس في معرض الكتاب في يوم واحد .. أحمدك ياااااااااارب

.. تاااااج السعاااااادة .. برضو السلطاااااااانية

2009-01-28T20:08:00.014+02:00

ورجعنا للأسئلة بعد الامتحانات

ده تاج كان المفروض يتجاوب وينزل من زمااااااان وكتير بس الظروف بقى

التاج ده جايلي من الصديق العزيز ابن مصر .. سوري يا محمد على التأخير ده كله

تاج السعااااااادة .. برضو السلطااااااانية

ماهي السعادة من وجهة نظرك ؟

هو أنا أولا ممكن أقلبها شوية بس وبدل السعادة دي أخليها انبساط ، أصلي مش عارفه ليه حاسه ان السعادة دي بتاعة نهارك سعيد يا نينه :) يعني على اساس ان الواحد بيقول أنا مبسوط اكتر من أنا سعيد دي - مع احترامي لكاتب التاج طبعا - ما علينا كده أو كده خلينا في السؤال اللي أنا تقريبا مش عارفه إجابته بس هحاول

تصدق مش عارفه .... اصلها اكيد حاجات كتير عميقة اوي- كويسه عميقة دي - صعب تتجاوب في سؤال أقولك ممكن نقول .. بال مرتاح وقلب مظأطط وابتسامة على الشفايف مع لمعة في العينين .. ده اختصار لسعادة .. وممكن نخليها أغنية يسرا في فيلم حرب الفراولة

السعادة تبقى إيه ؟ إمتى احس اني سعيدة ولا ليه ؟ امتى احس القلب يرجع للصبا وتبقى كل الناس لذيذة وطيبة ونجوم سمايا احس بيها قريبة وان مهما الكون قسي هقدر عليه .. أهي دي برضو سعادة

كيف تصل إلى السعادة ؟

أعتقد يعني أعتقد أما أعمل حاجات بتفرحني وفي نفس الوقت أعمل حاجات ترضي ربنا أكيد ساعتها هكون سعيدة

هل السعادة وهم أم أنها حلم صعب ؟

ماعتقدش أبدا انها وهم لان أكيد كل واحد فينا فيه في حياته حاجات بتخليه مبسوط وسعيد .. لكن ممكن فعلا تكون حلم صعب في ظل كل حاجة حوالينا .. واللي يأكد إجابتي دي إن الناس في عز ما هم بيضحوا تلاقي حد قالك خير اللهم اجعله خير .. ربنا يستر .. زي ما يكون ماينفعش يتبسط كده من غير نكد

هل السعادة طريق للنجاح ؟ وضح ؟

آه .. المفروض .. لان الواحد في الطبيعي أما بيكون سعيد بيبقى عايز يعمل حاجات كتييير .. ف لو وظف طاقته الإيجابية - مصطلح ضربشمساوي - دي صح أكيد هيوصل للنجاح

ما هي أكثر اللحظات التي شعرت فيها بالسعادة ؟

إممممم .. دي بقى حاجات كتير وفي نفس الوقت ممكن تكون حاجات عجيبة أو بسيطة أوي زي كده منير أما قال " سعات بحب حاجات مايحبهاش غيري " أنا برضو كده وسعات حاجات تبسطني تكون الحاجات دي ماتبسطش حد غيري .. فممكن نقول من اللحظات دي مثلا أما أشوف طفل بيبتسم ابتسامة تحس انها من قلبه أوي .. أما أتفوق في رمضان على جدول أعمالي واعمل حاجات كويسه .. أما بكون مع ميرو حبيبتي وبنعمل حاجات بنحبها .. وأما بشوفها مبسوطة وعينيها بتلمع من الانبساط .. أما أقول أو أعمل حاجة وتضحك ماما أوي ماعرفش ليه ببقى مبسوطة جدا اني ضحكتها اوي كده .. أما احس اني ساعدت حد او قدرت اقف جنبه صح وهو محتاجلي .. ووجودي في اسكندرية طبعا دي مش عايزة كلام

هل ممكن أن تحقق كل شيء ؟

اللي هو إيه أصلا الكل شيء ده .. هو الطبيعي ان مفيش انسان بيملك كل شيء أو يحقق كل شيء .. لكن ممكن تكون أحلامي بسيطة و تكون هي بالنسبة لي كل شيء وتتحقق .. مفيش حاجة بعيد عن ربنا

السعادة تجعلك تقبل على الحياة أم لا ؟

أكيد طبعا .. الواحد وهو مبسوط بيبقى حابب كل حاجة حواليه وبيبقى عايز ينطلق ويخرج ويعمل كل حاجة حلوة .. وزي ما قال منير برضو في نفس الأغنية " لو زارني فرحي ساعات حواديتي مابتخلصش .. قمري حصان في الليل نجومه دي بترقص "

هل أحسست يوما أنك وصلت لقمة السعادة ؟

السعادة إحساس وفي اعتقادي إن مفيش احساس ليه حدود عشان توصل لآخره أو قمته .. يعني ممكن تحصلي حاجة وابقى حاسة إن ده أكتر يوم أنا حسيت فيه بالسعادة ومفيش سعادة أكتر من كده .. وبعدها تحصلي حاجة تانية أبقى سعيدة بيها أكتر وأكتر .. فأحس ان ده اسعد يوم في حياتي .. فالسعادة والأحاسيس عموما مالهاش حدود

لماذا تمر أوقات السعادة بسرعة ؟

أهو السؤال ده بقى انا مش هعرف أجاوبه لإني كاتبه عنه بوست وكنت ناسياه والسؤال فكرني بيه هبقى انزله ان شاء الله .. لكن بالنسبة للسؤال فالبوست هيأكدلك اني فعلا ماعرفش الإجابة .. ده هو البوست كله أصلا سؤال كبييير

هل ترى السعادة في التدين ؟

أكيد التدين عامل مهم من عوامل السعادة لان الانسان المتدين بيكون مرتاح وراضي ودي حاجات بتخليه مبسوط وسعيد .. بعدين القرب من ربنا سبحانه وتعالى في حد ذاته ليه سعادة خاصة ماينفعش نقارنها بأي سعادة ولا ينفع تتوصف

هل انت متفاءل أو عندك أمل ؟ وضح ؟

والله مافكرتش فيها قبل كده .. بس أنا مش متشائمة يعني .. بس فكرة التفاؤل والأمل والحياة وردي مش عارفه يمكن تكون أكتر يقين بالله .. بمعنى إني مؤمنة جدا ان كل خير ربنا كاتبهولي هيكونلي وهشوفه وماحدش يقدر يمنعه عني .. هيجيلي هيجيلي مادام ربنا كاتبهولي :) .. لو ده هو التفاؤل أو الأمل يبقى أنا متفائلة مش مشكلة

إذا شعرت بالحزن ماذا تفعل ؟

غالبا بانعزل وأقعد لوحدي عشان لا ابقى خنيقة مع الناس ولا اتغابى على حد :) .. بس ممكن ساعات ابقى عايزة اتكلم عشان مانفجرش وده مش مع أي حد طبعا والحمد لله ان ربنا رازقني بالناس اللي اقدر اخنقهم معايا في الوقت ده ;) بس الأغلب ان وأنا متضايقة أو حزينة يعني هتلاقيني قاعدة ساكتة لوحدي كده وفي حالي

هل يستمر معك الحزن فترة أم ينقضي في الحال ؟

طبعا بيستمر .. أنا اصلا شخصية بيسيطر عليها الموود .. بعدين اعتقد انه لو ما استمرش لفترة أيا كانت كبيرة أو صغيرة ما يبقاش حزن .. يبقى أي حاجة تانية .. مضايقاية صغيرة مثلا وعدت وخلاص

ما رأيك في الأفراد المتشائمين ؟

يخنقوا ويجيبوا احباط .. بعدين وأنا أعرف أفراد متشائمين ليه هي ناقصة هم

أنا كده الحمد لله رب العالمين خلصت التاج بتاعي ويااارب ماكونش مملة ولا كلامي ملخبط زيادة عن اللزوم .. وكل تاج وانتوا طيبين .. يبقى حد يعملها تاني

.. كلام

2009-01-11T21:34:00.009+02:00

ده كلام مالهوش لا بداية ولا نهاية .. مجرد كلام .. كلام وبس .. أصلنا أيام امتحانات وأيام الامتحانات الواحد بيبقى كلامه كتير وقليل

كتير عشان عنده كلام كتير عايز يقوله أو أهو بيرغي في أي حاجة تخرجه من موود المذاكرة والسلام .. وقليل لانه من كتر ماهو مخنوق ومش طايق نفسه بسبب الامتحانات فمش عايز يتكلم

الواحد اتعود إن دايما أيام الامتحانات بيظهر فيها حاجات بتلمع ادام عينيه طول الوقت وتبعده عن المذاكرة وتشغله .. زي الأفلام اللي بيموت فيها وأجمد الأفلام اللي بتتجمع كلها لوقت الامتحانات - زي هاري بوتر اللي دايما لازم ييجي ليلة امتحاني - والبرامج والمسرحيات والحركات .. وده عارفينه كل سنة .. انما المره دي اتقرر إننا ننشغل بشكل مختلف شكل أكثر فاعلية .. ضرب غزة قبل الامتحانات بكام يوم .. واللي مش هحكي طبعا عمل إيه في الكل .. والأخبار والتقريرات والتنديدات والاتهامات والاجتماعات والاتصالات وكل ما هو ات .. واللي مابيأتيش من وراه حاجة اساسا

أما الواحد يبقى قاعد بيذاكر حقوق انسان وقانون دولي ومجلس الأمن وقراراته الواجبة الاحترام والتنفيذ ومحكمة العدل الدولية وقراراتهم الملزمة .. ويخلص مذاكرة ويقوم يفتح التليفزيون عشان يشوف الأخبار والأحداث وصلت فين أو بمعنى أصح عدد الناس اللي رايحين ادام عينينا وصل لكام .. يلاقي مكتوب في شريط الأخبار مجلس الأمن يقرر وقف اطلاق النار الفوري في غزة .. وبعدها بكام عنوان أولمرت يعتبر قرار مجلس الأمن غير قابل للتطبيق

يا ترى المفروض إن الواحد المذاكر ده يروح تاني يوم الامتحان يكتب إيه .. يكتب اللي بيقوله الكتاب ولا اللي بيقوله الواقع والأخبار

أما تلاقي الأخبار جايبالك أطفال فضلوا محجوزين في بيت 4 أيام متعلقين بجثث أهاليهم 4 أيام لا أكل ولا شرب وعايشين مع جثث عيلتهم .. رعب وفزع وجوع ويُتم وضياع ومصير مجهول ومع كل ده مطلوب اني أكتب في الامتحان ان حقوق الإنسان محفوظة وقرارات مجلس الأمن مُلزمة وبتتنفذ والحياة وردي واللي يقول غير كده الله يحرقه .. ما علينا أنا هسكت بقى عشان أنا قولت من الأول إن الكلام ده لا ليه عندي بداية ولا ليه نهاية

حسبي الله ونعم الوكيل

مفيش كلام

2008-12-27T21:09:00.002+02:00

بجد فعلا مفيش كلام .. اصل ايه الكلام اللي ممكن يتقال

اما يبقى من الظهر لغاية دلوقتي 225 شهيد و700 جريح .. يبقى ايه الكلام اللي ممكن يتقال

اما غزة تتعرض لمذبحة يموت فيها العدد ده - ولسه اللي جاي - واسرائيل بتقول ان دي مش النهاية وان اللي حصل ده مجرد افتتاحية لمعركة طويلة مدروسة ويكون الرد العربي او بمعنى اصح الحاجة اللي على اثرها اتذكر العرب في الاخبار هي الاتصالات والتنديدات والادانات .. يبقى فعلا مفيش كلام

اما يبقى كل ده حاصل من الصبح وتيجي تتكلم مع حد عليه يقولك انت بتتكلم على ايه هو ايه اللي حصل .. يبقى مفيش كلام

اما تحكيله اللي حصل وانت هتتشل ويسمعك وفي الآخر يسيبك ويمشي مش من غير ولا كلمة ده من غير اي تعبير على وشه يختلف عن قبل ما يسمع .. يبقى مفيش كلام

لكي الله يا غزّة

مش قادرين نعملها حاجة بس ما ننساهاش كمان في دعائنا وصلاتنا

دعوة لصيام الاثنين القادم والدعاء لأهل غزّة